| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၇. အဍ္ဍကရဏသုတ္တဝဏ္ဏနာ
7. Aḍḍakaraṇasuttavaṇṇanā
၁၁၈. သတ္တမေ ကာမဟေတူတိ ကာမမူလကံ။ ကာမနိဒာနန္တိ ကာမပစ္စယာ။ ကာမာဓိကရဏန္တိ ကာမကာရဏာ။ သဗ္ဗာနိ ဟေတာနိ အညမညဝေဝစနာနေဝ။ ဘဒ္ရမုခောတိ သုန္ဒရမုခော။ ဧကဒိဝသံ ကိရ ရာဇာ အဍ္ဍကရဏေ နိသီဒိ။ တတ္ထ ပဌမတရံ လဉ္ဇံ ဂဟေတ္ဝာ နိသိန္နာ အမစ္စာ အသ္သာမိကေပိ သာမိကေ ကရိံသု။ ရာဇာ တံ ဉတ္ဝာ – ‘‘မယ္ဟံ တာဝ ပထဝိသ္သရသ္သ သမ္မုခာပေတေ ဧဝံ ကရောန္တိ, ပရမ္မုခာ ကိံ နာမ န ကရိသ္သန္တိ? ပညာယိသ္သတိ ဒာနိ ဝိဋဋူဘော သေနာပတိ သကေန ရဇ္ဇေန, ကိံ မယ္ဟံ ဧဝရူပေဟိ လဉ္ဇခာဒကေဟိ မုသာဝာဒီဟိ သဒ္ဓိံ ဧကဋ္ဌာနေ နိသဇ္ဇာယာ’’တိ စိန္တေသိ။ တသ္မာ ဧဝမာဟ။ ခိပ္ပံဝ ဩဍ္ဍိတန္တိ ကုမိနံ ဝိယ ဩဍ္ဍိတံ။ ယထာ မစ္ဆာ ဩဍ္ဍိတံ ကုမိနံ ပဝိသန္တာ န ဇာနန္တိ, ဧဝံ သတ္တာ ကိလေသကာမေန ဝတ္ထုကာမံ ဝီတိက္ကမန္တာ န ဇာနန္တီတိ အတ္ထော။ သတ္တမံ။
118. Sattame kāmahetūti kāmamūlakaṃ. Kāmanidānanti kāmapaccayā. Kāmādhikaraṇanti kāmakāraṇā. Sabbāni hetāni aññamaññavevacanāneva. Bhadramukhoti sundaramukho. Ekadivasaṃ kira rājā aḍḍakaraṇe nisīdi. Tattha paṭhamataraṃ lañjaṃ gahetvā nisinnā amaccā assāmikepi sāmike kariṃsu. Rājā taṃ ñatvā – ‘‘mayhaṃ tāva pathavissarassa sammukhāpete evaṃ karonti, parammukhā kiṃ nāma na karissanti? Paññāyissati dāni viṭaṭūbho senāpati sakena rajjena, kiṃ mayhaṃ evarūpehi lañjakhādakehi musāvādīhi saddhiṃ ekaṭṭhāne nisajjāyā’’ti cintesi. Tasmā evamāha. Khippaṃva oḍḍitanti kuminaṃ viya oḍḍitaṃ. Yathā macchā oḍḍitaṃ kuminaṃ pavisantā na jānanti, evaṃ sattā kilesakāmena vatthukāmaṃ vītikkamantā na jānantīti attho. Sattamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၇. အဍ္ဍကရဏသုတ္တံ • 7. Aḍḍakaraṇasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၇. အဍ္ဍကရဏသုတ္တဝဏ္ဏနာ • 7. Aḍḍakaraṇasuttavaṇṇanā
