| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၅. အက္ကောဓသုတ္တဝဏ္ဏနာ
5. Akkodhasuttavaṇṇanā
၂၇၁. ကောဓော တုမ္ဟေ မာ အဘိဘဝီတိ ဧတ္ထ ကောဓေန အနဘိဘဝနီယတ္တံ ခန္တိမေတ္တာကရုဏာဒိတပ္ပဋိပက္ခဓမ္မပရိဗ္ရူဟနေန ။ တထာ ဟိ တံသမင္ဂိနော ကောဓော အဘိဘုယ္ယတီတိ အာဟ ‘‘တုမ္ဟေဝ ကောဓံ အဘိဘဝထ။ ကုဇ္ဈန္တာနံ မာ ပဋိကုဇ္ဈိတ္ထာ’’တိ။ ပဋိပဒာတိ ဧသာ ပဋိပတ္တိ။ မေတ္တာတိ အပ္ပနာပ္ပတ္တာ မေတ္တာ။ တဒုပစာရော မေတ္တာပုဗ္ဗဘာဂော။ န ဝိဟိံသတိ ကိဉ္စိ ဧတာယာတိ အဝိဟိံသာ။ ကရုဏာတိ အပ္ပနာပ္ပတ္တကရုဏာ ဝေဒိတဗ္ဗာ။ တဒုပစာရော ကရုဏာပုဗ္ဗဘာဂော။ လာမကဇနန္တိ ခန္တိအာဒီသု ယောနိသောမနသိကာရာဘာဝေန ဂာရယ္ဟသမာစာရသမာယောဂေန စ နိဟီနံ ဇနံ။ ပစ္စယပရိသုဒ္ဓိယာ ကောဓော အဘိမဒ္ဒမာနော ပုဂ္ဂလံ အဘိမဒ္ဒတိ, တသ္သ သော ပဋိသင္ခာနဘာဝနာဗလေဟိ သမ္မဒေဝ ပဟာတဗ္ဗောတိ။
271.Kodho tumhe mā abhibhavīti ettha kodhena anabhibhavanīyattaṃ khantimettākaruṇāditappaṭipakkhadhammaparibrūhanena . Tathā hi taṃsamaṅgino kodho abhibhuyyatīti āha ‘‘tumheva kodhaṃ abhibhavatha. Kujjhantānaṃ mā paṭikujjhitthā’’ti. Paṭipadāti esā paṭipatti. Mettāti appanāppattā mettā. Tadupacāro mettāpubbabhāgo. Na vihiṃsati kiñci etāyāti avihiṃsā. Karuṇāti appanāppattakaruṇā veditabbā. Tadupacāro karuṇāpubbabhāgo. Lāmakajananti khantiādīsu yonisomanasikārābhāvena gārayhasamācārasamāyogena ca nihīnaṃ janaṃ. Paccayaparisuddhiyā kodho abhimaddamāno puggalaṃ abhimaddati, tassa so paṭisaṅkhānabhāvanābalehi sammadeva pahātabboti.
အက္ကောဓသုတ္တဝဏ္ဏနာ နိဋ္ဌိတာ။
Akkodhasuttavaṇṇanā niṭṭhitā.
တတိယဝဂ္ဂဝဏ္ဏနာ နိဋ္ဌိတာ။
Tatiyavaggavaṇṇanā niṭṭhitā.
သာရတ္ထပ္ပကာသိနိယာ သံယုတ္တနိကာယ-အဋ္ဌကထာယ
Sāratthappakāsiniyā saṃyuttanikāya-aṭṭhakathāya
သက္ကသံယုတ္တဝဏ္ဏနာယ လီနတ္ထပ္ပကာသနာ သမတ္တာ။
Sakkasaṃyuttavaṇṇanāya līnatthappakāsanā samattā.
နိဋ္ဌိတာ စ သာရတ္ထပ္ပကာသိနိယာ
Niṭṭhitā ca sāratthappakāsiniyā
သံယုတ္တနိကာယ-အဋ္ဌကထာယ သဂာထာဝဂ္ဂဝဏ္ဏနာ။
Saṃyuttanikāya-aṭṭhakathāya sagāthāvaggavaṇṇanā.
ပဌမော ဘာဂော နိဋ္ဌိတော။
Paṭhamo bhāgo niṭṭhito.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၅. အက္ကောဓသုတ္တံ • 5. Akkodhasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၅. အက္ကောဓသုတ္တဝဏ္ဏနာ • 5. Akkodhasuttavaṇṇanā
