Yogakundalini Upanishad

yogakuṇḍalinyupaniṣat

yogakuṇḍalyupaniṣadyogasiddhihṛdāsanam ।
nirviśeṣabrahmatattvaṃ svamātramiti cintaye ॥

oṃ saha nāvavatu saha nau bhunaktu saha vīryaṃ karavāvahai ।
tejasvināvadhītamastu mā vidviṣāvahai ॥

oṃ śāntiḥ śāntiḥ śāntiḥ ॥

hariḥ oṃ ॥ hetudvayaṃ hi cittasya vāsanā ca samīraṇaḥ ।
tayorvinaṣṭa ekasmiṃstaddvāvapi vinaśyataḥ ॥ 1॥

tayorādau samīrasya jayaṃ kuryānnaraḥ sadā ।
mitāhāraścāsanaṃ ca śaktiścālastṛtīyakaḥ ॥ 2॥

eteṣāṃ lakṣaṇaṃ vakṣye śṛṇu gautama sādaram ।
susnigdhamadhurāhāraścaturthāṃśavivarjitaḥ ॥ 3॥

bhujyate śivasamprītyai mitāhāraḥ sa ucyate ।
āsanaṃ dvividhaṃ proktaṃ padmaṃ vajrāsanaṃ tathā ॥ 4॥

ūrvorupari ceddhatte ubhe pādatale yathā ।
padmāsanaṃ bhavedetatsarvapāpapraṇāśanam ॥ 5॥

vāmāṅghrimūlakandādho hyanyaṃ tadupari kṣipet ।
samagrīvaśiraḥkāyo vajrāsanamitīritam ॥ 6॥

kuṇḍalyeva bhavecchaktistāṃ tu sañcālayedbudhaḥ ।
svasthānādābhruvormadhyaṃ śakticālanamucyate ॥ 7॥

tatsādhane dvayaṃ mukhyaṃ sarasvatyāstu cālanam ।
prāṇarodhamathābhyāsādṛjvī kuṇḍalinī bhavet ॥ 8॥

tayorādau sarasvatyāścālanaṃ kathayāmi te ।
arundhatyeva kathitā purāvidbhiḥ sarasvatī ॥ 9॥

yasyāḥ sañcālanenaiva svayaṃ calati kuṇḍalī ।
iḍāyāṃ vahati prāṇe baddhvā padmāsanaṃ dṛḍham ॥ 10॥

dvādaśāṅguladairghyaṃ ca ambaraṃ caturaṅgulam ।
vistīrya tena tannāḍīṃ veṣṭayitvā tataḥ sudhīḥ ॥ 11॥

aṅguṣṭhatarjanībhyāṃ tu hastābhyāṃ dhārayeddhṛḍham ।
svaśaktyā cālayedvāme dakṣiṇena punaḥpunaḥ ॥ 12॥

muhūrtadvayaparyantaṃ nirbhayāccālayetsudhīḥ ।
ūrdhvamākarṣayetkiñcitsuṣumnāṃ kuṇḍalīgatām ॥ 13॥

tena kuṇḍalinī tasyāḥ suṣumnāyā mukhaṃ vrajet ।
jahāti tasmātprāṇo'yaṃ suṣumnāṃ vrajati svataḥ ॥ 14॥

tunde tu tānaṃ kuryācca kaṇṭhasaṅkocane kṛte ।
sarasvatyāṃ cālanena vakṣasaścordhvago marut ॥ 15॥

sūryeṇa recayedvāyuṃ sarasvatyāstu cālane ।
kaṇṭhasaṅkocanaṃ kṛtvā vakṣasaścordhvago marut ॥ 16॥

tasmātsañcālayennityaṃ śabdagarbhāṃ sarasvatīm ।
yasyāḥ sañcālanenaiva yogī rogaiḥ pramucyate ॥ 17॥

gulmaṃ jalodaraḥ plīhā ye cānye tundamadhyagāḥ ।
sarve te śakticālena rogā naśyanti niścayam ॥ 18॥

prāṇarodhamathedānīṃ pravakṣyāmi samāsataḥ ।
prāṇaśca dahano vāyurāyāmaḥ kumbhakaḥ smṛtaḥ ॥ 19॥

