| Library / Tipiṭaka / តិបិដក • Tipiṭaka / មហាវគ្គ-អដ្ឋកថា • Mahāvagga-aṭṭhakathā |
អធម្មកម្មបដិក្កោសនាទិកថា
Adhammakammapaṭikkosanādikathā
១៥៤. អធម្មកម្មំ វុត្តនយមេវ។ បដិក្កោសិតុន្តិ វារេតុំ។ ទិដ្ឋិម្បិ អាវិកាតុន្តិ ‘‘អធម្មកម្មំ ឥទំ ន មេ ខមតី’’តិ ឯវំ អញ្ញស្ស សន្តិកេ អត្តនោ ទិដ្ឋិំ បកាសេតុំ។ ចតូហិ បញ្ចហីតិអាទិ តេសំ អនុបទ្ទវត្ថាយ វុត្តំ។ សញ្ចិច្ច ន សាវេន្តីតិ យថា ន សុណន្តិ ឯវំ ភណិស្សាមាតិ សញ្ចិច្ច សណិកំ ឧទ្ទិសន្តិ។
154.Adhammakammaṃ vuttanayameva. Paṭikkositunti vāretuṃ. Diṭṭhimpi āvikātunti ‘‘adhammakammaṃ idaṃ na me khamatī’’ti evaṃ aññassa santike attano diṭṭhiṃ pakāsetuṃ. Catūhi pañcahītiādi tesaṃ anupaddavatthāya vuttaṃ. Sañcicca na sāventīti yathā na suṇanti evaṃ bhaṇissāmāti sañcicca saṇikaṃ uddisanti.
១៥៥. ថេរាធិកន្តិ ថេរាធីនំ; ថេរាយត្តំ ភវិតុន្តិ អត្ថោ។ ‘‘ថេរាធេយ្យ’’ន្តិបិ បាឋោ, តស្មា ថេរេន សយំ វា ឧទ្ទិសិតព្ពំ, អញ្ញោ វា អជ្ឈេសិតព្ពោ។ អជ្ឈេសនវិធានញ្ចេត្ថ ធម្មជ្ឈេសនេ វុត្តនយមេវ។ សោ ន ជានាតិ ឧបោសថំ វាតិអាទីសុ ចាតុទ្ទសិកបន្នរសិកភេទេន ទុវិធំ, សង្ឃឧបោសថាទិភេទេន នវវិធញ្ច ឧបោសថំ ន ជានាតិ, ចតុព្ពិធំ ឧបោសថកម្មំ ន ជានាតិ, ទុវិធំ បាតិមោក្ខំ ន ជានាតិ, នវវិធំ បាតិមោក្ខុទ្ទេសំ ន ជានាតិ។ យោ តត្ថ ភិក្ខុ ព្យត្តោ បដិពលោតិ ឯត្ថ កិញ្ចាបិ ទហរស្សាបិ ព្យត្តស្ស បាតិមោក្ខោ អនុញ្ញាតោ។ អថ ខោ ឯត្ថ អយមធិប្បាយោ។ សចេ ថេរស្ស បញ្ច វា ចត្តារោ វា តយោ វា បាតិមោក្ខុទ្ទេសា នាគច្ឆន្តិ; ទ្វេ បន អខណ្ឌា សុវិសទា វាចុគ្គតា ហោន្តិ, ថេរាយត្តោវ បាតិមោក្ខា។ សចេ បន ឯត្តកម្បិ វិសទំ កាតុំ ន សក្កោតិ, ព្យត្តស្ស ភិក្ខុនោ អាយត្តោ ហោតិ។
155.Therādhikanti therādhīnaṃ; therāyattaṃ bhavitunti attho. ‘‘Therādheyya’’ntipi pāṭho, tasmā therena sayaṃ vā uddisitabbaṃ, añño vā ajjhesitabbo. Ajjhesanavidhānañcettha dhammajjhesane vuttanayameva. So najānāti uposathaṃ vātiādīsu cātuddasikapannarasikabhedena duvidhaṃ, saṅghauposathādibhedena navavidhañca uposathaṃ na jānāti, catubbidhaṃ uposathakammaṃ na jānāti, duvidhaṃ pātimokkhaṃ na jānāti, navavidhaṃ pātimokkhuddesaṃ na jānāti. Yo tattha bhikkhu byatto paṭibaloti ettha kiñcāpi daharassāpi byattassa pātimokkho anuññāto. Atha kho ettha ayamadhippāyo. Sace therassa pañca vā cattāro vā tayo vā pātimokkhuddesā nāgacchanti; dve pana akhaṇḍā suvisadā vācuggatā honti, therāyattova pātimokkhā. Sace pana ettakampi visadaṃ kātuṃ na sakkoti, byattassa bhikkhuno āyatto hoti.
សាមន្តា អាវាសាតិ សាមន្តំ អាវាសំ។ សជ្ជុកន្តិ តទហេវ អាគមនត្ថាយ។ នវំ ភិក្ខុំ អាណាបេតុន្តិ ឯត្ថ យោ សក្កោតិ ឧគ្គហេតុំ, ឯវរូបោ អាណាបេតព្ពោ, ន ពាលោ។
Sāmantā āvāsāti sāmantaṃ āvāsaṃ. Sajjukanti tadaheva āgamanatthāya. Navaṃ bhikkhuṃ āṇāpetunti ettha yo sakkoti uggahetuṃ, evarūpo āṇāpetabbo, na bālo.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi
៨២. អធម្មកម្មបដិក្កោសនាទិ • 82. Adhammakammapaṭikkosanādi
៨៣. បាតិមោក្ខុទ្ទេសកអជ្ឈេសនាទិ • 83. Pātimokkhuddesakaajjhesanādi
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / បាតិមោក្ខុទ្ទេសកអជ្ឈេសនាទិកថាវណ្ណនា • Pātimokkhuddesakaajjhesanādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā
អធម្មកម្មបដិក្កោសនាទិកថាវណ្ណនា • Adhammakammapaṭikkosanādikathāvaṇṇanā
បាតិមោក្ខុទ្ទេសកអជ្ឈេសនាទិកថាវណ្ណនា • Pātimokkhuddesakaajjhesanādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / អធម្មកម្មបដិក្កោសនាទិកថាវណ្ណនា • Adhammakammapaṭikkosanādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi
៨២. អធម្មកម្មបដិក្កោសនាទិកថា • 82. Adhammakammapaṭikkosanādikathā
៨៣. បាតិមោក្ខុទ្ទេសកអជ្ឈេសនាទិកថា • 83. Pātimokkhuddesakaajjhesanādikathā
