| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) |
੧੧. ਯવਕਲਾਪਿਸੁਤ੍ਤવਣ੍ਣਨਾ
11. Yavakalāpisuttavaṇṇanā
੨੪੮. ਯવਪੁਞ੍ਜੋ ਸੁਪਰਿਪਕ੍ਕਯવਸਮੁਦਾਯੋ। ਕਾਜਹਤ੍ਥਾਤਿ ਦਣ੍ਡਹਤ੍ਥਾ। ਪੋਥੇਯ੍ਯੁਨ੍ਤਿ ਯਥਾ ਯવਸਙ੍ਖਾਤਂ ਧਞ੍ਞਂ વਣ੍ਟਤੋ ਮੁਚ੍ਚਤਿ, ਏવਂ ਪੋਥੇਯ੍ਯੁਂ। ਯવੇ ਸਾવੇਤ੍વਾਤਿ ਯવਸੀਸਤੋ ਯવੇ ਪੋਥਨੇਨ ਮੋਚੇਤ੍વਾ વਿવੇਚੇਤ੍વਾ।
248.Yavapuñjo suparipakkayavasamudāyo. Kājahatthāti daṇḍahatthā. Potheyyunti yathā yavasaṅkhātaṃ dhaññaṃ vaṇṭato muccati, evaṃ potheyyuṃ. Yave sāvetvāti yavasīsato yave pothanena mocetvā vivecetvā.
ਚਤੁਮਹਾਪਥੋ વਿਯ ਛ ਆਯਤਨਾਨਿ ਆਰਮ੍ਮਣਦਣ੍ਡਕੇਹਿ ਹਨਨਟ੍ਠਾਨਤ੍ਤਾ। ਯવਕਲਾਪੀ વਿਯ ਸਤ੍ਤੋ ਤੇਹਿ ਹਞ੍ਞਮਾਨਤ੍ਤਾ। ਛ ਬ੍ਯਾਭਙ੍ਗਿਯੋ વਿਯ ਸਭਾવਤੋ ਛਧਾਪਿ ਪਚ੍ਚੇਕਂ ਇਟ੍ਠਾਨਿਟ੍ਠਮਜ੍ਝਤ੍ਤવਸੇਨ ਅਟ੍ਠਾਰਸ ਆਰਮ੍ਮਣਾਨਿ ਯવਕਲਾਪਟ੍ਠਾਨਿਯਸ੍ਸ ਸਤ੍ਤਸ੍ਸ ਹਨਨਤੋ। ਭવਪਤ੍ਥਨਾਯ ਅਪਰਾਪਰੁਪ੍ਪਤ੍ਤਿਂ ਸਨ੍ਧਾਯ ‘‘ਭવਪਤ੍ਥਨਾ ਕਿਲੇਸਾ’’ਤਿ ਬਹੁવਚਨਨਿਦ੍ਦੇਸੋ। ਭવਪਤ੍ਥਨਾ ਚ ਤਸ੍ਸ ਪਚ੍ਚਯਭੂਤਾ ਕਿਲੇਸਾ ਚਾਤਿ ਭવਪਤ੍ਥਨਾਕਿਲੇਸਾਤਿ ਏવਂ વਾ ਏਤ੍ਥ ਅਤ੍ਥੋ ਦਟ੍ਠਬ੍ਬੋ। ਯਸ੍ਮਾ ਸਤ੍ਤਾਨਂ વਟ੍ਟਦੁਕ੍ਖਂ ਨਾਮ ਸਬ੍ਬਮ੍ਪਿ ਤਂ ਭવਪਤ੍ਥਨਾਮੂਲਕਂ, ਤਸ੍ਮਾ વੁਤ੍ਤਂ ‘‘ਏવਂ ਸਤ੍ਤਾ’’ਤਿਆਦਿ। ਭવਪਤ੍ਥਨਕਿਲੇਸਾਤਿ ਚ ਭવਪਤ੍ਥਨਾਮੂਲਕਂ ਕਿਲੇਸਂ।
Catumahāpatho viya cha āyatanāni ārammaṇadaṇḍakehi hananaṭṭhānattā. Yavakalāpī viya satto tehi haññamānattā. Cha byābhaṅgiyo viya sabhāvato chadhāpi paccekaṃ iṭṭhāniṭṭhamajjhattavasena aṭṭhārasa ārammaṇāni yavakalāpaṭṭhāniyassa sattassa hananato. Bhavapatthanāya aparāparuppattiṃ sandhāya ‘‘bhavapatthanā kilesā’’ti bahuvacananiddeso. Bhavapatthanā ca tassa paccayabhūtā kilesā cāti bhavapatthanākilesāti evaṃ vā ettha attho daṭṭhabbo. Yasmā sattānaṃ vaṭṭadukkhaṃ nāma sabbampi taṃ bhavapatthanāmūlakaṃ, tasmā vuttaṃ ‘‘evaṃ sattā’’tiādi. Bhavapatthanakilesāti ca bhavapatthanāmūlakaṃ kilesaṃ.
