| Library / Tipiṭaka / तिपिटक • Tipiṭaka / पञ्चपकरण-अनुटीका • Pañcapakaraṇa-anuṭīkā |
१०. वोहारकथावण्णना
10. Vohārakathāvaṇṇanā
३४७. विसयविसयीसूति रूपचक्खादिके सन्धायाह। ते हि रूपक्खन्धपरियापन्नत्ता एकन्तेन लोकिया। विसयस्सेवाति सद्दस्सेव। सो हि वोहरितब्बतो वोहारकरणताय च ‘‘वोहारो’’ति पाळियं वुत्तो। नत्थेत्थ कारणं विसयीनं विसयस्सपि आसवादिअनारम्मणताभावतो। असिद्धलोकुत्तरभावस्स एकन्तसासवत्ता तस्स सद्दायतनस्स यथा लोकुत्तरता तव मतेनाति अधिप्पायो।
347. Visayavisayīsūti rūpacakkhādike sandhāyāha. Te hi rūpakkhandhapariyāpannattā ekantena lokiyā. Visayassevāti saddasseva. So hi voharitabbato vohārakaraṇatāya ca ‘‘vohāro’’ti pāḷiyaṃ vutto. Natthettha kāraṇaṃ visayīnaṃ visayassapi āsavādianārammaṇatābhāvato. Asiddhalokuttarabhāvassa ekantasāsavattā tassa saddāyatanassa yathā lokuttaratā tava matenāti adhippāyo.
पटिहञ्ञेय्याति इदं परिकप्पवचनं। परिकप्पवचनञ्च अयाथावन्ति आह ‘‘न हि…पे॰… अत्थी’’ति। न हि जलं अनलन्ति परिकप्पितं दहति पचति वा। किं लोकियेन ञाणेन जानितब्बतो लोकियो रूपायतनादि विय, उदाहु लोकुत्तरो पच्चवेक्खियमानमग्गादि वियाति एवमेत्थ हेतुस्स अनेकन्तभावो वेदितब्बो। तेनाह ‘‘लोकिये लोकुत्तरे च सम्भवतो’’ति।
Paṭihaññeyyāti idaṃ parikappavacanaṃ. Parikappavacanañca ayāthāvanti āha ‘‘na hi…pe… atthī’’ti. Na hi jalaṃ analanti parikappitaṃ dahati pacati vā. Kiṃ lokiyena ñāṇena jānitabbato lokiyo rūpāyatanādi viya, udāhu lokuttaro paccavekkhiyamānamaggādi viyāti evamettha hetussa anekantabhāvo veditabbo. Tenāha ‘‘lokiye lokuttare ca sambhavato’’ti.
वोहारकथावण्णना निट्ठिता।
Vohārakathāvaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / अभिधम्मपिटक • Abhidhammapiṭaka / कथावत्थुपाळि • Kathāvatthupāḷi / (१९) १०. वोहारकथा • (19) 10. Vohārakathā
अट्ठकथा • Aṭṭhakathā / अभिधम्मपिटक (अट्ठकथा) • Abhidhammapiṭaka (aṭṭhakathā) / पञ्चपकरण-अट्ठकथा • Pañcapakaraṇa-aṭṭhakathā / १०. वोहारकथावण्णना • 10. Vohārakathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-मूलटीका • Pañcapakaraṇa-mūlaṭīkā / १०. वोहारकथावण्णना • 10. Vohārakathāvaṇṇanā
