| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৩. যমকসুত্তৰণ্ণনা
3. Yamakasuttavaṇṇanā
৮৫. দিট্ঠি এৰ দিট্ঠিগতং ‘‘গূথগতং মুত্তগত’’ন্তি (ম॰ নি॰ ২.১১৯; অ॰ নি॰ ৯.১১) যথা। দিট্ঠিগতং নাম জাতং খন্ধৰিনিমুত্তস্স সত্তস্স গহিতত্তা।
85. Diṭṭhi eva diṭṭhigataṃ ‘‘gūthagataṃ muttagata’’nti (ma. ni. 2.119; a. ni. 9.11) yathā. Diṭṭhigataṃ nāma jātaṃ khandhavinimuttassa sattassa gahitattā.
কুপিতেতি দিট্ঠিসঙ্খাতরোগেন কুপিতে। পগ্গয্হাতি তেসং ভিক্খূনং সন্তিকে ৰিয থেরস্স সারিপুত্তস্স সম্মুখা অত্তনো লদ্ধিং পগ্গয্হ ‘‘এৰং খ্ৰাহ’’ন্তি এৰং নিচ্ছযেন ৰত্তুং অসক্কোন্তো।
Kupiteti diṭṭhisaṅkhātarogena kupite. Paggayhāti tesaṃ bhikkhūnaṃ santike viya therassa sāriputtassa sammukhā attano laddhiṃ paggayha ‘‘evaṃ khvāha’’nti evaṃ nicchayena vattuṃ asakkonto.
অনুযোগৰত্তং নাম যেন যুত্তো, তস্স অত্তনো গাহং নিজ্ঝানক্খন্তিযাৰ যাথাৰতো পৰেদনং। থেরস্স অনুযোগে ভুম্মন্তি ‘‘তং কিং মঞ্ঞসি, আৰুসো যমকা’’তিআদিনা থেরেন কথিতপুচ্ছায ভুম্মনিদ্দেসো। সচে তং আৰুসোতি ইদন্তি ‘‘সচে তং, আৰুসো’’তি এৰমাদিকং ইদং ৰচনং। এতন্তি যমকত্থেরং। অঞ্ঞন্তি অরহত্তং। ৰত্তব্বাকারেন ৰদন্তো অত্থতো অরহত্তং ব্যাকরোন্তো নাম হোতীতি অধিপ্পাযেন ৰদতি।
Anuyogavattaṃ nāma yena yutto, tassa attano gāhaṃ nijjhānakkhantiyāva yāthāvato pavedanaṃ. Therassa anuyoge bhummanti ‘‘taṃ kiṃ maññasi, āvuso yamakā’’tiādinā therena kathitapucchāya bhummaniddeso. Sace taṃ āvusoti idanti ‘‘sace taṃ, āvuso’’ti evamādikaṃ idaṃ vacanaṃ. Etanti yamakattheraṃ. Aññanti arahattaṃ. Vattabbākārena vadanto atthato arahattaṃ byākaronto nāma hotīti adhippāyena vadati.
এতস্স পঠমমগ্গস্সাতি এতস্স ইদানিযেৰ তিপরিৰট্টদেসনাৰসানে তযা অধিগতস্স পঠমমগ্গস্স । চতূহি যোগেহীতি অত্ততো পিযতো উদাসিনতো ৰেরিতোতি চতূহিপি উপ্পজ্জনঅনত্থযোগেহি।
Etassa paṭhamamaggassāti etassa idāniyeva tiparivaṭṭadesanāvasāne tayā adhigatassa paṭhamamaggassa . Catūhi yogehīti attato piyato udāsinato veritoti catūhipi uppajjanaanatthayogehi.
উপেতীতি তণ্হুপযদিট্ঠুপযেহি উপাদিযতি তণ্হাদিট্ঠিৰত্থুং পপ্পোতি। উপাদিযতীতি দল়্হগ্গাহং গণ্হাতি। অধিতিট্ঠতীতি অভিনিৰিস্স তিট্ঠতি। কিন্তি? ‘‘অত্তা মে’’তি। পচ্চত্থিকা মে এতেতি এতে রূপৰেদনাদযো পঞ্চুপাদানক্খন্ধা ময্হং পচ্চত্থিকা অনত্থাৰহত্তাতি ৰিপস্সনাঞাণেন ঞত্ৰা। ৰিপস্সনায যোজেত্ৰাতি ৰিপস্সনায খন্ধে যোজেত্ৰা।
Upetīti taṇhupayadiṭṭhupayehi upādiyati taṇhādiṭṭhivatthuṃ pappoti. Upādiyatīti daḷhaggāhaṃ gaṇhāti. Adhitiṭṭhatīti abhinivissa tiṭṭhati. Kinti? ‘‘Attā me’’ti. Paccatthikā me eteti ete rūpavedanādayo pañcupādānakkhandhā mayhaṃ paccatthikā anatthāvahattāti vipassanāñāṇena ñatvā. Vipassanāya yojetvāti vipassanāya khandhe yojetvā.
যমকসুত্তৰণ্ণনা নিট্ঠিতা।
Yamakasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৩. যমকসুত্তং • 3. Yamakasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩. যমকসুত্তৰণ্ণনা • 3. Yamakasuttavaṇṇanā