ਭੁਮ੍ਮਨ੍ਤਿ ਸਮੀਪਤ੍ਥੇ ਭੁਮ੍ਮਂ। ਤੇਨਾਹ ‘‘ਸੁਧਮ੍ਮਾਯ ਦ੍વਾਰੇ’’ਤਿ। ਨ ਕਤਨ੍ਤਿ ਦੁਕ੍ਖੁਪ੍ਪਾਦਨਂ ਨ ਕਤਂ। ਨવਗੂਥਸੂਕਰਂ વਿਯਾਤਿ ਨવਗੂਥਭਕ੍ਖਸੂਕਰਂ વਿਯ। ਚਿਤ੍ਤੇਨੇવਾਤਿ ਯੋ ਬਜ੍ਝਤਿ, ਤਸ੍ਸ ਚਿਤ੍ਤੇਨੇવ । ਤਸ੍ਮਾਤਿ ਯਸ੍ਮਾ વੇਪਚਿਤ੍ਤਿਬਨ੍ਧਨਸ੍ਸ ਬਨ੍ਧਨਮੁਚ੍ਚਨਂ વਿਯ, ਤਸ੍ਮਾ ‘‘વੇਪਚਿਤ੍ਤਿਬਨ੍ਧਨ’’ਨ੍ਤਿ વੁਤ੍ਤਂ। ਞਾਣਮੋਕ੍ਖਂ ਬਨ੍ਧਨਨ੍ਤਿ ਞਾਣੇਨ ਮੁਚ੍ਚਨਂ ਬਨ੍ਧਨਂ।
Bhummanti samīpatthe bhummaṃ. Tenāha ‘‘sudhammāya dvāre’’ti. Na katanti dukkhuppādanaṃ na kataṃ. Navagūthasūkaraṃ viyāti navagūthabhakkhasūkaraṃ viya. Cittenevāti yo bajjhati, tassa citteneva . Tasmāti yasmā vepacittibandhanassa bandhanamuccanaṃ viya, tasmā ‘‘vepacittibandhana’’nti vuttaṃ. Ñāṇamokkhaṃ bandhananti ñāṇena muccanaṃ bandhanaṃ.
ਮਞ੍ਞਮਾਨੋਤਿ ਪਰਿਕਪ੍ਪਿਤਤਣ੍ਹਾવਸੇਨ ‘‘ਏਤਂ ਮਮਾ’’ਤਿ, ਦਿਟ੍ਠਿવਸੇਨ ‘‘ਏਸੋ ਮੇ ਅਤ੍ਤਾ’’ਤਿ, ਮਾਨવਸੇਨ ‘‘ਏਸੋਹਮਸ੍ਮੀ’’ਤਿ ਮਞ੍ਞਨ੍ਤੋ। ਖਨ੍ਧવਿਨਿਮੁਤ੍ਤਸ੍ਸ ਮਞ੍ਞਮਾਨવਤ੍ਥੁਨੋ ਅਭਾવਾ ‘‘ਖਨ੍ਧੇ ਮਞ੍ਞਨ੍ਤੋ’’ਤਿ વੁਤ੍ਤਂ। ਏਤਨ੍ਤਿ ‘‘ਮਾਰਸ੍ਸਾ’’ਤਿ ਏਤਂ ਸਾਮਿવਚਨਂ। ਕਿਲੇਸਮਾਰੇਨ ਬਦ੍ਧੋਤਿ ਕਿਲੇਸਮਾਰੇਨ ਤੇਨੇવ ਕਿਲੇਸਬਨ੍ਧਨੇਨ ਬਦ੍ਧੋ। ਮੁਤ੍ਤੋਤਿ ਏਤ੍ਥਾਪਿ ਏਸੇવ ਨਯੋ।
Maññamānoti parikappitataṇhāvasena ‘‘etaṃ mamā’’ti, diṭṭhivasena ‘‘eso me attā’’ti, mānavasena ‘‘esohamasmī’’ti maññanto. Khandhavinimuttassa maññamānavatthuno abhāvā ‘‘khandhe maññanto’’ti vuttaṃ. Etanti ‘‘mārassā’’ti etaṃ sāmivacanaṃ. Kilesamārena baddhoti kilesamārena teneva kilesabandhanena baddho. Muttoti etthāpi eseva nayo.
