| Library / Tipiṭaka / തിപിടക • Tipiṭaka / സംയുത്തനികായ • Saṃyuttanikāya |
൭. അഡ്ഡകരണസുത്തം
7. Aḍḍakaraṇasuttaṃ
൧൧൮. സാവത്ഥിനിദാനം . ഏകമന്തം നിസിന്നോ ഖോ രാജാ പസേനദി കോസലോ ഭഗവന്തം ഏതദവോച – ‘‘ഇധാഹം, ഭന്തേ, അഡ്ഡകരണേ 1 നിസിന്നോ പസ്സാമി ഖത്തിയമഹാസാലേപി ബ്രാഹ്മണമഹാസാലേപി ഗഹപതിമഹാസാലേപി അഡ്ഢേ മഹദ്ധനേ മഹാഭോഗേ പഹൂതജാതരൂപരജതേ പഹൂതവിത്തൂപകരണേ പഹൂതധനധഞ്ഞേ കാമഹേതു കാമനിദാനം കാമാധികരണം സമ്പജാനമുസാ ഭാസന്തേ. തസ്സ മയ്ഹം, ഭന്തേ, ഏതദഹോസി – ‘അലം ദാനി മേ അഡ്ഡകരണേന, ഭദ്രമുഖോ ദാനി അഡ്ഡകരണേന പഞ്ഞായിസ്സതീ’’’തി.
118. Sāvatthinidānaṃ . Ekamantaṃ nisinno kho rājā pasenadi kosalo bhagavantaṃ etadavoca – ‘‘idhāhaṃ, bhante, aḍḍakaraṇe 2 nisinno passāmi khattiyamahāsālepi brāhmaṇamahāsālepi gahapatimahāsālepi aḍḍhe mahaddhane mahābhoge pahūtajātarūparajate pahūtavittūpakaraṇe pahūtadhanadhaññe kāmahetu kāmanidānaṃ kāmādhikaraṇaṃ sampajānamusā bhāsante. Tassa mayhaṃ, bhante, etadahosi – ‘alaṃ dāni me aḍḍakaraṇena, bhadramukho dāni aḍḍakaraṇena paññāyissatī’’’ti.
‘‘(ഏവമേതം, മഹാരാജ, ഏവമേതം മഹാരാജ!) 3 യേപി തേ, മഹാരാജ, ഖത്തിയമഹാസാലാ ബ്രാഹ്മണമഹാസാലാ ഗഹപതിമഹാസാലാ അഡ്ഢാ മഹദ്ധനാ മഹാഭോഗാ പഹൂതജാതരൂപരജതാ പഹൂതവിത്തൂപകരണാ പഹൂതധനധഞ്ഞാ കാമഹേതു കാമനിദാനം കാമാധികരണം സമ്പജാനമുസാ ഭാസന്തി; തേസം തം ഭവിസ്സതി ദീഘരത്തം അഹിതായ ദുക്ഖായാ’’തി. ഇദമവോച…പേ॰…
‘‘(Evametaṃ, mahārāja, evametaṃ mahārāja!) 4 Yepi te, mahārāja, khattiyamahāsālā brāhmaṇamahāsālā gahapatimahāsālā aḍḍhā mahaddhanā mahābhogā pahūtajātarūparajatā pahūtavittūpakaraṇā pahūtadhanadhaññā kāmahetu kāmanidānaṃ kāmādhikaraṇaṃ sampajānamusā bhāsanti; tesaṃ taṃ bhavissati dīgharattaṃ ahitāya dukkhāyā’’ti. Idamavoca…pe…
‘‘സാരത്താ കാമഭോഗേസു, ഗിദ്ധാ കാമേസു മുച്ഛിതാ;
‘‘Sārattā kāmabhogesu, giddhā kāmesu mucchitā;
അതിസാരം ന ബുജ്ഝന്തി, മച്ഛാ ഖിപ്പംവ ഓഡ്ഡിതം;
Atisāraṃ na bujjhanti, macchā khippaṃva oḍḍitaṃ;
പച്ഛാസം കടുകം ഹോതി, വിപാകോ ഹിസ്സ പാപകോ’’തി.
Pacchāsaṃ kaṭukaṃ hoti, vipāko hissa pāpako’’ti.
Footnotes:
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / സംയുത്തനികായ (അട്ഠകഥാ) • Saṃyuttanikāya (aṭṭhakathā) / ൭. അഡ്ഡകരണസുത്തവണ്ണനാ • 7. Aḍḍakaraṇasuttavaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / സംയുത്തനികായ (ടീകാ) • Saṃyuttanikāya (ṭīkā) / ൭. അഡ്ഡകരണസുത്തവണ്ണനാ • 7. Aḍḍakaraṇasuttavaṇṇanā