sa eva dvividhaḥ proktaḥ sahitaḥ kevalastathā ।
yāvatkevalasiddhiḥ syāttāvatsahitamabhyaset ॥ 20॥

sūryojjāyī śītalī ca bhastrī caiva caturthikā ।
bhedaireva samaṃ kumbho yaḥ syātsahitakumbhakaḥ ॥ 21॥

pavitre nirjane deśe śarkarādivivarjite ।
dhanuḥpramāṇaparyante śītāgnijalavarjite ॥ 22॥

pavitre nātyuccanīce hyāsane sukhade sukhe ।
baddhapadmāsanaṃ kṛtvā sarasvatyāstu cālanam ॥ 23॥

dakṣanāḍyā samākṛṣya bahiṣṭhaṃ pavanaṃ śanaiḥ ।
yatheṣṭaṃ pūrayedvāyuṃ recayediḍayā tataḥ ॥ 24॥

kapālaśodhane vāpi recayetpavanaṃ śanaiḥ ।
catuṣkaṃ vātadoṣaṃ tu kṛmidoṣaṃ nihanti ca ॥ 25॥

punaḥ punaridaṃ kāryaṃ sūryabhedamudāhṛtam ।
mukhaṃ saṃyamya nāḍibhyāmākṛṣya pavanaṃ śanaiḥ ॥ 26॥

yathā lagati kaṇṭhāttu hṛdayāvadhi sasvanam ।
pūrvavatkumbhayetprāṇaṃ recayediḍayā tataḥ ॥ 27॥

śīrṣoditānalaharaṃ galaśleṣmaharaṃ param ।
sarvarogaharaṃ puṇyaṃ dehānalavivardhanam ॥ 28॥

nāḍījalodaraṃ dhātugatadoṣavināśanam ।
gacchatastiṣṭhataḥ kāryamujjāyyākhyaṃ tu kumbhakam ॥ 29॥

jihvayā vāyumākṛṣya pūrvavatkumbhakādanu ।
śanaistu ghrāṇarandhrābhyāṃ recayedanilaṃ sudhīḥ ॥ 30॥

gulmaplīhādikāndoṣānkṣayaṃ pittaṃ jvaraṃ tṛṣām ।
viṣāṇi śītalī nāma kumbhako'yaṃ nihanti ca ॥ 31॥

tataḥ padmāsanaṃ baddhvā samagrīvodaraḥ sudhīḥ ।
mukhaṃ saṃyamya yatnena prāṇaṃ ghrāṇena recayet ॥ 32॥

yathā lagati kaṇṭhāttu kapāle sasvanaṃ tataḥ ।
vegena pūrayetkiñcidhṛtpadmāvadhi mārutam ॥ 33॥

punarvirecayettadvatpūrayecca punaḥ punaḥ ।
yathaiva lohakārāṇāṃ bhastrā vegena cālyate ॥ 34॥

tathaiva svaśarīrasthaṃ cālayetpavanaṃ śanaiḥ ।
yathā śramo bhaveddehe tathā sūryeṇa pūrayet ॥ 35॥

yathodaraṃ bhavetpūrṇaṃ pavanena tathā laghu ।
dhārayannāsikāmadhyaṃ tarjanībhyāṃ vinā dṛḍham ॥ 36॥

kumbhakaṃ pūrvavatkṛtvā receyediḍayānilam ।
kaṇṭhotthitānalaharaṃ śarīrāgnivivardhanam ॥ 37॥

kuṇḍalībodhakaṃ puṇyaṃ pāpaghnaṃ śubhadaṃ sukham ।
brahmanāḍīmukhāntasthakaphādyargalanāśanam ॥ 38॥

guṇatrayasamudbhūtagranthitrayavibhedakam ।
viśeṣeṇaiva kartavyaṃ bhastrākhyaṃ kumbhakaṃ tvidam ॥ 39॥

caturṇāmapi bhedānāṃ kumbhake samupasthite ।
bandhatrayamidaṃ kāryaṃ yogibhirvītakalmaṣaiḥ ॥ 40॥

prathamo mūlabandhastu dvitīyoḍḍīyaṇābhidhaḥ ।
jālandharastṛtīyastu teṣāṃ lakṣaṇamucyate ॥ 41॥