ਤਣ੍ਹਾਮਞ੍ਞਨਾਯ ਸਤਿ ਦਿਟ੍ਠਿਮਾਨਮਞ੍ਞਨਾਨਂ ਪਸਙ੍ਗੋ ਏવ ਨਤ੍ਥੀਤਿ ਯਥਾ ‘‘ਅਸ੍ਮੀ’’ਤਿ ਪਦੇਨ ਦਿਟ੍ਠਿਮਾਨਮਞ੍ਞਨਾ વੁਤ੍ਤਾ ਹੋਨ੍ਤਿ, ਏવਂ ਤਣ੍ਹਾਮਞ੍ਞਿਤਾਪੀਤਿ વੁਤ੍ਤਂ ‘‘ਅਸ੍ਮੀਤਿ ਪਦੇਨ ਤਣ੍ਹਾਮਞ੍ਞਿਤਂ વੁਤ੍ਤ’’ਨ੍ਤਿ। ਅਯਮਹਮਸ੍ਮੀਤਿ ਪਦੇਨ ਦਿਟ੍ਠਿਮਞ੍ਞਿਤਨ੍ਤਿ ਏਤਰਹਿ ਲਬ੍ਭਮਾਨਦਿਟ੍ਠਿવਤ੍ਥੁવਸੇਨੇવ। ਭવਿਸ੍ਸਨ੍ਤਿ ਅਨਾਗਤਦਿਟ੍ਠਿવਤ੍ਥੁਪਰਿਕਪ੍ਪਨવਸੇਨੇવ ਦਿਟ੍ਠਿਮਞ੍ਞਿਤਂ। ਯੇਭੁਯ੍ਯੇਨ ਹਿ ਅਨਾਗਤਾਲਿਙ੍ਗਨਾ ਸਸ੍ਸਤਦਿਟ੍ਠਿ। ਉਚ੍ਛੇਦવਸੇਨ ਦਿਟ੍ਠਿਮਞ੍ਞਿਤਮੇવਾਤਿ ਆਨੇਤ੍વਾ ਸਮ੍ਬਨ੍ਧੋ। ਰੂਪੀਤਿਆਦੀਨਿ ਪਦਾਨਿ। ਸਸ੍ਸਤਸ੍ਸੇવਾਤਿ ਸਸ੍ਸਤਗਾਹਸ੍ਸੇવ ਪਭੇਦਦੀਪਨਾਨਿ। ਯਸ੍ਮਾ ਮਞ੍ਞਿਤਂ ਆਬਾਧવਸੇਨ ਰੋਗੋ, ਅਨ੍ਤੋਦੋਸવਸੇਨ ਗਣ੍ਡੋ, ਅਙ੍ਗਨਿਕਨ੍ਤવਸੇਨ ਸਲ੍ਲਂ, ਤਸ੍ਮਾ ਇਮੇਹਿ ਤਣ੍ਹਾਦੀਹਿ ਕਿਲੇਸੇਹਿ ਪਾਕਟਚਲਨવਸੇਨ ਇਞ੍ਜਨ੍ਤਿ ਚੇવ, ਅਪਾਕਟਸਞ੍ਚਲਨવਸੇਨ ਫਨ੍ਦਨ੍ਤਿ ਚ। ਪਪਞ੍ਚਿਤਂ ਸਂਸਾਰੇ ਚਿਰਾਯਨਂ ਦਟ੍ਠਬ੍ਬਂ, ਖਨ੍ਧਸਨ੍ਤਾਨਸ੍ਸ વਾ વਿਤ੍ਥਾਰਣਂ। ਪਮਤ੍ਤਾਕਾਰਪ੍ਪਤ੍ਤਾ ਮੁਚ੍ਛਨਾਕਾਰਪ੍ਪਤ੍ਤਾ। ਤੇਸਨ੍ਤਿ ਤਣ੍ਹਾਦਿਟ੍ਠਿਕਿਲੇਸਾਨਂ। ਆਕਾਰਦਸ੍ਸਨਤ੍ਥਨ੍ਤਿ ਪવਤ੍ਤਿਆਕਾਰਦਸ੍ਸਨਤ੍ਥਂ।
Taṇhāmaññanāya sati diṭṭhimānamaññanānaṃ pasaṅgo eva natthīti yathā ‘‘asmī’’ti padena diṭṭhimānamaññanā vuttā honti, evaṃ taṇhāmaññitāpīti vuttaṃ ‘‘asmīti padena taṇhāmaññitaṃ vutta’’nti. Ayamahamasmīti padena diṭṭhimaññitanti etarahi labbhamānadiṭṭhivatthuvaseneva. Bhavissanti anāgatadiṭṭhivatthuparikappanavaseneva diṭṭhimaññitaṃ. Yebhuyyena hi anāgatāliṅganā