| Library / Tipiṭaka / ತಿಪಿಟಕ • Tipiṭaka / ಅಪದಾನಪಾಳಿ • Apadānapāḷi |
೨೩. ಆಲಮ್ಬಣದಾಯಕವಗ್ಗೋ
23. Ālambaṇadāyakavaggo
೧. ಆಲಮ್ಬಣದಾಯಕತ್ಥೇರಅಪದಾನಂ
1. Ālambaṇadāyakattheraapadānaṃ
೧.
1.
‘‘ಅತ್ಥದಸ್ಸಿಸ್ಸ ಭಗವತೋ, ಲೋಕಜೇಟ್ಠಸ್ಸ ತಾದಿನೋ।
‘‘Atthadassissa bhagavato, lokajeṭṭhassa tādino;
ಆಲಮ್ಬಣಂ ಮಯಾ ದಿನ್ನಂ, ದ್ವಿಪದಿನ್ದಸ್ಸ ತಾದಿನೋ॥
Ālambaṇaṃ mayā dinnaṃ, dvipadindassa tādino.
೨.
2.
‘‘ಧರಣಿಂ ಪಟಿಪಜ್ಜಾಮಿ, ವಿಪುಲಂ ಸಾಗರಪ್ಪರಂ।
‘‘Dharaṇiṃ paṭipajjāmi, vipulaṃ sāgarapparaṃ;
ಪಾಣೇಸು ಚ ಇಸ್ಸರಿಯಂ, ವತ್ತೇಮಿ ವಸುಧಾಯ ಚ॥
Pāṇesu ca issariyaṃ, vattemi vasudhāya ca.
೩.
3.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ।
‘‘Kilesā jhāpitā mayhaṃ, bhavā sabbe samūhatā;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ॥
Tisso vijjā anuppattā, kataṃ buddhassa sāsanaṃ.
೪.
4.
‘‘ಇತೋ ದ್ವೇಸಟ್ಠಿಕಪ್ಪಮ್ಹಿ, ತಯೋ ಆಸಿಂಸು ಖತ್ತಿಯಾ।
‘‘Ito dvesaṭṭhikappamhi, tayo āsiṃsu khattiyā;
ಏಕಾಪಸ್ಸಿತನಾಮಾ ತೇ, ಚಕ್ಕವತ್ತೀ ಮಹಬ್ಬಲಾ॥
Ekāpassitanāmā te, cakkavattī mahabbalā.
೫.
5.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ।
‘‘Paṭisambhidā catasso, vimokkhāpi ca aṭṭhime;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’॥
Chaḷabhiññā sacchikatā, kataṃ buddhassa sāsanaṃ’’.
ಇತ್ಥಂ ಸುದಂ ಆಯಸ್ಮಾ ಆಲಮ್ಬಣದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ।
Itthaṃ sudaṃ āyasmā ālambaṇadāyako thero imā gāthāyo abhāsitthāti.
ಆಲಮ್ಬಣದಾಯಕತ್ಥೇರಸ್ಸಾಪದಾನಂ ಪಠಮಂ।
Ālambaṇadāyakattherassāpadānaṃ paṭhamaṃ.
