| Library / Tipiṭaka / तिपिटक • Tipiṭaka / अपदानपाळि • Apadānapāḷi |
२३. आलम्बणदायकवग्गो
23. Ālambaṇadāyakavaggo
१. आलम्बणदायकत्थेरअपदानं
1. Ālambaṇadāyakattheraapadānaṃ
१.
1.
‘‘अत्थदस्सिस्स भगवतो, लोकजेट्ठस्स तादिनो।
‘‘Atthadassissa bhagavato, lokajeṭṭhassa tādino;
आलम्बणं मया दिन्नं, द्विपदिन्दस्स तादिनो॥
Ālambaṇaṃ mayā dinnaṃ, dvipadindassa tādino.
२.
2.
‘‘धरणिं पटिपज्जामि, विपुलं सागरप्परं।
‘‘Dharaṇiṃ paṭipajjāmi, vipulaṃ sāgarapparaṃ;
पाणेसु च इस्सरियं, वत्तेमि वसुधाय च॥
Pāṇesu ca issariyaṃ, vattemi vasudhāya ca.
३.
3.
‘‘किलेसा झापिता मय्हं, भवा सब्बे समूहता।
‘‘Kilesā jhāpitā mayhaṃ, bhavā sabbe samūhatā;
तिस्सो विज्जा अनुप्पत्ता, कतं बुद्धस्स सासनं॥
Tisso vijjā anuppattā, kataṃ buddhassa sāsanaṃ.
४.
4.
‘‘इतो द्वेसट्ठिकप्पम्हि, तयो आसिंसु खत्तिया।
‘‘Ito dvesaṭṭhikappamhi, tayo āsiṃsu khattiyā;
एकापस्सितनामा ते, चक्कवत्ती महब्बला॥
Ekāpassitanāmā te, cakkavattī mahabbalā.
५.
5.
‘‘पटिसम्भिदा चतस्सो, विमोक्खापि च अट्ठिमे।
‘‘Paṭisambhidā catasso, vimokkhāpi ca aṭṭhime;
छळभिञ्ञा सच्छिकता, कतं बुद्धस्स सासनं’’॥
Chaḷabhiññā sacchikatā, kataṃ buddhassa sāsanaṃ’’.
इत्थं सुदं आयस्मा आलम्बणदायको थेरो इमा गाथायो अभासित्थाति।
Itthaṃ sudaṃ āyasmā ālambaṇadāyako thero imā gāthāyo abhāsitthāti.
आलम्बणदायकत्थेरस्सापदानं पठमं।
Ālambaṇadāyakattherassāpadānaṃ paṭhamaṃ.