adhogatimapānaṃ vai ūrdhvagaṃ kurute balāt ।
ākuñcanena taṃ prāhurmūlabandho'yamucyate ॥ 42॥

apāne cordhvage yāte samprāpte vahnimaṇḍale ।
tato'nalaśikhā dīrghā vardhate vāyunā''hatā ॥ 43॥

tato yātau vahnyapānau prāṇamuṣṇasvarūpakam ।
tenātyantapradīptena jvalano dehajastathā ॥ 44॥

tena kuṇḍalinī suptā santaptā samprabudhyate ।
daṇḍāhatabhujaṅgīva niḥśvasya ṛjutāṃ vrajet ॥ 45॥

bilapraveśato yatra brahmanāḍyantaraṃ vrajet ।
tasmānnityaṃ mūlabandhaḥ kartavyo yogibhiḥ sadā ॥ 46॥

kumbhakānte recakādau kartavyastūḍḍiyāṇakaḥ ।
bandho yena suṣumnāyāṃ prāṇastūḍḍīyate yataḥ ॥ 47॥

tasmāduḍḍīyaṇākhyo'yaṃ yogibhiḥ samudāhṛtaḥ ।
sati vajrāsane pādau karābhyāṃ dhārayeddṛḍham ॥ 48॥

gulphadeśasamīpe ca kandaṃ tatra prapīḍayet ।
paścimaṃ tānamudare dhārayed-hṛdaye gale ॥ 49॥

śanaiḥ śanairyadā prāṇastundasandhiṃ nigacchati ।
tundadoṣaṃ vinirdhūya kartavyaṃ satataṃ śanaiḥ ॥ 50॥

pūrakānte tu kartavyo bandho jālandharābhidhaḥ ।
kaṇṭhasaṅkocarūpo'sau vāyumārganirodhakaḥ ॥ 51॥

adhastātkuñcanenāśu kaṇṭhasaṅkocane kṛte ।
madhye paścimatānena syātprāṇo brahmanāḍigaḥ ॥ 52॥

pūrvoktena krameṇaiva samyagāsanamāsthitaḥ ।
cālanaṃ tu sarasvatyāḥ kṛtvā prāṇaṃ nirodhayet ॥ 53॥

prathame divase kāryaṃ kumbhakānāṃ catuṣṭayam ।
pratyekaṃ daśasaṅkhyākaṃ dvitīye pañcabhistathā ॥ 54॥

viśatyalaṃ tṛtīye'hni pañcavṛddhyā dine dine ।
kartavyaḥ kumbhako nityaṃ bandhatrayasamanvitaḥ ॥ 55॥

divā suptirniśāyāṃ tu jāgarādatimaithunāt ।
bahusaṅkramaṇaṃ nityaṃ rodhānmūtrapurīṣayoḥ ॥ 56॥

viṣamāśanadoṣācca prayāsaprāṇacintanāt ।
śīghramutpadyate rogaḥ stambhayedyadi saṃyamī ॥ 57॥

yogābhyāsena me roga utpanna iti kathyate ।
tato'bhyāsaṃ tyajedevaṃ prathamaṃ vighna ucyate ॥ 58॥

dvitīyaṃ saṃśayākhyaṃ ca tṛtīyaṃ ca pramattatā ।
ālasyākhyaṃ caturthaṃ ca nidrārūpaṃ tu pañcamam ॥ 59॥

ṣaṣṭhaṃ tu viratirbhrāntiḥ saptamaṃ parikīrtitam ।
viṣamaṃ cāṣṭamaṃ caiva anākhyaṃ navamaṃ smṛtam ॥ 60॥

alabdhiryogatattvasya daśamaṃ procyate budhaiḥ ।
ityetadvighnadaśakaṃ vicāreṇa tyajedbudhaḥ ॥ 61॥

prāṇābhyāsastataḥ kāryo nityaṃ sattvasthayā dhiyā ।
suṣumnā līyate cittaṃ tathā vāyuḥ pradhāvati ॥ 62॥

śuṣke male tu yogī ca syādgatiścalitā tataḥ ।
adhogatimapānaṃ vai ūrdhvagaṃ kurute balāt ॥ 63॥

