| Library / Tipiṭaka / ติปิฎก • Tipiṭaka / จริยาปิฎกปาฬิ • Cariyāpiṭakapāḷi |
ฯ นโม ตสฺส ภควโต อรหโต สมฺมาสมฺพุทฺธสฺสฯ
Namo tassa bhagavato arahato sammāsambuddhassa
ขุทฺทกนิกาเย
Khuddakanikāye
จริยาปิฎกปาฬิ
Cariyāpiṭakapāḷi
๑. อกิตฺติวโคฺค
1. Akittivaggo
๑. อกิตฺติจริยา
1. Akitticariyā
๑.
1.
‘‘กเปฺป จ สตสหเสฺส, จตุโร จ อสงฺขิเย;
‘‘Kappe ca satasahasse, caturo ca asaṅkhiye;
เอตฺถนฺตเร ยํ จริตํ, สพฺพํ ตํ โพธิปาจนํฯ
Etthantare yaṃ caritaṃ, sabbaṃ taṃ bodhipācanaṃ.
๒.
2.
‘‘อตีตกเปฺป จริตํ, ฐปยิตฺวา ภวาภเว;
‘‘Atītakappe caritaṃ, ṭhapayitvā bhavābhave;
อิมมฺหิ กเปฺป จริตํ, ปวกฺขิสฺสํ สุโณหิ เมฯ
Imamhi kappe caritaṃ, pavakkhissaṃ suṇohi me.
๓.
3.
‘‘ยทา อหํ พฺรหารเญฺญ, สุเญฺญ วิปินกานเน;
‘‘Yadā ahaṃ brahāraññe, suññe vipinakānane;
๔.
4.
‘‘ตทา มํ ตปเตเชน, สนฺตโตฺต ติทิวาภิภู;
‘‘Tadā maṃ tapatejena, santatto tidivābhibhū;
ธาเรโนฺต พฺราหฺมณวณฺณํ, ภิกฺขาย มํ อุปาคมิฯ
Dhārento brāhmaṇavaṇṇaṃ, bhikkhāya maṃ upāgami.
๕.
5.
‘‘ปวนา อาภตํ ปณฺณํ, อเตลญฺจ อโลณิกํ;
‘‘Pavanā ābhataṃ paṇṇaṃ, atelañca aloṇikaṃ;
มม ทฺวาเร ฐิตํ ทิสฺวา, สกฎาเหน อากิริํฯ
Mama dvāre ṭhitaṃ disvā, sakaṭāhena ākiriṃ.
๖.
6.
‘‘ตสฺส ทตฺวานหํ ปณฺณํ, นิกฺกุชฺชิตฺวาน ภาชนํ;
‘‘Tassa datvānahaṃ paṇṇaṃ, nikkujjitvāna bhājanaṃ;
ปุเนสนํ ชหิตฺวาน, ปาวิสิํ ปณฺณสาลกํฯ
Punesanaṃ jahitvāna, pāvisiṃ paṇṇasālakaṃ.
๗.
7.
‘‘ทุติยมฺปิ ตติยมฺปิ, อุปคญฺฉิ มมนฺติกํ;
‘‘Dutiyampi tatiyampi, upagañchi mamantikaṃ;
อกมฺปิโต อโนลโคฺค, เอวเมวมทาสหํฯ
Akampito anolaggo, evamevamadāsahaṃ.
๘.
8.
‘‘น เม ตปฺปจฺจยา อตฺถิ, สรีรสฺมิํ วิวณฺณิยํ;
‘‘Na me tappaccayā atthi, sarīrasmiṃ vivaṇṇiyaṃ;
ปีติสุเขน รติยา, วีตินาเมมิ ตํ ทิวํฯ
Pītisukhena ratiyā, vītināmemi taṃ divaṃ.
๙.
9.
‘‘ยทิ มาสมฺปิ เทฺวมาสํ, ทกฺขิเณยฺยํ วรํ ลเภ;
‘‘Yadi māsampi dvemāsaṃ, dakkhiṇeyyaṃ varaṃ labhe;
อกมฺปิโต อโนลีโน, ทเทยฺยํ ทานมุตฺตมํฯ
Akampito anolīno, dadeyyaṃ dānamuttamaṃ.
๑๐.
10.
‘‘น ตสฺส ทานํ ททมาโน, ยสํ ลาภญฺจ ปตฺถยิํ;
‘‘Na tassa dānaṃ dadamāno, yasaṃ lābhañca patthayiṃ;
สพฺพญฺญุตํ ปตฺถยาโน, ตานิ กมฺมานิ อาจริ’’นฺติฯ
Sabbaññutaṃ patthayāno, tāni kammāni ācari’’nti.
อกิตฺติจริยํ ปฐมํฯ
Akitticariyaṃ paṭhamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / จริยาปิฎก-อฎฺฐกถา • Cariyāpiṭaka-aṭṭhakathā / ๑. อกิตฺติจริยาวณฺณนา • 1. Akitticariyāvaṇṇanā
