| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৯. অগ্গগ্গসমণপঞ্হো
9. Aggaggasamaṇapañho
৯. ‘‘ভন্তে নাগসেন, ভাসিতম্পেতং ভগৰতা ‘আসৰানং খযা সমণো হোতী’তি। পুন চ ভণিতং –
9. ‘‘Bhante nāgasena, bhāsitampetaṃ bhagavatā ‘āsavānaṃ khayā samaṇo hotī’ti. Puna ca bhaṇitaṃ –
‘‘‘চতুব্ভি ধম্মেহি সমঙ্গিভূতং, তং ৰে নরং সমণং আহু লোকে’তি॥
‘‘‘Catubbhi dhammehi samaṅgibhūtaṃ, taṃ ve naraṃ samaṇaṃ āhu loke’ti.
তত্রিমে চত্তারো ধম্মা খন্তি অপ্পাহারতা রতিৰিপ্পহানং আকিঞ্চঞ্ঞং। সব্বানি পনেতানি অপরিক্খীণাসৰস্স সকিলেসস্সেৰ হোন্তি। যদি, ভন্তে নাগসেন, আসৰানং খযা সমণো হোতি, তেন হি ‘চতুব্ভি ধম্মেহি সমঙ্গিভূতং, তং ৰে নরং সমণং আহু লোকে’তি যং ৰচনং, তং মিচ্ছা। যদি চতুব্ভি ধম্মেহি সমঙ্গিভূতো সমণো হোতি, তেন হি ‘আসৰানং খযা সমণো হোতী’তি তম্পি ৰচনং মিচ্ছা, অযম্পি উভতো কোটিকো পঞ্হো তৰানুপ্পত্তো, সো তযা নিব্বাহিতব্বো’’তি।
Tatrime cattāro dhammā khanti appāhāratā rativippahānaṃ ākiñcaññaṃ. Sabbāni panetāni aparikkhīṇāsavassa sakilesasseva honti. Yadi, bhante nāgasena, āsavānaṃ khayā samaṇo hoti, tena hi ‘catubbhi dhammehi samaṅgibhūtaṃ, taṃ ve naraṃ samaṇaṃ āhu loke’ti yaṃ vacanaṃ, taṃ micchā. Yadi catubbhi dhammehi samaṅgibhūto samaṇo hoti, tena hi ‘āsavānaṃ khayā samaṇo hotī’ti tampi vacanaṃ micchā, ayampi ubhato koṭiko pañho tavānuppatto, so tayā nibbāhitabbo’’ti.
‘‘ভাসিতম্পেতং, মহারাজ, ভগৰতা ‘আসৰানং খযা সমণো হোতী’তি। পুন চ ভণিতং ‘চতুব্ভি ধম্মেহি সমঙ্গিভূতং, তং ৰে নরং সমণং আহু লোকে’তি। তদিদং, মহারাজ, ৰচনং তেসং তেসং পুগ্গলানং গুণৰসেন ভণিতং ‘চতুব্ভি ধম্মেহি সমঙ্গিভূতং, তং ৰে নরং সমণং আহু লোকে’তি, ইদং পন নিরৰসেসৰচনং ‘আসৰানং খযা সমণো হোতী’তি।
‘‘Bhāsitampetaṃ, mahārāja, bhagavatā ‘āsavānaṃ khayā samaṇo hotī’ti. Puna ca bhaṇitaṃ ‘catubbhi dhammehi samaṅgibhūtaṃ, taṃ ve naraṃ samaṇaṃ āhu loke’ti. Tadidaṃ, mahārāja, vacanaṃ tesaṃ tesaṃ puggalānaṃ guṇavasena bhaṇitaṃ ‘catubbhi dhammehi samaṅgibhūtaṃ, taṃ ve naraṃ samaṇaṃ āhu loke’ti, idaṃ pana niravasesavacanaṃ ‘āsavānaṃ khayā samaṇo hotī’ti.
‘‘অপি চ, মহারাজ, যে কেচি কিলেসূপসমায পটিপন্না, তে সব্বে উপাদাযুপাদায সমণো খীণাসৰো অগ্গমক্খাযতি। যথা, মহারাজ, যানি কানিচি জলজথলজপুপ্ফানি, ৰস্সিকং তেসং অগ্গমক্খাযতি, অৰসেসানি যানি কানিচি ৰিৰিধানি পুপ্ফজাতানি, সব্বানি তানি পুপ্ফানি যেৰ, উপাদাযুপাদায পন ৰস্সিকং যেৰ পুপ্ফং জনস্স পত্থিতং পিহযিতং। এৰমেৰ খো, মহারাজ, যে কেচি কিলেসূপসমায পটিপন্না, তে সব্বে উপাদাযুপাদায সমণো খীণাসৰো অগ্গমক্খাযতি।
‘‘Api ca, mahārāja, ye keci kilesūpasamāya paṭipannā, te sabbe upādāyupādāya samaṇo khīṇāsavo aggamakkhāyati. Yathā, mahārāja, yāni kānici jalajathalajapupphāni, vassikaṃ tesaṃ aggamakkhāyati, avasesāni yāni kānici vividhāni pupphajātāni, sabbāni tāni pupphāni yeva, upādāyupādāya pana vassikaṃ yeva pupphaṃ janassa patthitaṃ pihayitaṃ. Evameva kho, mahārāja, ye keci kilesūpasamāya paṭipannā, te sabbe upādāyupādāya samaṇo khīṇāsavo aggamakkhāyati.
‘‘যথা ৰা পন, মহারাজ, সব্বধঞ্ঞানং সালি অগ্গমক্খাযতি, যা কাচি অৰসেসা ৰিৰিধা ধঞ্ঞজাতিযো, তা সব্বা উপাদাযুপাদায ভোজনানি সরীরযাপনায, সালি যেৰ তেসং অগ্গমক্খাযতি। এৰমেৰ খো, মহারাজ, যে কেচি কিলেসূপসমায পটিপন্না, তে সব্বে উপাদাযুপাদায সমণো খীণাসৰো অগ্গমক্খাযতী’’তি। ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি।
‘‘Yathā vā pana, mahārāja, sabbadhaññānaṃ sāli aggamakkhāyati, yā kāci avasesā vividhā dhaññajātiyo, tā sabbā upādāyupādāya bhojanāni sarīrayāpanāya, sāli yeva tesaṃ aggamakkhāyati. Evameva kho, mahārāja, ye keci kilesūpasamāya paṭipannā, te sabbe upādāyupādāya samaṇo khīṇāsavo aggamakkhāyatī’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
অগ্গগ্গসমণপঞ্হো নৰমো।
Aggaggasamaṇapañho navamo.