ākuñcanena taṃ prāhurmūlabandho'yamucyate ।
apānaścordhvago bhūtvā vahninā saha gacchati ॥ 64॥

prāṇasthānaṃ tato vahniḥ prāṇāpānau ca satvaram ।
militvā kuṇḍalīṃ yāti prasuptā kuṇḍalākṛtiḥ ॥ 65॥

tenāgninā ca santaptā pavanenaiva cālitā ।
prasārya svaśarīraṃ tu suṣumnā vadanāntare ॥ 66॥

brahmagranthiṃ tato bhittvā rajoguṇasamudbhavam ।
suṣumnā vadane śīghraṃ vidyullekheva saṃsphuret ॥ 67॥

viṣṇugranthiṃ prayātyuccaiḥ satvaraṃ hṛdi saṃsthitā ।
ūrdhvaṃ gacchati yaccāste rudragranthiṃ tadudbhavam ॥ 68॥

bhruvormadhye tu saṃbhidya yāti śītāṃśumaṇḍalam ।
anāhatākhyaṃ yaccakraṃ dalaiḥ ṣoḍaśabhiryutam ॥ 69॥

tatra śītāṃśusañjātaṃ dravaṃ śoṣayati svayam ।
calite prāṇavegena raktaṃ pītaṃ ravergrahāt ॥ 70॥

yātenducakraṃ yatrāste śuddhaśleṣmadravātmakam ।
tatra siktaṃ grasatyuṣṇaṃ kathaṃ śītasvabhāvakam ॥ 71॥

tathaiva rabhasā śuklaṃ candrarūpaṃ hi tapyate ।
ūrdhvaṃ pravahati kṣubdhā tadaivaṃ bhramatetarām ॥ 72॥

tasyāsvādavaśāccittaṃ bahiṣṭhaṃ viṣayeṣu yat ।
tadeva paramaṃ bhuktvā svasthaḥ svātmarato yuvā ॥ 73॥

prakṛtyaṣṭakarūpaṃ ca sthānaṃ gacchati kuṇḍalī ।
kroḍīkṛtya śivaṃ yāti kroḍīkṛtya vilīyate ॥ 74॥

ityadhordhvarajaḥ śuklaṃ śive tadanu mārutaḥ ।
prāṇāpānau samau yāti sadā jātau tathaiva ca ॥ 75॥

bhūte'lpe cāpyanalpe vā vācake tvativardhate ।
dhavayatyakhilā vātā agnimūṣāhiraṇyavat ॥ 76॥

ādhibhautikadehaṃ tu ādhidaivikavigrahe ।
deho'tivimalaṃ yāti cātivāhikatāmiyāt ॥ 77॥

jāḍyabhāvavinirmuktamamalaṃ cinmayātmakam ।
tasyātivāhikaṃ mukhyaṃ sarveṣāṃ tu madātmakam ॥ 78॥

jāyābhavavinirmuktiḥ kālarūpasya vibhramaḥ ।
iti taṃ svasvarūpā hi matī rajjubhujaṅgavat ॥ 79॥

mṛṣaivodeti sakalaṃ mṛṣaiva pravilīyate ।
raupyabuddhiḥ śuktikāyāṃ strīpuṃsorbhramato yathā ॥ 80॥

piṇḍabrahmāṇḍayoraikyaṃ liṅgasūtrātmanorapi ।
svāpāvyākṛtayoraikyaṃ svaprakāśacidātmanoḥ ॥ 81॥

śaktiḥ kuṇḍalinī nāma bisatantunibhā śubhā ।
mūlakandaṃ phaṇāgreṇa dṛṣṭvā kamalakandavat ॥ 82॥

mukhena pucchaṃ saṃgṛhya brahmarandhrasamanvitā ।
padmāsanagataḥ svastho gudamākuñcya sādhakaḥ ॥ 83॥

vāyumūrdhvagataṃ kurvankumbhakāviṣṭamānasaḥ ।
vāyvāghātavaśādagniḥ svādhiṣṭhānagato jvalan ॥ 84॥

jvalanāghātapavanāghātorūnnidrito'hirāṭ ।
brahmagranthiṃ tato bhittvā viṣṇugranthiṃ bhinattyataḥ ॥ 85॥

