| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
២៣. អាលម្ពណទាយកវគ្គោ
23. Ālambaṇadāyakavaggo
១. អាលម្ពណទាយកត្ថេរអបទានំ
1. Ālambaṇadāyakattheraapadānaṃ
១.
1.
‘‘អត្ថទស្សិស្ស ភគវតោ, លោកជេដ្ឋស្ស តាទិនោ;
‘‘Atthadassissa bhagavato, lokajeṭṭhassa tādino;
អាលម្ពណំ មយា ទិន្នំ, ទ្វិបទិន្ទស្ស តាទិនោ។
Ālambaṇaṃ mayā dinnaṃ, dvipadindassa tādino.
២.
2.
‘‘ធរណិំ បដិបជ្ជាមិ, វិបុលំ សាគរប្បរំ;
‘‘Dharaṇiṃ paṭipajjāmi, vipulaṃ sāgarapparaṃ;
បាណេសុ ច ឥស្សរិយំ, វត្តេមិ វសុធាយ ច។
Pāṇesu ca issariyaṃ, vattemi vasudhāya ca.
៣.
3.
‘‘កិលេសា ឈាបិតា មយ្ហំ, ភវា សព្ពេ សមូហតា;
‘‘Kilesā jhāpitā mayhaṃ, bhavā sabbe samūhatā;
តិស្សោ វិជ្ជា អនុប្បត្តា, កតំ ពុទ្ធស្ស សាសនំ។
Tisso vijjā anuppattā, kataṃ buddhassa sāsanaṃ.
៤.
4.
‘‘ឥតោ ទ្វេសដ្ឋិកប្បម្ហិ, តយោ អាសិំសុ ខត្តិយា;
‘‘Ito dvesaṭṭhikappamhi, tayo āsiṃsu khattiyā;
ឯកាបស្សិតនាមា តេ, ចក្កវត្តី មហព្ពលា។
Ekāpassitanāmā te, cakkavattī mahabbalā.
៥.
5.
‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;
‘‘Paṭisambhidā catasso, vimokkhāpi ca aṭṭhime;
ឆឡភិញ្ញា សច្ឆិកតា, កតំ ពុទ្ធស្ស សាសនំ’’។
Chaḷabhiññā sacchikatā, kataṃ buddhassa sāsanaṃ’’.
ឥត្ថំ សុទំ អាយស្មា អាលម្ពណទាយកោ ថេរោ ឥមា គាថាយោ អភាសិត្ថាតិ។
Itthaṃ sudaṃ āyasmā ālambaṇadāyako thero imā gāthāyo abhāsitthāti.
អាលម្ពណទាយកត្ថេរស្សាបទានំ បឋមំ។
Ālambaṇadāyakattherassāpadānaṃ paṭhamaṃ.
