| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៥. អក្កោធសុត្តំ
5. Akkodhasuttaṃ
២៧១. ឯវំ មេ សុតំ – ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ តត្រ ខោ ភគវា ភិក្ខូ…បេ.… ភគវា ឯតទវោច – ‘‘ភូតបុព្ពំ, ភិក្ខវេ, សក្កោ ទេវានមិន្ទោ សុធម្មាយំ សភាយំ ទេវេ តាវតិំសេ អនុនយមានោ តាយំ វេលាយំ ឥមំ គាថំ អភាសិ –
271. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū…pe… bhagavā etadavoca – ‘‘bhūtapubbaṃ, bhikkhave, sakko devānamindo sudhammāyaṃ sabhāyaṃ deve tāvatiṃse anunayamāno tāyaṃ velāyaṃ imaṃ gāthaṃ abhāsi –
‘‘មា វោ កោធោ អជ្ឈភវិ, មា ច កុជ្ឈិត្ថ កុជ្ឈតំ;
‘‘Mā vo kodho ajjhabhavi, mā ca kujjhittha kujjhataṃ;
អថ បាបជនំ កោធោ, បព្ពតោវាភិមទ្ទតី’’តិ។
Atha pāpajanaṃ kodho, pabbatovābhimaddatī’’ti.
តតិយោ វគ្គោ។
Tatiyo vaggo.
តស្សុទ្ទានំ –
Tassuddānaṃ –
ឆេត្វា ទុព្ពណ្ណិយមាយា, អច្ចយេន អកោធនោ;
Chetvā dubbaṇṇiyamāyā, accayena akodhano;
ទេសិតំ ពុទ្ធសេដ្ឋេន, ឥទញ្ហិ សក្កបញ្ចកន្តិ។
Desitaṃ buddhaseṭṭhena, idañhi sakkapañcakanti.
សក្កសំយុត្តំ សមត្តំ។
Sakkasaṃyuttaṃ samattaṃ.
សគាថាវគ្គោ បឋមោ។
Sagāthāvaggo paṭhamo.
តស្សុទ្ទានំ –
Tassuddānaṃ –
ទេវតា ទេវបុត្តោ ច, រាជា មារោ ច ភិក្ខុនី;
Devatā devaputto ca, rājā māro ca bhikkhunī;
ព្រហ្មា ព្រាហ្មណ វង្គីសោ, វនយក្ខេន វាសវោតិ។
Brahmā brāhmaṇa vaṅgīso, vanayakkhena vāsavoti.
សគាថាវគ្គសំយុត្តបាឡិ និដ្ឋិតា។
Sagāthāvaggasaṃyuttapāḷi niṭṭhitā.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៥. អក្កោធសុត្តវណ្ណនា • 5. Akkodhasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៥. អក្កោធសុត្តវណ្ណនា • 5. Akkodhasuttavaṇṇanā
