3-5. புண்ணமந்தாணிபுத்தத்தே²ரஅபதா³னங்

434.

‘‘அஜ்ஜா²யகோ மந்தத⁴ரோ, திண்ணங் வேதா³ன பாரகூ³;

புரக்க²தொம்ஹி ஸிஸ்ஸேஹி, உபக³ச்சி²ங் நருத்தமங்.

435.

‘‘பது³முத்தரோ லோகவிதூ³, ஆஹுதீனங் படிக்³க³ஹோ;

மம கம்மங் பகித்தேஸி, ஸங்கி²த்தேன மஹாமுனி.

436.

‘‘தாஹங் த⁴ம்மங் ஸுணித்வான, அபி⁴வாதெ³த்வான ஸத்து²னோ;

அஞ்ஜலிங் பக்³க³ஹெத்வான, பக்கமிங் ¹ த³க்கி²ணாமுகோ².

437.

‘‘ஸங்கி²த்தேன ஸுணித்வான, வித்தா²ரேன அபா⁴ஸயிங் ³;

ஸப்³பே³ ஸிஸ்ஸா அத்தமனா, ஸுத்வான மம பா⁴ஸதோ;

ஸகங் தி³ட்டி²ங் வினோதெ³த்வா, பு³த்³தே⁴ சித்தங் பஸாத³யுங்.

438.

‘‘ஸங்கி²த்தேனபி தே³ஸேமி, வித்தா²ரேன ததே²வஹங் ⁵;

அபி⁴த⁴ம்மனயஞ்ஞூஹங் , கதா²வத்து²விஸுத்³தி⁴யா;

ஸப்³பே³ஸங் விஞ்ஞாபெத்வான, விஹராமி அனாஸவோ.

439.

‘‘இதோ பஞ்சஸதே கப்பே, சதுரோ ஸுப்பகாஸகா;

ஸத்தரதனஸம்பன்னா, சதுதீ³பம்ஹி இஸ்ஸரா.

440.

‘‘படிஸம்பி⁴தா³ சதஸ்ஸோ, விமொக்கா²பி ச அட்டி²மே;

ச²ளபி⁴ஞ்ஞா ஸச்சி²கதா, கதங் பு³த்³த⁴ஸ்ஸ ஸாஸனங்’’.

இத்த²ங் ஸுத³ங் ஆயஸ்மா புண்ணோ மந்தாணிபுத்தோ தே²ரோ இமா கா³தா²யோ அபா⁴ஸித்தா²தி.

புண்ணமந்தாணிபுத்தத்தே²ரஸ்ஸாபதா³னங் பஞ்சமங்.