| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၇. အဍ္ဍကရဏသုတ္တံ
7. Aḍḍakaraṇasuttaṃ
၁၁၈. သာဝတ္ထိနိဒာနံ ။ ဧကမန္တံ နိသိန္နော ခော ရာဇာ ပသေနဒိ ကောသလော ဘဂဝန္တံ ဧတဒဝောစ – ‘‘ဣဓာဟံ, ဘန္တေ, အဍ္ဍကရဏေ 1 နိသိန္နော ပသ္သာမိ ခတ္တိယမဟာသာလေပိ ဗ္ရာဟ္မဏမဟာသာလေပိ ဂဟပတိမဟာသာလေပိ အဍ္ဎေ မဟဒ္ဓနေ မဟာဘောဂေ ပဟူတဇာတရူပရဇတေ ပဟူတဝိတ္တူပကရဏေ ပဟူတဓနဓညေ ကာမဟေတု ကာမနိဒာနံ ကာမာဓိကရဏံ သမ္ပဇာနမုသာ ဘာသန္တေ။ တသ္သ မယ္ဟံ, ဘန္တေ, ဧတဒဟောသိ – ‘အလံ ဒာနိ မေ အဍ္ဍကရဏေန, ဘဒ္ရမုခော ဒာနိ အဍ္ဍကရဏေန ပညာယိသ္သတီ’’’တိ။
118. Sāvatthinidānaṃ . Ekamantaṃ nisinno kho rājā pasenadi kosalo bhagavantaṃ etadavoca – ‘‘idhāhaṃ, bhante, aḍḍakaraṇe 2 nisinno passāmi khattiyamahāsālepi brāhmaṇamahāsālepi gahapatimahāsālepi aḍḍhe mahaddhane mahābhoge pahūtajātarūparajate pahūtavittūpakaraṇe pahūtadhanadhaññe kāmahetu kāmanidānaṃ kāmādhikaraṇaṃ sampajānamusā bhāsante. Tassa mayhaṃ, bhante, etadahosi – ‘alaṃ dāni me aḍḍakaraṇena, bhadramukho dāni aḍḍakaraṇena paññāyissatī’’’ti.
‘‘(ဧဝမေတံ, မဟာရာဇ, ဧဝမေတံ မဟာရာဇ!) 3 ယေပိ တေ, မဟာရာဇ, ခတ္တိယမဟာသာလာ ဗ္ရာဟ္မဏမဟာသာလာ ဂဟပတိမဟာသာလာ အဍ္ဎာ မဟဒ္ဓနာ မဟာဘောဂာ ပဟူတဇာတရူပရဇတာ ပဟူတဝိတ္တူပကရဏာ ပဟူတဓနဓညာ ကာမဟေတု ကာမနိဒာနံ ကာမာဓိကရဏံ သမ္ပဇာနမုသာ ဘာသန္တိ; တေသံ တံ ဘဝိသ္သတိ ဒီဃရတ္တံ အဟိတာယ ဒုက္ခာယာ’’တိ။ ဣဒမဝောစ။ပေ.။
‘‘(Evametaṃ, mahārāja, evametaṃ mahārāja!) 4 Yepi te, mahārāja, khattiyamahāsālā brāhmaṇamahāsālā gahapatimahāsālā aḍḍhā mahaddhanā mahābhogā pahūtajātarūparajatā pahūtavittūpakaraṇā pahūtadhanadhaññā kāmahetu kāmanidānaṃ kāmādhikaraṇaṃ sampajānamusā bhāsanti; tesaṃ taṃ bhavissati dīgharattaṃ ahitāya dukkhāyā’’ti. Idamavoca…pe…
‘‘သာရတ္တာ ကာမဘောဂေသု၊ ဂိဒ္ဓာ ကာမေသု မုစ္ဆိတာ။
‘‘Sārattā kāmabhogesu, giddhā kāmesu mucchitā;
အတိသာရံ န ဗုဇ္ဈန္တိ၊ မစ္ဆာ ခိပ္ပံဝ ဩဍ္ဍိတံ။
Atisāraṃ na bujjhanti, macchā khippaṃva oḍḍitaṃ;
ပစ္ဆာသံ ကဋုကံ ဟောတိ၊ ဝိပာကော ဟိသ္သ ပာပကော’’တိ။
Pacchāsaṃ kaṭukaṃ hoti, vipāko hissa pāpako’’ti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၇. အဍ္ဍကရဏသုတ္တဝဏ္ဏနာ • 7. Aḍḍakaraṇasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၇. အဍ္ဍကရဏသုတ္တဝဏ္ဏနာ • 7. Aḍḍakaraṇasuttavaṇṇanā
