| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
១០. អជគរង្គបញ្ហោ
10. Ajagaraṅgapañho
១០. ‘‘ភន្តេ នាគសេន, ‘អជគរស្ស ឯកំ អង្គំ គហេតព្ព’ន្តិ យំ វទេសិ, កតមំ តំ ឯកំ អង្គំ គហេតព្ព’’ន្តិ? ‘‘យថា, មហារាជ, អជគរោ មហតិមហាកាយោ ពហូបិ ទិវសេ ឩនូទរោ ទីនតរោ កុច្ឆិបូរំ អាហារំ ន លភតិ, អបរិបុណ្ណោ យេវ យាវទេវ សរីរយាបនមត្តកេន យាបេតិ, ឯវមេវ ខោ, មហារាជ, យោគិនោ យោគាវចរស្ស ភិក្ខាចរិយប្បសុតស្ស បរបិណ្ឌមុបគតស្ស បរទិន្នប្បាដិកង្ខិស្ស សយំគាហប្បដិវិរតស្ស ទុល្លភំ ឧទរបរិបូរំ អាហារំ, អបិ ច អត្ថវសិកេន កុលបុត្តេន ចត្តារោ បញ្ច អាលោបេ អភុញ្ជិត្វា អវសេសំ ឧទកេន បរិបូរេតព្ពំ។ ឥទំ, មហារាជ, អជគរស្ស ឯកំ អង្គំ គហេតព្ពំ។ ភាសិតម្បេតំ, មហារាជ, ថេរេន សារិបុត្តេន ធម្មសេនាបតិនា –
10. ‘‘Bhante nāgasena, ‘ajagarassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, ajagaro mahatimahākāyo bahūpi divase ūnūdaro dīnataro kucchipūraṃ āhāraṃ na labhati, aparipuṇṇo yeva yāvadeva sarīrayāpanamattakena yāpeti, evameva kho, mahārāja, yogino yogāvacarassa bhikkhācariyappasutassa parapiṇḍamupagatassa paradinnappāṭikaṅkhissa sayaṃgāhappaṭiviratassa dullabhaṃ udaraparipūraṃ āhāraṃ, api ca atthavasikena kulaputtena cattāro pañca ālope abhuñjitvā avasesaṃ udakena paripūretabbaṃ. Idaṃ, mahārāja, ajagarassa ekaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘អល្លំ សុក្ខំ វា ភុញ្ជន្តោ, ន ពាឡ្ហំ សុហិតោ សិយា;
‘‘‘Allaṃ sukkhaṃ vā bhuñjanto, na bāḷhaṃ suhito siyā;
ឩនូទរោ មិតាហារោ, សតោ ភិក្ខុ បរិព្ពជេ។
Ūnūdaro mitāhāro, sato bhikkhu paribbaje.
‘‘‘ចត្តារោ បញ្ច អាលោបេ, អភុត្វា ឧទកំ បិវេ;
‘‘‘Cattāro pañca ālope, abhutvā udakaṃ pive;
អលំ ផាសុ វិហារាយ, បហិតត្តស្ស ភិក្ខុនោ’’’តិ។
Alaṃ phāsu vihārāya, pahitattassa bhikkhuno’’’ti.
អជគរង្គបញ្ហោ ទសមោ។
Ajagaraṅgapañho dasamo.
សីហវគ្គោ បញ្ចមោ។
Sīhavaggo pañcamo.
តស្សុទ្ទានំ –
Tassuddānaṃ –
កេសរី ចក្កវាកោ ច, បេណាហិ ឃរកបោតកោ;
Kesarī cakkavāko ca, peṇāhi gharakapotako;
ឧលូកោ សតបត្តោ ច, វគ្គុលិ ច ជលូបិកា;
Ulūko satapatto ca, vagguli ca jalūpikā;
សប្បោ អជគរោ ចេវ, វគ្គោ តេន បវុច្ចតីតិ។
Sappo ajagaro ceva, vaggo tena pavuccatīti.