rudragranthiṃ ca bhittvaiva kamalāni bhinatti ṣaṭ ।
sahasrakamale śaktiḥ śivena saha modate ॥ 86॥

saivāvasthā parā jñeyā saiva nirvṛtikāriṇī iti ॥

iti prathamo'dhyāyaḥ ॥ 1॥

athāhaṃ sampravakṣyāmi vidyāṃ khecarisaṃjñikām ।
yathā vijñānavānasyā loke'sminnajaro'maraḥ ॥ 1॥

mṛtyuvyādhijarāgrasto dṛṣṭvā vidyāmimāṃ mune ।
buddhiṃ dṛḍhatarāṃ kṛtvā khecarīṃ tu samabhyaset ॥ 2॥

jarāmṛtyugadaghno yaḥ khecarīṃ vetti bhūtale ।
granthataścārthataścaiva tadabhyāsaprayogataḥ ॥ 3॥

taṃ mune sarvabhāvena guruṃ matvā samāśrayet ।
durlabhā khecarī vidyā tadabhyāso'pi durlabhaḥ ॥ 4॥

abhyāsaṃ melanaṃ caiva yugapannaiva sidhyati ।
abhyāsamātraniratā na vindante ha melanam ॥ 5॥

abhyāsaṃ labhate brahmañjanmajanmāntare kvacit ।
melanaṃ tu janmanāṃ śatānte'pi na labhyate ॥ 6॥

abhyāsaṃ bahujanmānte kṛtvā tadbhāvasādhitam ।
melanaṃ labhate kaścidyogī janmāntare kvacit ॥ 7॥

yadā tu melanaṃ yogī labhate guruvaktrataḥ ।
tadā tatsiddhimāpnoti yaduktā śāstrasantatau ॥ 8॥

granthataścārthataścaiva melanaṃ labhate yadā ।
tadā śivatvamāpnoti nirmuktaḥ sarvasaṃsṛteḥ ॥ 9॥

śāstraṃ vināpi saṃboddhuṃ guravo'pi na śaknuyuḥ ।
tasmātsudurlabhataraṃ labhyaṃ śāstramidaṃ mune ॥ 10॥

yāvanna labhyate śāstraṃ tāvadgāṃ paryaṭedyatiḥ ।
yadā saṃlabhyate śāstraṃ tadā siddhiḥ kare sthitā ॥ 11॥

na śāstreṇa vinā siddhirdṛṣṭā caiva jagattraye ।
tasmānmelanadātāraṃ śāstradātāramacyutam ॥ 12॥

tadabhyāsapradātāraṃ śivaṃ matvā samāśrayet ।
labdhvā śāstramidaṃ mahyamanyeṣāṃ na prakāśayet ॥ 13॥

tasmātsarvaprayatnena gopanīyaṃ vijānatā ।
yatrāste ca gururbrahmandivyayogapradāyakaḥ ॥ 14॥

tatra gatvā ca tenoktavidyāṃ saṃgṛhya khecarīm ।
tenoktaḥ samyagabhyāsaṃ kuryādādāvatandritaḥ ॥ 15॥

anayā vidyayā yogī khecarīsiddhibhāgbhavet ।
khecaryā khecarīṃ yuñjankhecarībījapūrayā ॥ 16॥

khecarādhipatirbhūtvā khecareṣu sadā vaset ।
khecarāvasathaṃ vahnimambumaṇḍalabhūṣitam ॥ 17॥

ākhyātaṃ khecarībījaṃ tena yogaḥ prasidhyati ।
somāṃśanavakaṃ varṇaṃ pratilomena coddharet ॥ 18॥

tasmāttryaṃśakamākhyātamakṣaraṃ candrarūpakam ।
tasmādapyaṣṭamaṃ varṇaṃ vilomena paraṃ mune ॥ 19॥

tathā tatparamaṃ viddhi tadādirapi pañcamī ।
indośca bahubhinne ca kūṭo'yaṃ parikīrtitaḥ ॥ 20॥

gurūpadeśalabhyaṃ ca sarvayogaprasiddhidam ।
yattasya dehajā māyā niruddhakaraṇāśrayā ॥ 21॥

