| Library / Tipiṭaka / திபிடக • Tipiṭaka / நெத்திவிபா⁴வினீ • Nettivibhāvinī |
3. யுத்திஹாரஸம்பாதவிபா⁴வனா
3. Yuttihārasampātavibhāvanā
65. யேன யேன விசயஹாரஸம்பாதேன ஸுத்தப்பதே³ஸத்தா² ஆசரியேன விசயிதப்³பா³, அம்ஹேஹி ச ஞாதா, ஸோ விசயஹாரஸம்பாதோ பரிபுண்ணோ, ‘‘கதமோ யுத்திஹாரஸம்பாதோ’’தி புச்சி²தப்³ப³த்தா ‘‘தத்த² கதமோ யுத்திஹாரஸம்பாதோ’’திஆதி³ வுத்தங். அட்ட²கதா²யங் பன – ‘‘ஏவங் நானானயேஹி விசயஹாரஸம்பாதங் வித்தா²ரெத்வா இதா³னி யுத்திஹாரஸம்பாதாதீ³னி த³ஸ்ஸேதுங் ‘தத்த² கதமோ யுத்திஹாரஸம்பாதோ’திஆதி³ ஆரத்³த⁴’’ந்தி (நெத்தி॰ அட்ட²॰ 65) வுத்தங். தத்தா²தி தேஸு தே³ஸனாஹாரஸம்பாதாதீ³ஸு ஸோளஸஸு ஹாரஸம்பாதேஸு கதமோ ஸங்வண்ணனாவிஸேஸோ யுத்திஹாரஸம்பாதோ நாமாதி புச்ச²தி, புச்சி²த்வா யஸ்மிங் ஸுத்தப்பதே³ஸே வுத்தானங் அத்தா²னங் யுத்திபா⁴வோ விசாரேதப்³போ³, தங் ஸுத்தப்பதே³ஸங் நீஹரிதுங் –
65. Yena yena vicayahārasampātena suttappadesatthā ācariyena vicayitabbā, amhehi ca ñātā, so vicayahārasampāto paripuṇṇo, ‘‘katamo yuttihārasampāto’’ti pucchitabbattā ‘‘tattha katamo yuttihārasampāto’’tiādi vuttaṃ. Aṭṭhakathāyaṃ pana – ‘‘evaṃ nānānayehi vicayahārasampātaṃ vitthāretvā idāni yuttihārasampātādīni dassetuṃ ‘tattha katamo yuttihārasampāto’tiādi āraddha’’nti (netti. aṭṭha. 65) vuttaṃ. Tatthāti tesu desanāhārasampātādīsu soḷasasu hārasampātesu katamo saṃvaṇṇanāviseso yuttihārasampāto nāmāti pucchati, pucchitvā yasmiṃ suttappadese vuttānaṃ atthānaṃ yuttibhāvo vicāretabbo, taṃ suttappadesaṃ nīharituṃ –
‘‘தஸ்மா ரக்கி²தசித்தஸ்ஸ, ஸம்மாஸங்கப்பகோ³சரோ;
‘‘Tasmā rakkhitacittassa, sammāsaṅkappagocaro;
ஸம்மாதி³ட்டி²புரெக்கா²ரோ, ஞத்வான உத³யப்³ப³யங்;
Sammādiṭṭhipurekkhāro, ñatvāna udayabbayaṃ;
தி²னமித்³தா⁴பி⁴பூ⁴ பி⁴க்கு², ஸப்³பா³ து³க்³க³தியோ ஜஹே’’தி. (உதா³॰ 32; நெத்தி॰ 31, 78) –
Thinamiddhābhibhū bhikkhu, sabbā duggatiyo jahe’’ti. (udā. 32; netti. 31, 78) –
வுத்தங். தஸ்ஸங் கா³தா²யங் தஸ்மா அரக்கி²தசித்தஸ்ஸ மாரவஸானுக³தத்தா ஸதிஸங்வரஇந்த்³ரியஸங்வராதி³வஸேன பி⁴க்கு² ரக்கி²தசித்தோ அஸ்ஸ ப⁴வெய்ய, தஸ்மா காமவிதக்காதி³மிச்சா²ஸங்கப்பகோ³சரஸ்ஸ மாரவஸானுக³தத்தா நெக்க²ம்மஸங்கப்பாதி³வஸேன பி⁴க்கு² ஸம்மாஸங்கப்பகோ³சரோ அஸ்ஸ ப⁴வெய்ய, தஸ்மா மிச்சா²தி³ட்டி²ஹதசித்தஸ்ஸ மாரவஸானுக³தத்தா யோனிஸோமனஸிகாரேன பி⁴க்கு² உத³யப்³ப³யங் ஞத்வான ஸம்மாதி³ட்டி²புரெக்கா²ரோ அஸ்ஸ ப⁴வெய்ய, தஸ்மா தி²னமித்³தே⁴ன ஹதசித்தஸ்ஸ மாரவஸானுக³தத்தா வீரியவஸேன பி⁴க்கு² தி²னமித்³தா⁴பி⁴பூ⁴ அஸ்ஸ ப⁴வெய்ய, தாதி³ஸோ பி⁴க்கு² ஸப்³பா³ து³க்³க³தியோ ஜஹே ஜஹிஸ்ஸதீதி அத்தோ² வேதி³தப்³போ³.
Vuttaṃ. Tassaṃ gāthāyaṃ tasmā arakkhitacittassa māravasānugatattā satisaṃvaraindriyasaṃvarādivasena bhikkhu rakkhitacitto assa bhaveyya, tasmā kāmavitakkādimicchāsaṅkappagocarassa māravasānugatattā nekkhammasaṅkappādivasena bhikkhu sammāsaṅkappagocaro assa bhaveyya, tasmā micchādiṭṭhihatacittassa māravasānugatattā yonisomanasikārena bhikkhu udayabbayaṃ ñatvāna sammādiṭṭhipurekkhāro assa bhaveyya, tasmā thinamiddhena hatacittassa māravasānugatattā vīriyavasena bhikkhu thinamiddhābhibhū assa bhaveyya, tādiso bhikkhu sabbā duggatiyo jahe jahissatīti attho veditabbo.
‘‘தஸ்ஸங் கா³தா²யங் கத²ங் யுத்திபா⁴வோ விசாரேதப்³போ³’’தி வத்தப்³ப³த்தா ‘‘தஸ்மா ரக்கி²தசித்தஸ்ஸா’’திஆதி³ வுத்தங். ரக்கி²தசித்தஸ்ஸ ஸம்மாஸங்கப்பகோ³சரோ ப⁴விஸ்ஸதீதி அத்தோ² யுஜ்ஜதி ஏவ, நோ ந யுஜ்ஜதி. மிச்சா²ஸங்கப்பானம்பி ஜஹிதத்தா ஸம்மாதி³ட்டி²புரெக்கா²ரோ ஹுத்வா விஹரந்தோ உத³யப்³ப³யங் படிவிஜ்ஜி²ஸ்ஸதீதி அத்தோ² யுஜ்ஜதி ஸம்மாதி³ட்டி²புரெக்கா²ரஸ்ஸ உத³யப்³ப³யானுபஸ்ஸனாஸம்ப⁴வதோ. உத³யப்³ப³யங் படிவிஜ்ஜ²ந்தோ ஸப்³பா³ து³க்³க³தியோ ஜஹிஸ்ஸதீதி அத்தோ² யுஜ்ஜதி உத³யப்³ப³யானுபஸ்ஸனானுக்கமேன அரியமக்³க³ஸம்ப⁴வதோ. ஸப்³பா³ து³க்³க³தியோ ஜஹந்தோ ஸப்³பா³னி து³க்³க³திவினிபாதப⁴யானி ஸமதிக்கமிஸ்ஸதீதி அத்தோ² யுஜ்ஜதி ஸப்³பே³ஸங் து³க்³க³திவினிபாதப⁴யானங் அனுப்பஜ்ஜனதோ.
‘‘Tassaṃ gāthāyaṃ kathaṃ yuttibhāvo vicāretabbo’’ti vattabbattā ‘‘tasmā rakkhitacittassā’’tiādi vuttaṃ. Rakkhitacittassa sammāsaṅkappagocaro bhavissatīti attho yujjati eva, no na yujjati. Micchāsaṅkappānampi jahitattā sammādiṭṭhipurekkhāro hutvā viharanto udayabbayaṃ paṭivijjhissatīti attho yujjati sammādiṭṭhipurekkhārassa udayabbayānupassanāsambhavato. Udayabbayaṃ paṭivijjhanto sabbā duggatiyo jahissatīti attho yujjati udayabbayānupassanānukkamena ariyamaggasambhavato. Sabbā duggatiyo jahanto sabbāni duggativinipātabhayāni samatikkamissatīti attho yujjati sabbesaṃ duggativinipātabhayānaṃ anuppajjanato.
‘‘எத்தகோவ யுத்திஹாரஸம்பாதோ பரிபுண்ணோ’’தி வத்தப்³ப³த்தா ‘‘நியுத்தோ யுத்திஹாரஸம்பாதோ’’தி வுத்தங். யேன யேன ஸங்வண்ணனாவிஸேஸபூ⁴தேன யுத்திஹாரஸம்பாதேன ஸுத்தப்பதே³ஸத்தா²னங் யுத்திபா⁴வோ விசாரேதப்³போ³ , ஸோ ஸோ ஸங்வண்ணனாவிஸேஸபூ⁴தோ யுத்திஹாரஸம்பாதோ நியுத்தோ யதா²ரஹங் நித்³தா⁴ரெத்வா யுஜ்ஜிதப்³போ³தி அத்தோ² க³ஹேதப்³போ³தி.
‘‘Ettakova yuttihārasampāto paripuṇṇo’’ti vattabbattā ‘‘niyutto yuttihārasampāto’’ti vuttaṃ. Yena yena saṃvaṇṇanāvisesabhūtena yuttihārasampātena suttappadesatthānaṃ yuttibhāvo vicāretabbo , so so saṃvaṇṇanāvisesabhūto yuttihārasampāto niyutto yathārahaṃ niddhāretvā yujjitabboti attho gahetabboti.
இதி யுத்திஹாரஸம்பாதே ஸத்திப³லானுரூபா ரசிதா
Iti yuttihārasampāte sattibalānurūpā racitā
விபா⁴வனா நிட்டி²தா.
Vibhāvanā niṭṭhitā.
பண்டி³தேஹி பன…பே॰… க³ஹேதப்³போ³தி.
Paṇḍitehi pana…pe… gahetabboti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / 3. யுத்திஹாரஸம்பாதோ • 3. Yuttihārasampāto
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / நெத்திப்பகரண-அட்ட²கதா² • Nettippakaraṇa-aṭṭhakathā / 3. யுத்திஹாரஸம்பாதவண்ணனா • 3. Yuttihārasampātavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திப்பகரண-டீகா • Nettippakaraṇa-ṭīkā / 3. யுத்திஹாரஸம்பாதவண்ணனா • 3. Yuttihārasampātavaṇṇanā
