| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༢༦༠. ཨདསྶནེ ཨུཀྑེཔནཱིཡཀམྨཝིཝཱདཀཐཱ
260. Adassane ukkhepanīyakammavivādakathā
༤༣༧. ཨིདྷ པན, བྷིཀྑཝེ, བྷིཀྑུ ཨཱཔཏྟིཾ ཨཱཔཛྫིཏྭཱ ན ཨིཙྪཏི ཨཱཔཏྟིཾ པསྶིཏུཾ། ཏཏྲ ཙེ བྷིཀྑཱུནཾ ཨེཝཾ ཧོཏི – ‘‘ཨཡཾ ཁོ, ཨཱཝུསོ, བྷིཀྑུ ཨཱཔཏྟིཾ ཨཱཔཛྫིཏྭཱ ན ཨིཙྪཏི ཨཱཔཏྟིཾ པསྶིཏུཾ། ཧནྡསྶ མཡཾ ཨཱཔཏྟིཡཱ ཨདསྶནེ ཨུཀྑེཔནཱིཡཀམྨཾ ཀརོམཱ’’ཏི། ཏེ ཏསྶ ཨཱཔཏྟིཡཱ ཨདསྶནེ ཨུཀྑེཔནཱིཡཀམྨཾ ཀརོནྟི – ཨདྷམྨེན ཝགྒཱ…པེ॰… ཨདྷམྨེན སམགྒཱ… དྷམྨེན ཝགྒཱ… དྷམྨཔཏིརཱུཔཀེན ཝགྒཱ… དྷམྨཔཏིརཱུཔཀེན སམགྒཱ། ཏཏྲཊྛོ སངྒྷོ ཝིཝདཏི – ‘‘ཨདྷམྨེན ཝགྒཀམྨཾ, ཨདྷམྨེན སམགྒཀམྨཾ, དྷམྨེན ཝགྒཀམྨཾ, དྷམྨཔཏིརཱུཔཀེན ཝགྒཀམྨཾ, དྷམྨཔཏིརཱུཔཀེན སམགྒཀམྨཾ, ཨཀཏཾ ཀམྨཾ དུཀྐཊཾ ཀམྨཾ པུན ཀཱཏབྦཾ ཀམྨ’’ནྟི། ཏཏྲ, བྷིཀྑཝེ, ཡེ ཏེ བྷིཀྑཱུ ཨེཝམཱཧཾསུ – ‘‘དྷམྨཔཏིརཱུཔཀེན སམགྒཀམྨ’’ནྟི, ཡེ ཙ ཏེ བྷིཀྑཱུ ཨེཝམཱཧཾསུ – ‘‘ཨཀཏཾ ཀམྨཾ དུཀྐཊཾ ཀམྨཾ པུན ཀཱཏབྦཾ ཀམྨ’’ནྟི, ཨིམེ ཏཏྠ བྷིཀྑཱུ དྷམྨཝཱདིནོ། ཨིམེ པཉྩ ཝཱརཱ སཾཁིཏྟཱ།
437. Idha pana, bhikkhave, bhikkhu āpattiṃ āpajjitvā na icchati āpattiṃ passituṃ. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu āpattiṃ āpajjitvā na icchati āpattiṃ passituṃ. Handassa mayaṃ āpattiyā adassane ukkhepanīyakammaṃ karomā’’ti. Te tassa āpattiyā adassane ukkhepanīyakammaṃ karonti – adhammena vaggā…pe… adhammena samaggā… dhammena vaggā… dhammapatirūpakena vaggā… dhammapatirūpakena samaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘dhammapatirūpakena samaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino. Ime pañca vārā saṃkhittā.
ཨདསྶནེ ཨུཀྑེཔནཱིཡཀམྨཝིཝཱདཀཐཱ ནིཊྛིཏཱ།
Adassane ukkhepanīyakammavivādakathā niṭṭhitā.