svapne'pi na labhettasya nityaṃ dvādaśajapyataḥ ।
ya imāṃ pañca lakṣāṇi japedapi suyantritaḥ ॥ 22॥

tasya śrīkhecarīsiddhiḥ svayameva pravartate ।
naśyanti sarvavighnāni prasīdanti ca devatāḥ ॥ 23॥

valīpalitanāśaśca bhaviṣyati na saṃśayaḥ ।
evaṃ labdhvā mahāvidyāmabhyāsaṃ kārayettataḥ ॥ 24॥

anyathā kliśyate brahmanna siddhiḥ khecarīpathe ।
yadabhyāsavidhau vidyāṃ na labhedyaḥ sudhāmayīm ॥ 25॥

tataḥ saṃmelakādau ca labdhvā vidyāṃ sadā japet ।
nānyathā rahito brahmanna kiñcitsiddhibhāgbhavet ॥ 26॥

yadidaṃ labhyate śāstraṃ tadā vidyāṃ samāśrayet ।
tatastadoditāṃ siddhimāśu tāṃ labhate muniḥ ॥ 27॥

tālumūlaṃ samutkṛṣya saptavāsaramātmavit ।
svagurūktaprakāreṇa malaṃ sarvaṃ viśodhayet ॥ 28॥

snuhipatranibhaṃ śastraṃ sutīkṣṇaṃ snigdhanirmalam ।
samādāya tatastena romamātraṃ samucchinet ॥ 29॥

hitvā saindhavapathyābhyāṃ cūrṇitābhyāṃ prakarṣayet ।
punaḥ saptadine prāpte romamātraṃ samucchinet ॥ 30॥

evaṃ krameṇa ṣaṇmāsaṃ nityodyuktaḥ samācaret ।
ṣaṇmāsādrasanāmūlaṃ sirābaddhaṃ praṇaśyati ॥ 31॥

atha vāgīśvarīdhāma śiro vastreṇa veṣṭayet ।
śanairutkarṣayedyogī kālavelāvidhānavit ॥ 32॥

punaḥ ṣaṇmāsamātreṇa nityaṃ saṅgharṣaṇānmune ।
bhrūmadhyāvadhi cāpyeti tiryakkaṇabilāvadhiḥ ॥ 33॥

adhaśca cubukaṃ mūlaṃ prayāti kramacāritā ।
punaḥ saṃvatsarāṇāṃ tu tṛtīyādeva līlayā ॥ 34॥

keśāntamūrdhvaṃ kramati tiryak śākhāvadhirmune ।
adhastātkaṇṭhakūpāntaṃ punarvarṣatrayeṇa tu ॥ 35॥

brahmarandhraṃ samāvṛtya tiṣṭhedeva na saṃśayaḥ ।
tiryak cūlitalaṃ yāti adhaḥ kaṇṭhabilāvadhi ॥ 36॥

śanaiḥ śanairmastakācca mahāvajrakapāṭabhit ।
pūrvaṃ bījayutā vidyā hyākhyātā yatidurlabhā ॥ 37॥

tasyāḥ ṣaḍaṅgaṃ kurvīta tayā ṣaṭsvarabhinnayā ।
kuryādevaṃ karanyāsaṃ sarvasiddhyādihetave ॥ 38॥

śanairevaṃ prakartavyamabhyāsaṃ yugapannahi ।
yugapadvartate yasya śarīraṃ vilayaṃ vrajet ॥ 39॥

tasmācchanaiḥ śanaiḥ kāryamabhyāsaṃ munipuṅgava ।
yadā ca bāhyamārgeṇa jihvā brahmabilaṃ vrajet ॥ 40॥

tadā brahmārgalaṃ brahmandurbhedyaṃ tridaśairapi ।
aṅgulyagreṇa saṃghṛṣya jihvāmātraṃ niveśayet ॥ 41॥

evaṃ varṣatrayaṃ kṛtvā brahmadvāraṃ praviśyati ।
brahmadvāre praviṣṭe tu samyaṅmathanamācaret ॥ 42॥

mathanena vinā kecitsādhayanti vipaścitaḥ ।
khecarīmantrasiddhasya sidhyate mathanaṃ vinā ॥ 43॥

japaṃ ca mathanaṃ caiva kṛtvā śīghraṃ phalaṃ labhet ।
svarṇajāṃ raupyajāṃ vāpi lohajāṃ vā śalākikām ॥ 44॥

niyojya nāsikārandhraṃ dugdhasiktena tantunā ।
prāṇānnirudhya hṛdaye sukhamāsanamātmanaḥ ॥ 45॥