sassatadiṭṭhi. Ucchedavasena diṭṭhimaññitamevāti ānetvā sambandho. Rūpītiādīni padāni. Sassatassevāti sassatagāhasseva pabhedadīpanāni. Yasmā maññitaṃ ābādhavasena rogo, antodosavasena gaṇḍo, aṅganikantavasena sallaṃ, tasmā imehi taṇhādīhi kilesehi pākaṭacalanavasena iñjanti ceva, apākaṭasañcalanavasena phandanti ca. Papañcitaṃ saṃsāre cirāyanaṃ daṭṭhabbaṃ, khandhasantānassa vā vitthāraṇaṃ. Pamattākārappattā mucchanākārappattā. Tesanti taṇhādiṭṭhikilesānaṃ. Ākāradassanatthanti pavattiākāradassanatthaṃ.
ਮਾਨੋ ਨਾਮ ‘‘ਸੇਯ੍ਯੋਹਮਸ੍ਮੀ’’ਤਿਆਦਿਨਾ ਮਜ੍ਜਨਾਕਾਰਪ੍ਪવਤ੍ਤਿ। ਤਣ੍ਹਾਯ ਸਮ੍ਪਯੁਤ੍ਤਮਾਨવਸੇਨਾਤਿ ਕਸ੍ਮਾ વੁਤ੍ਤਂ? ਨਨੁ ਸਬ੍ਬੋ ਮਾਨੋ ਤਣ੍ਹਾਸਮ੍ਪਯੁਤ੍ਤੋ? ਸਤਿ ਹਿ ਬ੍ਯਭਿਚਾਰੇ વਿਸੇਸਨਂ ਇਚ੍ਛਿਤਬ੍ਬਨ੍ਤਿ। ਸਚ੍ਚਮੇਤਂ, ਤਣ੍ਹਾ ਪਨ ਅਤ੍ਥਿ ਮਾਨਸ੍ਸ ਪਚ੍ਚਯਭੂਤਾ, ਅਤ੍ਥਿ ਮਾਨਸ੍ਸ ਅਪ੍ਪਚ੍ਚਯਭੂਤਾ, ਯਤੋ ਮਾਨੋ ਅਨਿਯਤੋ વੁਚ੍ਚਤਿ। ਤਥਾ ਹਿ ਪਟ੍ਠਾਨੇ ‘‘ਸਂਯੋਜਨਂ ਧਮ੍ਮਂ ਪਟਿਚ੍ਚ ਸਂਯੋਜਨੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ’’ਤਿ ਏਤ੍ਥ ਸਂਯੋਜਨਾਨਿ ਸਂਯੋਜਨੇਹਿ ਯਥਾਲਾਭਂ ਯੋਜੇਤ੍વਾ ਦਸ੍ਸਿਤਯੋਜਨਾਯ ‘‘ਕਾਮਰਾਗਸਂਯੋਜਨਂ ਪਟਿਚ੍ਚ ਮਾਨਸਂਯੋਜਨਂ ਅવਿਜ੍ਜਾਸਂਯੋਜਨ’’ਨ੍ਤਿ વਤ੍વਾ ‘‘ਕਾਮਰਾਗਸਂਯੋਜਨਂ ਪਟਿਚ੍ਚ ਅવਿਜ੍ਜਾਸਂਯੋਜਨ’’ਨ੍ਤਿ, ‘‘ਮਾਨਸਂਯੋਜਨਂ ਪਟਿਚ੍ਚ ਭવਰਾਗਸਂਯੋਜਨਂ ਅવਿਜ੍ਜਾਸਂਯੋਜਨ’’ਨ੍ਤਿ ਚ વਤ੍વਾ ‘‘ਭવਰਾਗਸਂਯੋਜਨਂ ਪਟਿਚ੍ਚ ਅવਿਜ੍ਜਾਸਂਯੋਜਨ’’ਨ੍ਤਿ વੁਤ੍ਤਂ। ਏਤ੍ਥ ਚ ਕਾਮਰਾਗਭવਰਾਗਸਂਯੋਜਨੇਹਿ ਮਾਨਸ੍ਸ ਅਨਿਯਤਭਾવੋ ਪਕਾਸਿਤੋ। ਤਤ੍ਥ ਯਾ ਤਣ੍ਹਾ ਬਲવਤੀ, ਤਂ ਸਨ੍ਧਾਯ ਇਦਂ વੁਤ੍ਤਂ ‘‘ਤਣ੍ਹਾਯ ਸਮ੍ਪਯੁਤ੍ਤਮਾਨવਸੇਨਾ’’ਤਿ। ਬਲવਤਣ੍ਹਾਸਮ੍ਪਯੁਤ੍ਤੋ ਹਿ ਮਾਨੋ ਸਯਮ੍ਪਿ ਬਲવਾ ਹੁਤ੍વਾ ਅਸ੍ਮੀਤਿ ਸવਿਸੇਸਂ ਮਜ੍ਜਨવਸੇਨ ਪવਤ੍ਤਤੀਤਿ।
Māno nāma ‘‘seyyohamasmī’’tiādinā majjanākārappavatti. Taṇhāya sampayuttamānavasenāti kasmā vuttaṃ? Nanu sabbo māno taṇhāsampayutto? Sati hi byabhicāre visesanaṃ icchitabbanti. Saccametaṃ, taṇhā pana atthi mānassa paccayabhūtā, atthi mānassa appaccayabhūtā, yato māno aniyato vuccati. Tathā hi paṭṭhāne ‘‘saṃyojanaṃ dhammaṃ paṭicca saṃyojano dhammo uppajjati hetupaccayā’’ti ettha saṃyojanāni saṃyojanehi yathālābhaṃ yojetvā dassitayojanāya ‘‘kāmarāgasaṃyojanaṃ paṭicca mānasaṃyojanaṃ avijjāsaṃyojana’’nti vatvā ‘‘kāmarāgasaṃyojanaṃ paṭicca avijjāsaṃyojana’’nti, ‘‘mānasaṃyojanaṃ paṭicca bhavarāgasaṃyojanaṃ avijjāsaṃyojana’’nti ca vatvā ‘‘bhavarāgasaṃyojanaṃ paṭicca avijjāsaṃyojana’’nti vuttaṃ. Ettha ca kāmarāgabhavarāgasaṃyojanehi mānassa aniyatabhāvo pakāsito. Tattha yā taṇhā balavatī, taṃ sandhāya idaṃ vuttaṃ ‘‘taṇhāya sampayuttamānavasenā’’ti. Balavataṇhāsampayutto hi māno sayampi balavā hutvā asmīti savisesaṃ majjanavasena pavattatīti.
