| Library / Tipiṭaka / ತಿಪಿಟಕ • Tipiṭaka / ಥೇರೀಗಾಥಾ-ಅಟ್ಠಕಥಾ • Therīgāthā-aṭṭhakathā |
೧೬. ವುಡ್ಢಪಬ್ಬಜಿತಸುಮನಾಥೇರೀಗಾಥಾವಣ್ಣನಾ
16. Vuḍḍhapabbajitasumanātherīgāthāvaṇṇanā
ಸುಖಂ ತ್ವಂ ವುಡ್ಢಿಕೇ ಸೇಹೀತಿ ಸುಮನಾಯ ವುಡ್ಢಪಬ್ಬಜಿತಾಯ ಗಾಥಾ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರಾ ತತ್ಥ ತತ್ಥ ಭವೇ ಕುಸಲಂ ಉಪಚಿನಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಸಾವತ್ಥಿಯಂ ಮಹಾಕೋಸಲರಞ್ಞೋ ಭಗಿನೀ ಹುತ್ವಾ ನಿಬ್ಬತ್ತಿ। ಸಾ ಸತ್ಥಾರಾ ರಞ್ಞೋ ಪಸೇನದಿಸ್ಸ ಕೋಸಲಸ್ಸ ‘‘ಚತ್ತಾರೋ ಖೋ ಮೇ, ಮಹಾರಾಜ, ದಹರಾತಿ ನ ಉಞ್ಞಾತಬ್ಬಾ’’ತಿಆದಿನಾ (ಸಂ॰ ನಿ॰ ೧.೧೧೨) ದೇಸಿತಂ ಧಮ್ಮಂ ಸುತ್ವಾ ಲದ್ಧಪ್ಪಸಾದಾ ಸರಣೇಸು ಚ ಸೀಲೇಸು ಚ ಪತಿಟ್ಠಾಯ ಪಬ್ಬಜಿತುಕಾಮಾಪಿ ‘‘ಅಯ್ಯಿಕಂ ಪಟಿಜಗ್ಗಿಸ್ಸಾಮೀ’’ತಿ ಚಿರಕಾಲಂ ವೀತಿನಾಮೇತ್ವಾ ಅಪರಭಾಗೇ ಅಯ್ಯಿಕಾಯ ಕಾಲಙ್ಕತಾಯ ರಞ್ಞಾ ಸದ್ಧಿಂ ಮಹಗ್ಘಾನಿ ಅತ್ಥರಣಪಾವುರಣಾನಿ ಗಾಹಾಪೇತ್ವಾ ವಿಹಾರಂ ಗನ್ತ್ವಾ ಸಙ್ಘಸ್ಸ ದಾಪೇತ್ವಾ ಸತ್ಥು ಸನ್ತಿಕೇ ಧಮ್ಮಂ ಸುತ್ವಾ ಅನಾಗಾಮಿಫಲೇ ಪತಿಟ್ಠಿತಾ ಪಬ್ಬಜ್ಜಂ ಯಾಚಿ। ಸತ್ಥಾ ತಸ್ಸಾ ಞಾಣಪರಿಪಾಕಂ ದಿಸ್ವಾ –
Sukhaṃ tvaṃ vuḍḍhike sehīti sumanāya vuḍḍhapabbajitāya gāthā. Ayampi purimabuddhesu katādhikārā tattha tattha bhave kusalaṃ upacinitvā imasmiṃ buddhuppāde sāvatthiyaṃ mahākosalarañño bhaginī hutvā nibbatti. Sā satthārā rañño pasenadissa kosalassa ‘‘cattāro kho me, mahārāja, daharāti na uññātabbā’’tiādinā (saṃ. ni. 1.112) desitaṃ dhammaṃ sutvā laddhappasādā saraṇesu ca sīlesu ca patiṭṭhāya pabbajitukāmāpi ‘‘ayyikaṃ paṭijaggissāmī’’ti cirakālaṃ vītināmetvā aparabhāge ayyikāya kālaṅkatāya raññā saddhiṃ mahagghāni attharaṇapāvuraṇāni gāhāpetvā vihāraṃ gantvā saṅghassa dāpetvā satthu santike dhammaṃ sutvā anāgāmiphale patiṭṭhitā pabbajjaṃ yāci. Satthā tassā ñāṇaparipākaṃ disvā –
೧೬.
16.
‘‘ಸುಖಂ ತ್ವಂ ವುಡ್ಢಿಕೇ ಸೇಹಿ, ಕತ್ವಾ ಚೋಳೇನ ಪಾರುತಾ।
‘‘Sukhaṃ tvaṃ vuḍḍhike sehi, katvā coḷena pārutā;
ಉಪಸನ್ತೋ ಹಿ ತೇ ರಾಗೋ, ಸೀತಿಭೂತಾಸಿ ನಿಬ್ಬುತಾ’’ತಿ॥ –
Upasanto hi te rāgo, sītibhūtāsi nibbutā’’ti. –
ಇಮಂ ಗಾಥಂ ಅಭಾಸಿ। ಸಾ ಗಾಥಾಪರಿಯೋಸಾನೇ ಸಹ ಪಟಿಸಮ್ಭಿದಾಹಿ ಅರಹತ್ತಂ ಪತ್ವಾ ಉದಾನವಸೇನ ತಮೇವ ಗಾಥಂ ಅಭಾಸಿ। ಇದಮೇವ ಚಸ್ಸಾ ಅಞ್ಞಾಬ್ಯಾಕರಣಂ ಅಹೋಸಿ, ಸಾ ತಾವದೇವ ಪಬ್ಬಜಿ। ಗಾಥಾಯ ಪನ ವುಡ್ಢಿಕೇತಿ ವುಡ್ಢೇ, ವಯೋವುಡ್ಢೇತಿ ಅತ್ಥೋ। ಅಯಂ ಪನ ಸೀಲಾದಿಗುಣೇಹಿಪಿ ವುಡ್ಢಾ, ಥೇರಿಯಾ ವುತ್ತಗಾಥಾಯ ಚತುತ್ಥಪಾದೇ ಸೀತಿಭೂತಾಸಿ ನಿಬ್ಬುತಾತಿ ಯೋಜೇತಬ್ಬಂ। ಸೇಸಂ ವುತ್ತನಯಮೇವ।
Imaṃ gāthaṃ abhāsi. Sā gāthāpariyosāne saha paṭisambhidāhi arahattaṃ patvā udānavasena tameva gāthaṃ abhāsi. Idameva cassā aññābyākaraṇaṃ ahosi, sā tāvadeva pabbaji. Gāthāya pana vuḍḍhiketi vuḍḍhe, vayovuḍḍheti attho. Ayaṃ pana sīlādiguṇehipi vuḍḍhā, theriyā vuttagāthāya catutthapāde sītibhūtāsi nibbutāti yojetabbaṃ. Sesaṃ vuttanayameva.
ವುಡ್ಢಪಬ್ಬಜಿತಸುಮನಾಥೇರೀಗಾಥಾವಣ್ಣನಾ ನಿಟ್ಠಿತಾ।
Vuḍḍhapabbajitasumanātherīgāthāvaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಥೇರೀಗಾಥಾಪಾಳಿ • Therīgāthāpāḷi / ೧೬. ವುಡ್ಢಪಬ್ಬಜಿತಸುಮನಾಥೇರೀಗಾಥಾ • 16. Vuḍḍhapabbajitasumanātherīgāthā
