| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༢༦༡. ཨཔྤཊིཀམྨེ ཨུཀྑེཔནཱིཡཀམྨཝིཝཱདཀཐཱ
261. Appaṭikamme ukkhepanīyakammavivādakathā
༤༣༨. ཨིདྷ པན, བྷིཀྑཝེ, བྷིཀྑུ ཨཱཔཏྟིཾ ཨཱཔཛྫིཏྭཱ ན ཨིཙྪཏི ཨཱཔཏྟིཾ པཊིཀཱཏུཾ། ཏཏྲ ཙེ བྷིཀྑཱུནཾ ཨེཝཾ ཧོཏི – ‘‘ཨཡཾ ཁོ, ཨཱཝུསོ, བྷིཀྑུ ཨཱཔཏྟིཾ ཨཱཔཛྫིཏྭཱ ན ཨིཙྪཏི ཨཱཔཏྟིཾ པཊིཀཱཏུཾ། ཧནྡསྶ མཡཾ ཨཱཔཏྟིཡཱ ཨཔྤཊིཀམྨེ ཨུཀྑེཔནཱིཡཀམྨཾ ཀརོམཱ’’ཏི། ཏེ ཏསྶ ཨཱཔཏྟིཡཱ ཨཔྤཊིཀམྨེ ཨུཀྑེཔནཱིཡཀམྨཾ ཀརོནྟི – ཨདྷམྨེན ཝགྒཱ…པེ॰… ཨདྷམྨེན སམགྒཱ… དྷམྨེན ཝགྒཱ… དྷམྨཔཏིརཱུཔཀེན ཝགྒཱ… དྷམྨཔཏིརཱུཔཀེན སམགྒཱ། ཏཏྲཊྛོ སངྒྷོ ཝིཝདཏི – ‘‘ཨདྷམྨེན ཝགྒཀམྨཾ, ཨདྷམྨེན སམགྒཀམྨཾ, དྷམྨེན ཝགྒཀམྨཾ, དྷམྨཔཏིརཱུཔཀེན ཝགྒཀམྨཾ, དྷམྨཔཏིརཱུཔཀེན སམགྒཀམྨཾ, ཨཀཏཾ ཀམྨཾ དུཀྐཊཾ ཀམྨཾ པུན ཀཱཏབྦཾ ཀམྨ’’ནྟི། ཏཏྲ, བྷིཀྑཝེ, ཡེ ཏེ བྷིཀྑཱུ ཨེཝམཱཧཾསུ – ‘‘དྷམྨཔཏིརཱུཔཀེན སམགྒཀམྨ’’ནྟི; ཡེ ཙ ཏེ བྷིཀྑཱུ ཨེཝམཱཧཾསུ – ‘‘ཨཀཏཾ ཀམྨཾ དུཀྐཊཾ ཀམྨཾ པུན ཀཱཏབྦཾ ཀམྨ’’ནྟི, ཨིམེ ཏཏྠ བྷིཀྑཱུ དྷམྨཝཱདིནོ། ཨིམེ པཉྩ ཝཱརཱ སཾཁིཏྟཱ།
438. Idha pana, bhikkhave, bhikkhu āpattiṃ āpajjitvā na icchati āpattiṃ paṭikātuṃ. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu āpattiṃ āpajjitvā na icchati āpattiṃ paṭikātuṃ. Handassa mayaṃ āpattiyā appaṭikamme ukkhepanīyakammaṃ karomā’’ti. Te tassa āpattiyā appaṭikamme ukkhepanīyakammaṃ karonti – adhammena vaggā…pe… adhammena samaggā… dhammena vaggā… dhammapatirūpakena vaggā… dhammapatirūpakena samaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘dhammapatirūpakena samaggakamma’’nti; ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino. Ime pañca vārā saṃkhittā.
ཨཔྤཊིཀམྨེ ཨུཀྑེཔནཱིཡཀམྨཝིཝཱདཀཐཱ ནིཊྛིཏཱ།
Appaṭikamme ukkhepanīyakammavivādakathā niṭṭhitā.