śanaiḥ sumathanaṃ kuryādbhrūmadhye nyasya cakṣuṣī ।
ṣaṇmāsaṃ mathanāvasthā bhāvenaiva prajāyate ॥ 46॥

yathā suṣuptirbālānāṃ yathā bhāvastathā bhavet ।
na sadā mathanaṃ śastaṃ māse māse samācaret ॥ 47॥

sadā rasanayā yogī mārgaṃ na parisaṃkramet ।
evaṃ dvādaśavarṣānte saṃsiddhirbhavati dhruvā ॥ 48॥

śarīre sakalaṃ viśvaṃ paśyatyātmāvibhedataḥ ।
brahmāṇḍo'yaṃ mahāmārgo rājadantordhvakuṇḍalī ॥ 49॥ iti॥

iti dvitīyo'dhyāyaḥ ॥ 2॥

melanamanuḥ । hrīṃ bhaṃ saṃ paṃ phaṃ saṃ kṣam । padmaja uvāca ।
amāvāsyā ca pratipatpaurṇamāsī ca śaṅkara ।
asyāḥ kā varṇyate saṃjñā etadākhyāhi tattvataḥ ॥ 1॥

pratipaddinato'kāle amāvāsyā tathaiva ca ।
paurṇamāsyāṃ sthirīkuryātsa ca panthā hi nānyathā ॥ 2॥

kāmena viṣayākāṅkṣī viṣayātkāmamohitaḥ ।
dvāveva santyajennityaṃ nirañjanamupāśrayet ॥ 3॥

aparaṃ santyajetsarvaṃ yadicchedātmano hitam ।
śaktimadhye manaḥ kṛtvā manaḥ śakteśca madhyagam ॥ 4॥

manasā mana ālokya tattyajetparamaṃ padam ।
mana eva hi binduśca utpattisthitikāraṇam ॥ 5॥

manasotpadyate binduryathā kṣīraṃ ghṛtātmakam ।
na ca bandhanamadhyasthaṃ tadvai kāraṇamānasam ॥ 6॥

candrārkamadhyamā śaktiryatrasthā tatra bandhanam ।
jñātvā suṣumnāṃ tadbhedaṃ kṛtvā vāyuṃ ca madhyagam ॥ 7॥

sthitvāsau baindavasthāne ghrāṇarandhre nirodhayet ।
vāyuṃ binduṃ samākhyātaṃ sattvaṃ prakṛtimeva ca ॥ 8॥

ṣaṭ cakrāṇi parijñātvā praviśetsukhamaṇḍalam ।
mūlādhāraṃ svādhiṣṭhānaṃ maṇipūraṃ tṛtīyakam ॥ 9॥

anāhataṃ viśuddhaṃ ca ājñācakraṃ ca ṣaṣṭhakam ।
ādhāraṃ gudamityuktaṃ svādhiṣṭhānaṃ tu laiṅgikam ॥ 10॥

maṇipūraṃ nābhideśaṃ hṛdayasthamanāhatam ।
viśuddhiḥ kaṇṭhamūle ca ājñācakraṃ ca mastakam ॥ 11॥

ṣaṭ cakrāṇi parijñātvā praviśetsukhamaṇḍale ।
praviśedvāyumākṛṣya tayaivordhvaṃ niyojayet ॥ 12॥

evaṃ samabhyasedvāyuṃ sa brahmāṇḍamayo bhavet ।
vāyuṃ binduṃ tathā cakraṃ cittaṃ caiva samabhyaset ॥ 13॥

samādhimekena samamamṛtaṃ yānti yoginaḥ ।
yathāgnirdārumadhyastho nottiṣṭhenmathanaṃ vinā ॥ 14॥

vinā cābhyāsayogena jñānadīpastathā na hi ।
ghaṭamadhyagato dīpo bāhye naiva prakāśate ॥ 15॥