ਦਿਟ੍ਠਿવਸੇਨਾਤਿ ਮਾਨਮੂਲਕਦਿਟ੍ਠਿવਸੇਨ। ‘‘ਸੇਯ੍ਯੋਹਮਸ੍ਮੀ’’ਤਿਆਦਿਨਾ ਹਿ ਬਹੁਲਮਾਨੁਪੇਤਸ੍ਸ ਪੁਗ੍ਗਲਸ੍ਸ ਰੂਪਾਦੀਸੁ ਏਕਂ ਉਦ੍ਦਿਸ੍ਸ ਅਯਮਹਮਸ੍ਮੀਤਿ ਦਿਟ੍ਠਿਯਾ ਉਪ੍ਪਨ੍ਨਾਯ ਮਾਨਸ੍ਸ ਅਪ੍ਪਹੀਨਤ੍ਤਾ ਮਾਨੋਪਿ ਤਤ੍ਥ ਤਤ੍ਥੇવ ਉਪ੍ਪਜ੍ਜਤਿ। ਇਤਿ ਮਾਨਮੂਲਕਂ ਦਿਟ੍ਠਿਂ ਸਨ੍ਧਾਯਾਹ ‘‘ਅਯਮਹਮਸ੍ਮੀਤਿ ਦਿਟ੍ਠਿવਸੇਨ વੁਤ੍ਤ’’ਨ੍ਤਿ। ਚੋਦਕੋ ਪਨ ਇਮਮਤ੍ਥਂ ਅਜਾਨਨ੍ਤੋ ਅਨੁਪਲਬ੍ਭਮਾਨਮੇવ ਸਮ੍ਪਯੋਗਤ੍ਥਂ ਗਹੇਤ੍વਾ ‘‘ਨਨੁ ਚਾ’’ਤਿਆਦਿਨਾ ਚੋਦੇਤਿ। ਇਤਰੋ ‘‘ਆਮ ਨਤ੍ਥੀ’’ਤਿ ਤਮਤ੍ਥਂ ਸਮ੍ਪਟਿਚ੍ਛਿਤ੍વਾ ‘‘ਮਾਨਸ੍ਸ ਪਨਾ’’ਤਿਆਦਿਨਾ ਪਰਿਹਾਰਮਾਹ। ਤਸ੍ਸਤ੍ਥੋ વੁਤ੍ਤੋ ਏવ।
Diṭṭhivasenāti mānamūlakadiṭṭhivasena. ‘‘Seyyohamasmī’’tiādinā hi bahulamānupetassa puggalassa rūpādīsu ekaṃ uddissa ayamahamasmīti diṭṭhiyā uppannāya mānassa appahīnattā mānopi tattha tattheva uppajjati. Iti mānamūlakaṃ diṭṭhiṃ sandhāyāha ‘‘ayamahamasmīti diṭṭhivasena vutta’’nti. Codako pana imamatthaṃ ajānanto anupalabbhamānameva sampayogatthaṃ gahetvā ‘‘nanu cā’’tiādinā codeti. Itaro ‘‘āma natthī’’ti tamatthaṃ sampaṭicchitvā ‘‘mānassa panā’’tiādinā parihāramāha. Tassattho vutto eva.
ਯવਕਲਾਪਿਸੁਤ੍ਤવਣ੍ਣਨਾ ਨਿਟ੍ਠਿਤਾ।
Yavakalāpisuttavaṇṇanā niṭṭhitā.
ਆਸੀવਿਸવਗ੍ਗવਣ੍ਣਨਾ ਨਿਟ੍ਠਿਤਾ।
Āsīvisavaggavaṇṇanā niṭṭhitā.
ਚਤੁਤ੍ਥੋ ਪਣ੍ਣਾਸਕੋ।
Catuttho paṇṇāsako.
ਸਲ਼ਾਯਤਨਸਂਯੁਤ੍ਤવਣ੍ਣਨਾ ਨਿਟ੍ਠਿਤਾ।
Saḷāyatanasaṃyuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੧੧. ਯવਕਲਾਪਿਸੁਤ੍ਤਂ • 11. Yavakalāpisuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) / ੧੧. ਯવਕਲਾਪਿਸੁਤ੍ਤવਣ੍ਣਨਾ • 11. Yavakalāpisuttavaṇṇanā
