| Library / Tipiṭaka / திபிடக • Tipiṭaka / சரியாபிடகபாளி • Cariyāpiṭakapāḷi |
3. யுத⁴ஞ்ஜயவக்³கோ³
3. Yudhañjayavaggo
1. யுத⁴ஞ்ஜயசரியா
1. Yudhañjayacariyā
1.
1.
‘‘யதா³ஹங் அமிதயஸோ, ராஜபுத்தோ யுத⁴ஞ்ஜயோ;
‘‘Yadāhaṃ amitayaso, rājaputto yudhañjayo;
உஸ்ஸாவபி³ந்து³ங் ஸூரியாதபே, பதிதங் தி³ஸ்வான ஸங்விஜிங்.
Ussāvabinduṃ sūriyātape, patitaṃ disvāna saṃvijiṃ.
2.
2.
‘‘தஞ்ஞேவாதி⁴பதிங் கத்வா, ஸங்வேக³மனுப்³ரூஹயிங்;
‘‘Taññevādhipatiṃ katvā, saṃvegamanubrūhayiṃ;
மாதாபிதூ ச வந்தி³த்வா, பப்³ப³ஜ்ஜமனுயாசஹங்.
Mātāpitū ca vanditvā, pabbajjamanuyācahaṃ.
3.
3.
‘‘யாசந்தி மங் பஞ்ஜலிகா, ஸனேக³மா ஸரட்ட²கா;
‘‘Yācanti maṃ pañjalikā, sanegamā saraṭṭhakā;
‘அஜ்ஜேவ புத்த படிபஜ்ஜ, இத்³த⁴ங் பீ²தங் மஹாமஹிங்’.
‘Ajjeva putta paṭipajja, iddhaṃ phītaṃ mahāmahiṃ’.
4.
4.
‘‘ஸராஜகே ஸஹோரோதே⁴, ஸனேக³மே ஸரட்ட²கே;
‘‘Sarājake sahorodhe, sanegame saraṭṭhake;
கருணங் பரிதே³வந்தே, அனபெக்கோ²வ பரிச்சஜிங்.
Karuṇaṃ paridevante, anapekkhova pariccajiṃ.
5.
5.
‘‘கேவலங் பத²விங் ரஜ்ஜங், ஞாதிபரிஜனங் யஸங்;
‘‘Kevalaṃ pathaviṃ rajjaṃ, ñātiparijanaṃ yasaṃ;
சஜமானோ ந சிந்தேஸிங், போ³தி⁴யாயேவ காரணா.
Cajamāno na cintesiṃ, bodhiyāyeva kāraṇā.
6.
6.
‘‘மாதாபிதா ந மே தெ³ஸ்ஸா, நபி மே தெ³ஸ்ஸங் மஹாயஸங்;
‘‘Mātāpitā na me dessā, napi me dessaṃ mahāyasaṃ;
ஸப்³ப³ஞ்ஞுதங் பியங் மய்ஹங், தஸ்மா ரஜ்ஜங் பரிச்சஜி’’ந்தி.
Sabbaññutaṃ piyaṃ mayhaṃ, tasmā rajjaṃ pariccaji’’nti.
யுத⁴ஞ்ஜயசரியங் பட²மங்.
Yudhañjayacariyaṃ paṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / சரியாபிடக-அட்ட²கதா² • Cariyāpiṭaka-aṭṭhakathā / 1. யுத⁴ஞ்ஜயசரியாவண்ணனா • 1. Yudhañjayacariyāvaṇṇanā