bhinne tasminghaṭe caiva dīpajvālā ca bhāsate ।
svakāyaṃ ghaṭamityuktaṃ yathā dīpo hi tatpadam ॥ 16॥

guruvākyasamābhinne brahmajñānaṃ sphuṭībhavet ।
karṇadhāraṃ guruṃ prāpya kṛtvā sūkṣmaṃ taranti ca ॥ 17॥

abhyāsavāsanāśaktyā taranti bhavasāgaram ।
parāyāmaṅkurībhūya paśyantāṃ dvidalīkṛtā ॥ 18॥

madhyamāyāṃ mukulitā vaikharyāṃ vikasīkṛtā ।
pūrvaṃ yathoditā yā vāgvilomenāstagā bhavet ॥ 19॥

tasyā vācaḥ paro devaḥ kūṭastho vākprabodhakaḥ ।
so'hamasmīti niścitya yaḥ sadā vartate pumān ॥ 20॥

śabdairuccāvacairnīcairbhāṣito'pi na lipyate ।
viśvaśca taijasaścaiva prājñaśceti ca te trayaḥ ॥ 21॥

virāḍḍhiraṇyagarbhaśca īśvaraśceti te trayaḥ ।
brahmāṇḍaṃ caiva piṇḍāṇḍaṃ lokā bhūrādayaḥ kramāt ॥ 22॥

svasvopādhilayādeva līyante pratyagātmani ।
aṇḍaṃ jñānāgninā taptaṃ līyate kāraṇaiḥ saha ॥ 23॥

paramātmani līnaṃ tatparaṃ brahmaiva jāyate ।
tataḥ stimitagambhīraṃ na tejo na tamastatam ॥ 24॥

anākhyamanabhivyaktaṃ satkiñcidavaśiṣyate ।
dhyātvā madhyasthamātmānaṃ kalaśāntaradīpavat ॥ 25॥

aṅguṣṭhamātramātmānamadhūmajyotirūpakam ।
prakāśayantamantasthaṃ dhyāyetkūṭasthamavyayam ॥ 26॥

vijñānātmā tathā dehe jāgratsvapnasuṣuptitaḥ ।
māyayā mohitaḥ paścādbahujanmāntare punaḥ ॥ 27॥

satkarmaparipākāttu svavikāraṃ cikīrṣati ।
ko'haṃ kathamayaṃ doṣaḥ saṃsārākhya upāgataḥ ॥ 28॥

jāgratsvapne vyavaharantsuṣuptau kva gatirmama ।
iti cintāparo bhūtvā svabhāsā ca viśeṣataḥ ॥ 29॥

ajñānāttu cidābhāso bahistāpena tāpitaḥ ।
dagdhaṃ bhavatyeva tadā tūlapiṇḍamivāgninā ॥ 30॥

daharasthaḥ pratyagātmā naṣṭe jñāne tataḥ param ।
vitato vyāpya vijñānaṃ dahatyeva kṣaṇena tu ॥ 31॥

manomayajñānamayānsamyagdagdhvā krameṇa tu ।
ghaṭasthadīpavacchaśvadantareva prakāśate ॥ 32॥

dhyāyannāste muniścaivamāsupterāmṛtestu yaḥ ।
jīvanmuktaḥ sa vijñeyaḥ sa dhanyaḥ kṛtakṛtyavān ॥ 33॥

jīvanmuktapadaṃ tyaktvā svadehe kālasātkṛte ।
viśatyadehamuktatvaṃ pavano'spandatāmiva ॥ 34॥

aśabdamasparśamarūpamavyayaṃ
tathārasaṃ nityamagandhavacca yat ।
anādyanantaṃ mahataḥ paraṃ dhruvaṃ
tadeva śiṣyatyamalaṃ nirāmayam ॥ 35॥ ityupaniṣat ॥

oṃ saha nāvavatu saha nau bhunaktu saha vīryaṃ karavāvahai ।
tejasvināvadhītamastu mā vidviṣāvahai ॥

oṃ śāntiḥ śāntiḥ śāntiḥ ॥ hariḥ oṃ tatsat ॥

iti yogakuṇḍalinyupaniṣatsamāptā ॥