| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၉. ဝနသံယုတ္တံ
9. Vanasaṃyuttaṃ
၁. ဝိဝေကသုတ္တဝဏ္ဏနာ
1. Vivekasuttavaṇṇanā
၂၂၁. ဝနသံယုတ္တသ္သ ပဌမေ ကောသလေသု ဝိဟရတီတိ သတ္ထု သန္တိကေ ကမ္မဋ္ဌာနံ ဂဟေတ္ဝာ တသ္သ ဇနပဒသ္သ သုလဘဘိက္ခတာယ တတ္ထ ဂန္တ္ဝာ ဝိဟရတိ။ သံဝေဇေတုကာမာတိ ဝိဝေကံ ပဋိပဇ္ဇာပေတုကာမာ။ ဝိဝေကကာမောတိ တယော ဝိဝေကေ ပတ္ထယန္တော။ နိစ္ဆရတီ ဗဟိဒ္ဓာတိ ဗာဟိရေသု ပုထုတ္တာရမ္မဏေသု စရတိ။ ဇနော ဇနသ္မိန္တိ တ္ဝံ ဇနော အညသ္မိံ ဇနေ ဆန္ဒရာဂံ ဝိနယသ္သု။ ပဇဟာသီတိ ပဇဟ။ ဘဝာသီတိ ဘဝ။ သတံ တံ သာရယာမသေတိ သတိမန္တံ ပဏ္ဍိတံ တံ မယမ္ပိ သာရယာမ, သတံ ဝာ ဓမ္မံ မယံ တံ သာရယာမာတိ အတ္ထော။ ပာတာလရဇောတိ အပ္ပတိဋ္ဌဋ္ဌေန ပာတာလသင္ခာတော ကိလေသရဇော။ မာ တံ ကာမရဇောတိ အယံ ကာမရာဂရဇော တံ မာ အဝဟရိ, အပာယမေဝ မာ နေတူတိ အတ္ထော။ ပံသုကုန္ထိတောတိ ပံသုမက္ခိတော။ ဝိဓုနန္တိ ဝိဓုနန္တော။ သိတံ ရဇန္တိ သရီရလဂ္ဂံ ရဇံ။ သံဝေဂမာပာဒီတိ ဒေဝတာပိ နာမ မံ ဧဝံ သာရေတီတိ ဝိဝေကမာပန္နော, ဥတ္တမဝီရိယံ ဝာ ပဂ္ဂယ္ဟ ပရမဝိဝေကံ မဂ္ဂမေဝ ပဋိပန္နောတိ။ ပဌမံ။
221. Vanasaṃyuttassa paṭhame kosalesu viharatīti satthu santike kammaṭṭhānaṃ gahetvā tassa janapadassa sulabhabhikkhatāya tattha gantvā viharati. Saṃvejetukāmāti vivekaṃ paṭipajjāpetukāmā. Vivekakāmoti tayo viveke patthayanto. Niccharatī bahiddhāti bāhiresu puthuttārammaṇesu carati. Jano janasminti tvaṃ jano aññasmiṃ jane chandarāgaṃ vinayassu. Pajahāsīti pajaha. Bhavāsīti bhava. Sataṃ taṃ sārayāmaseti satimantaṃ paṇḍitaṃ taṃ mayampi sārayāma, sataṃ vā dhammaṃ mayaṃ taṃ sārayāmāti attho. Pātālarajoti appatiṭṭhaṭṭhena pātālasaṅkhāto kilesarajo. Mā taṃ kāmarajoti ayaṃ kāmarāgarajo taṃ mā avahari, apāyameva mā netūti attho. Paṃsukunthitoti paṃsumakkhito. Vidhunanti vidhunanto. Sitaṃ rajanti sarīralaggaṃ rajaṃ. Saṃvegamāpādīti devatāpi nāma maṃ evaṃ sāretīti vivekamāpanno, uttamavīriyaṃ vā paggayha paramavivekaṃ maggameva paṭipannoti. Paṭhamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. ဝိဝေကသုတ္တံ • 1. Vivekasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁. ဝိဝေကသုတ္တဝဏ္ဏနာ • 1. Vivekasuttavaṇṇanā
