| Library / Tipiṭaka / திபிடக • Tipiṭaka / அபதா³னபாளி • Apadānapāḷi |
3-4. அனுருத்³த⁴த்தே²ரஅபதா³னங்
3-4. Anuruddhattheraapadānaṃ
421.
421.
‘‘ஸுமேத⁴ங் ப⁴க³வந்தாஹங், லோகஜெட்ட²ங் நராஸப⁴ங்;
‘‘Sumedhaṃ bhagavantāhaṃ, lokajeṭṭhaṃ narāsabhaṃ;
வூபகட்ட²ங் விஹரந்தங், அத்³த³ஸங் லோகனாயகங்.
Vūpakaṭṭhaṃ viharantaṃ, addasaṃ lokanāyakaṃ.
422.
422.
‘‘உபக³ந்த்வான ஸம்பு³த்³த⁴ங், ஸுமேத⁴ங் லோகனாயகங்;
‘‘Upagantvāna sambuddhaṃ, sumedhaṃ lokanāyakaṃ;
அஞ்ஜலிங் பக்³க³ஹெத்வான, பு³த்³த⁴ஸெட்ட²மயாசஹங்.
Añjaliṃ paggahetvāna, buddhaseṭṭhamayācahaṃ.
423.
423.
‘‘அனுகம்ப மஹாவீர, லோகஜெட்ட² நராஸப⁴;
‘‘Anukampa mahāvīra, lokajeṭṭha narāsabha;
பதீ³பங் தே பத³ஸ்ஸாமி, ருக்க²மூலம்ஹி ஜா²யதோ.
Padīpaṃ te padassāmi, rukkhamūlamhi jhāyato.
424.
424.
‘‘அதி⁴வாஸேஸி ஸோ தீ⁴ரோ, ஸயம்பூ⁴ வத³தங் வரோ;
‘‘Adhivāsesi so dhīro, sayambhū vadataṃ varo;
து³மேஸு வினிவிஜ்ஜி²த்வா, யந்தங் யோஜியஹங் ததா³.
Dumesu vinivijjhitvā, yantaṃ yojiyahaṃ tadā.
425.
425.
‘‘ஸஹஸ்ஸவட்டிங் பாதா³ஸிங், பு³த்³த⁴ஸ்ஸ லோகப³ந்து⁴னோ;
‘‘Sahassavaṭṭiṃ pādāsiṃ, buddhassa lokabandhuno;
ஸத்தாஹங் பஜ்ஜலித்வான, தீ³பா வூபஸமிங்ஸு மே.
Sattāhaṃ pajjalitvāna, dīpā vūpasamiṃsu me.
426.
426.
‘‘தேன சித்தப்பஸாதே³ன, சேதனாபணிதீ⁴ஹி ச;
‘‘Tena cittappasādena, cetanāpaṇidhīhi ca;
ஜஹித்வா மானுஸங் தே³ஹங், விமானமுபபஜ்ஜஹங்.
Jahitvā mānusaṃ dehaṃ, vimānamupapajjahaṃ.
427.
427.
‘‘உபபன்னஸ்ஸ தே³வத்தங், ப்³யம்ஹங் ஆஸி ஸுனிம்மிதங்;
‘‘Upapannassa devattaṃ, byamhaṃ āsi sunimmitaṃ;
ஸமந்ததோ பஜ்ஜலதி, தீ³பதா³னஸ்ஸித³ங் ப²லங்.
Samantato pajjalati, dīpadānassidaṃ phalaṃ.
428.
428.
‘‘ஸமந்தா யோஜனஸதங், விரோசேஸிமஹங் ததா³;
‘‘Samantā yojanasataṃ, virocesimahaṃ tadā;
ஸப்³பே³ தே³வே அபி⁴போ⁴மி, தீ³பதா³னஸ்ஸித³ங் ப²லங்.
Sabbe deve abhibhomi, dīpadānassidaṃ phalaṃ.
429.
429.
‘‘திங்ஸகப்பானி தே³விந்தோ³, தே³வரஜ்ஜமகாரயிங்;
‘‘Tiṃsakappāni devindo, devarajjamakārayiṃ;
ந மங் கேசீதிமஞ்ஞந்தி, தீ³பதா³னஸ்ஸித³ங் ப²லங்.
Na maṃ kecītimaññanti, dīpadānassidaṃ phalaṃ.
430.
430.
‘‘அட்ட²வீஸதிக்க²த்துஞ்ச, சக்கவத்தீ அஹோஸஹங்;
‘‘Aṭṭhavīsatikkhattuñca, cakkavattī ahosahaṃ;
தி³வா ரத்திஞ்ச பஸ்ஸாமி, ஸமந்தா யோஜனங் ததா³.
Divā rattiñca passāmi, samantā yojanaṃ tadā.
431.
431.
‘‘ஸஹஸ்ஸலோகங் ஞாணேன, பஸ்ஸாமி ஸத்து² ஸாஸனே;
‘‘Sahassalokaṃ ñāṇena, passāmi satthu sāsane;
தி³ப்³ப³சக்கு²மனுப்பத்தோ, தீ³பதா³னஸ்ஸித³ங் ப²லங்.
Dibbacakkhumanuppatto, dīpadānassidaṃ phalaṃ.
432.
432.
‘‘ஸுமேதோ⁴ நாம ஸம்பு³த்³தோ⁴, திங்ஸகப்பஸஹஸ்ஸிதோ;
‘‘Sumedho nāma sambuddho, tiṃsakappasahassito;
தஸ்ஸ தீ³போ மயா தி³ன்னோ, விப்பஸன்னேன சேதஸா.
Tassa dīpo mayā dinno, vippasannena cetasā.
433.
433.
‘‘படிஸம்பி⁴தா³ சதஸ்ஸோ, விமொக்கா²பி ச அட்டி²மே;
‘‘Paṭisambhidā catasso, vimokkhāpi ca aṭṭhime;
ச²ளபி⁴ஞ்ஞா ஸச்சி²கதா, கதங் பு³த்³த⁴ஸ்ஸ ஸாஸனங்’’.
Chaḷabhiññā sacchikatā, kataṃ buddhassa sāsanaṃ’’.
இத்த²ங் ஸுத³ங் ஆயஸ்மா அனுருத்³தோ⁴ தே²ரோ இமா கா³தா²யோ அபா⁴ஸித்தா²தி.
Itthaṃ sudaṃ āyasmā anuruddho thero imā gāthāyo abhāsitthāti.
அனுருத்³த⁴த்தே²ரஸ்ஸாபதா³னங் சதுத்த²ங்.
Anuruddhattherassāpadānaṃ catutthaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / அபதா³ன-அட்ட²கதா² • Apadāna-aṭṭhakathā / 3-4. அனுருத்³த⁴த்தே²ரஅபதா³னவண்ணனா • 3-4. Anuruddhattheraapadānavaṇṇanā
