| Library / Tipiṭaka / ཏིཔིཊཀ • Tipiṭaka / ཨཔདཱན-ཨཊྛཀཐཱ • Apadāna-aṭṭhakathā |
༣. ཨཌྜྷཙེལ༹ཀཏྠེརཨཔདཱནཝཎྞནཱ
3. Aḍḍhaceḷakattheraapadānavaṇṇanā
ཏིསྶསྶཱཧཾ བྷགཝཏོཏིཨཱདིཀཾ ཨཱཡསྨཏོ ཨཌྜྷཙེལ༹ཀཏྠེརསྶ ཨཔདཱནཾ། ཨཡམྤི ཐེརོ པུརིམབུདྡྷེསུ ཀཏཱདྷིཀཱརོ ཏཏྠ ཏཏྠ བྷཝེ ཝིཝཊྚཱུཔནིསྶཡཱནི པུཉྙཱནི ཨུཔཙིནནྟོ ཏིསྶསྶ བྷགཝཏོ ཀཱལེ ཨེཀེནཱཀུསལེན ཀམྨེན དུགྒཏཀུལགེཧེ ནིབྦཏྟོ ཝུདྡྷིམནྭཱཡ སདྡྷམྨདེསནཾ ཉཏྭཱ པསནྣམཱནསོ ཙཱིཝརཏྠཱཡ ཨཌྜྷབྷཱགཾ ཨེཀཾ དུསྶམདཱསི། སོ ཏེནེཝ པཱིཏིསོམནསྶེན ཀཱལཾ ཀཏྭཱ སགྒེ ནིབྦཏྟོ ཚ ཀཱམཱཝཙརསམྤཏྟིམནུབྷཝིཏྭཱ ཏཏོ ཙུཏོ མནུསྶེསུ མནུསྶསམྤཏྟཱིནཾ ཨགྒབྷཱུཏཾ ཙཀྐཝཏྟིསམྤཏྟིཾ ཨནུབྷཝིཏྭཱ ཨིམསྨིཾ བུདྡྷུཔྤཱདེ ཨེཀསྨིཾ ཨདྡྷཀུལེ ནིབྦཏྟོ ཝུདྡྷིཔྤཏྟོ སཏྠུ དྷམྨདེསནཾ སུཏྭཱ པསནྣམཱནསོ པབྦཛིཏྭཱ ནཙིརསྶེཝ ཨརཧཱ ཨཧོསི།
Tissassāhaṃbhagavatotiādikaṃ āyasmato aḍḍhaceḷakattherassa apadānaṃ. Ayampi thero purimabuddhesu katādhikāro tattha tattha bhave vivaṭṭūpanissayāni puññāni upacinanto tissassa bhagavato kāle ekenākusalena kammena duggatakulagehe nibbatto vuddhimanvāya saddhammadesanaṃ ñatvā pasannamānaso cīvaratthāya aḍḍhabhāgaṃ ekaṃ dussamadāsi. So teneva pītisomanassena kālaṃ katvā sagge nibbatto cha kāmāvacarasampattimanubhavitvā tato cuto manussesu manussasampattīnaṃ aggabhūtaṃ cakkavattisampattiṃ anubhavitvā imasmiṃ buddhuppāde ekasmiṃ addhakule nibbatto vuddhippatto satthu dhammadesanaṃ sutvā pasannamānaso pabbajitvā nacirasseva arahā ahosi.
༡༤. སོ ཨཔརབྷཱགེ ཨཏྟནོ པུབྦཀམྨཾ སརིཏྭཱ སོམནསྶཛཱཏོ པུབྦཙརིཏཱཔདཱནཾ པཀཱསེནྟོ ཏིསྶསྶཱཧཾ བྷགཝཏོཏིཨཱདིམཱཧ། ཏཾ སབྦཾ ཨུཏྟཱནཏྠམེཝཱཏི།
14. So aparabhāge attano pubbakammaṃ saritvā somanassajāto pubbacaritāpadānaṃ pakāsento tissassāhaṃ bhagavatotiādimāha. Taṃ sabbaṃ uttānatthamevāti.
ཨཌྜྷཙེལ༹ཀཏྠེརཨཔདཱནཝཎྞནཱ སམཏྟཱ།
Aḍḍhaceḷakattheraapadānavaṇṇanā samattā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ཨཔདཱནཔཱལི༹ • Apadānapāḷi / ༣. ཨཌྜྷཙེལ༹ཀཏྠེརཨཔདཱནཾ • 3. Aḍḍhaceḷakattheraapadānaṃ
