| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
៦. មក្កដកវគ្គោ
6. Makkaṭakavaggo
១. បន្ថមក្កដកង្គបញ្ហោ
1. Panthamakkaṭakaṅgapañho
១. ‘‘ភន្តេ នាគសេន, ‘បន្ថមក្កដកស្ស ឯកំ អង្គំ គហេតព្ព’ន្តិ យំ វទេសិ, កតមំ តំ ឯកំ អង្គំ គហេតព្ព’’ន្តិ? ‘‘យថា, មហារាជ, បន្ថមក្កដកោ បន្ថេ មក្កដជាលវិតានំ កត្វា យទិ តត្ថ ជាលកេ លគ្គតិ កិមិ វា មក្ខិកា វា បដង្គោ វា, តំ គហេត្វា ភក្ខយតិ, ឯវមេវ ខោ, មហារាជ, យោគិនា យោគាវចរេន ឆសុ ទ្វារេសុ សតិបដ្ឋានជាលវិតានំ កត្វា យទិ តត្ថ កិលេសមក្ខិកា ពជ្ឈន្តិ, តត្ថេវ ឃាតេតព្ពា។ ឥទំ, មហារាជ, បន្ថមក្កដកស្ស ឯកំ អង្គំ គហេតព្ពំ។ ភាសិតម្បេតំ, មហារាជ, ថេរេន អនុរុទ្ធេន –
1. ‘‘Bhante nāgasena, ‘panthamakkaṭakassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, panthamakkaṭako panthe makkaṭajālavitānaṃ katvā yadi tattha jālake laggati kimi vā makkhikā vā paṭaṅgo vā, taṃ gahetvā bhakkhayati, evameva kho, mahārāja, yoginā yogāvacarena chasu dvāresu satipaṭṭhānajālavitānaṃ katvā yadi tattha kilesamakkhikā bajjhanti, tattheva ghātetabbā. Idaṃ, mahārāja, panthamakkaṭakassa ekaṃ aṅgaṃ gahetabbaṃ. Bhāsitampetaṃ, mahārāja, therena anuruddhena –
‘‘‘ចិត្តំ និយមេ ឆសុ ទ្វារេសុ, សតិបដ្ឋានវរុត្តមេ;
‘‘‘Cittaṃ niyame chasu dvāresu, satipaṭṭhānavaruttame;
កិលេសា តត្ថ លគ្គា ចេ, ហន្តព្ពា តេ វិបស្សិនា’’’តិ។
Kilesā tattha laggā ce, hantabbā te vipassinā’’’ti.
បន្ថមក្កដកង្គបញ្ហោ បឋមោ។
Panthamakkaṭakaṅgapañho paṭhamo.
