4. Yaññasāmikattheraapadānaṃ

17.

‘‘Jātiyā sattavassohaṃ, ahosiṃ mantapāragū;

Kulavattaṃ ² adhāresiṃ, yañño ussāhito mayā.

18.

‘‘Cullāsītisahassāni , pasū haññanti me tadā;

Sārathambhupanītāni ⁴, yaññatthāya upaṭṭhitā.

19.

‘‘Ukkāmukhapahaṭṭhova , khadiraṅgārasannibho;

Udayantova sūriyo, puṇṇamāyeva ⁶ candimā.

20.

‘‘Siddhattho sabbasiddhattho, tilokamahito hito;

Upagantvāna sambuddho, idaṃ vacanamabravi.

21.

‘‘‘Ahiṃsā sabbapāṇīnaṃ, kumāra mama ruccati;

Theyyā ca aticārā ca, majjapānā ca ārati.

22.

‘‘‘Rati ca samacariyāya, bāhusaccaṃ kataññutā;

Diṭṭhe dhamme parattha ca, dhammā ete pasaṃsiyā.

23.

‘‘‘Ete dhamme bhāvayitvā, sabbasattahite rato ⁸;

Buddhe cittaṃ pasādetvā, bhāvehi maggamuttamaṃ’.

24.

‘‘Idaṃ vatvāna sabbaññū, lokajeṭṭho narāsabho;

Mamevaṃ anusāsitvā, vehāsaṃ uggato gato.

25.

‘‘Pubbe cittaṃ visodhetvā, pacchā cittaṃ pasādayiṃ;

Tena cittappasādena, tusitaṃ upapajjahaṃ.

26.

‘‘Catunnavutito kappe, yadā cittaṃ pasādayiṃ;

Duggatiṃ nābhijānāmi, buddhasaññāyidaṃ phalaṃ.

27.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā yaññasāmiko thero imā gāthāyo abhāsitthāti.

Yaññasāmikattherassāpadānaṃ catutthaṃ.