| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
២. អជិនទាយកត្ថេរអបទានំ
2. Ajinadāyakattheraapadānaṃ
៦.
6.
‘‘ឯកត្តិំសេ ឥតោ កប្បេ, គណសត្ថារកោ អហំ;
‘‘Ekattiṃse ito kappe, gaṇasatthārako ahaṃ;
អទ្ទសំ វិរជំ ពុទ្ធំ, អាហុតីនំ បដិគ្គហំ។
Addasaṃ virajaṃ buddhaṃ, āhutīnaṃ paṭiggahaṃ.
៧.
7.
‘‘ចម្មខណ្ឌំ មយា ទិន្នំ, សិខិនោ លោកពន្ធុនោ;
‘‘Cammakhaṇḍaṃ mayā dinnaṃ, sikhino lokabandhuno;
តេន កម្មេន ទ្វិបទិន្ទ, លោកជេដ្ឋ នរាសភ។
Tena kammena dvipadinda, lokajeṭṭha narāsabha.
៨.
8.
‘‘សម្បត្តិំ អនុភោត្វាន, កិលេសេ ឈាបយិំ អហំ;
‘‘Sampattiṃ anubhotvāna, kilese jhāpayiṃ ahaṃ;
ធារេមិ អន្តិមំ ទេហំ, សម្មាសម្ពុទ្ធសាសនេ។
Dhāremi antimaṃ dehaṃ, sammāsambuddhasāsane.
៩.
9.
‘‘ឯកត្តិំសេ ឥតោ កប្បេ, អជិនំ យំ អទាសហំ;
‘‘Ekattiṃse ito kappe, ajinaṃ yaṃ adāsahaṃ;
ទុគ្គតិំ នាភិជានាមិ, អជិនស្ស ឥទំ ផលំ។
Duggatiṃ nābhijānāmi, ajinassa idaṃ phalaṃ.
១០.
10.
‘‘ឥតោ បញ្ចមកេ កប្បេ, រាជា អាសិំ សុទាយកោ;
‘‘Ito pañcamake kappe, rājā āsiṃ sudāyako;
សត្តរតនសម្បន្នោ, ចក្កវត្តី មហព្ពលោ។
Sattaratanasampanno, cakkavattī mahabbalo.
១១.
11.
‘‘បដិសម្ភិទា ចតស្សោ…បេ.… កតំ ពុទ្ធស្ស សាសនំ’’។
‘‘Paṭisambhidā catasso…pe… kataṃ buddhassa sāsanaṃ’’.
ឥត្ថំ សុទំ អាយស្មា អជិនទាយកោ ថេរោ ឥមា គាថាយោ អភាសិត្ថាតិ។
Itthaṃ sudaṃ āyasmā ajinadāyako thero imā gāthāyo abhāsitthāti.
អជិនទាយកត្ថេរស្សាបទានំ ទុតិយំ។
Ajinadāyakattherassāpadānaṃ dutiyaṃ.
