| Library / Tipiṭaka / तिपिटक • Tipiṭaka / संयुत्तनिकाय (टीका) • Saṃyuttanikāya (ṭīkā) |
११. योगक्खेमिवग्गो
11. Yogakkhemivaggo
१. योगक्खेमिसुत्तवण्णना
1. Yogakkhemisuttavaṇṇanā
१०४. चतूहि योगेहीति कामयोगादीहि चतूहि योगेहि। खेमिनोति खेमवतो कुसलिनो। कारणभूतन्ति कत्तब्बउपायस्स कारणभूतं। परियायति पवत्तिं निवत्तिञ्च ञापेतीति परियायो, धम्मो च सो परियत्तिधम्मत्ता परियायो चाति धम्मपरियायो, तं धम्मपरियायं। यस्मा पन सो तस्साधिगमस्स कारणं होति, तस्मा वुत्तं ‘‘धम्मकारण’’न्ति। युत्तिन्ति समथविपस्सनाधम्मानीति वा चतुसच्चधम्मानीति वा। ‘‘तस्मा’’ति पदं उद्धरित्वा – ‘‘कस्मा’’ति कारणं पुच्छन्तो ‘‘किं अक्खातत्ता, उदाहु पहीनत्ता’’ति विभजित्वा पुच्छि। यस्मा पन छन्दरागप्पहानं योगक्खेमिभावस्स कारणं, न कथनं, तस्मा ‘‘पहीनत्ता’’तिआदि वुत्तं।
104.Catūhiyogehīti kāmayogādīhi catūhi yogehi. Kheminoti khemavato kusalino. Kāraṇabhūtanti kattabbaupāyassa kāraṇabhūtaṃ. Pariyāyati pavattiṃ nivattiñca ñāpetīti pariyāyo, dhammo ca so pariyattidhammattā pariyāyo cāti dhammapariyāyo, taṃ dhammapariyāyaṃ. Yasmā pana so tassādhigamassa kāraṇaṃ hoti, tasmā vuttaṃ ‘‘dhammakāraṇa’’nti. Yuttinti samathavipassanādhammānīti vā catusaccadhammānīti vā. ‘‘Tasmā’’ti padaṃ uddharitvā – ‘‘kasmā’’ti kāraṇaṃ pucchanto ‘‘kiṃ akkhātattā, udāhu pahīnattā’’ti vibhajitvā pucchi. Yasmā pana chandarāgappahānaṃ yogakkhemibhāvassa kāraṇaṃ, na kathanaṃ, tasmā ‘‘pahīnattā’’tiādi vuttaṃ.
योगक्खेमिसुत्तवण्णना निट्ठिता।
Yogakkhemisuttavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / १. योगक्खेमिसुत्तं • 1. Yogakkhemisuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / १. योगक्खेमिसुत्तवण्णना • 1. Yogakkhemisuttavaṇṇanā
