| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૯. વનસંયુત્તં
9. Vanasaṃyuttaṃ
૧. વિવેકસુત્તવણ્ણના
1. Vivekasuttavaṇṇanā
૨૨૧. સંવેજેતુકામાતિ અત્થતો સંવેગં ઉપ્પાદેતુકામા. તથાભૂતા નં કિલેસસઙ્ગણિકાદિતો વિવેચેતુકામા નામ હોતીતિ વુત્તં ‘‘વિવેકં પટિપજ્જાપેતુકામા’’તિ. બાહિરેસૂતિ ગોચરજ્ઝત્તતો બહિભૂતેસુ. પુથુત્તારમ્મણેસૂતિ રૂપાદિનાનારમ્મણેસુ. ચરતીતિ પવત્તતિ. ત્વં જનોતિ ત્વં અત્તનો કિલેસેહિ જનનતો વિસું જાતો તાદિસે એવ અઞ્ઞસ્મિં જને ઇમં અયોનિસોમનસિકારવસેન પવત્તમાનં છન્દરાગં વિનયસ્સુ વિનોદેહિ. સતં તં સારયામસેતિ નિય્યાનિકસાસને પબ્બજિત્વા સત્થુ સન્તિકે કમ્મટ્ઠાનં ગહેત્વા અરઞ્ઞવાસેન ચ સતિમન્તં પણ્ડિતં તં મયમ્પિ યથાઉપ્પન્નં વિતક્કં વિનોદનાય સારયામ, સતં વા સપ્પુરિસાનં કિલેસવિગમનધમ્મં પટિપજ્જિત્વા વસન્તં તં સારયામ વટ્ટદુક્ખં. પાતાલન્તિ મોહપાતાલં કિલેસરજો, તદેવ ‘‘પાતાલ’’ન્તિ વુત્તં. મા અવહરીતિ હેટ્ઠા દુગ્ગતિસોતં મા ઉપનેસિ. સિતન્તિ સમ્બન્ધં. તેનાહ ‘‘સરીરલગ્ગ’’ન્તિ. વિવેકમાપન્નોતિ કિલેસવિવેકં સમથવિપસ્સનાભાવનમાપન્નો. ઉત્તમવીરિયન્તિ ઉસ્સોળ્હિલક્ખણપ્પત્તં વીરિયં, ચતુબ્બિધં સમપ્પધાનવીરિયં વા સમ્પત્તં. પગ્ગય્હાતિ આરોપેત્વા. પરમવિવેકન્તિ પરમં સમુચ્છેદવિવેકં.
221.Saṃvejetukāmāti atthato saṃvegaṃ uppādetukāmā. Tathābhūtā naṃ kilesasaṅgaṇikādito vivecetukāmā nāma hotīti vuttaṃ ‘‘vivekaṃ paṭipajjāpetukāmā’’ti. Bāhiresūti gocarajjhattato bahibhūtesu. Puthuttārammaṇesūti rūpādinānārammaṇesu. Caratīti pavattati. Tvaṃ janoti tvaṃ attano kilesehi jananato visuṃ jāto tādise eva aññasmiṃ jane imaṃ ayonisomanasikāravasena pavattamānaṃ chandarāgaṃ vinayassu vinodehi. Sataṃ taṃ sārayāmaseti niyyānikasāsane pabbajitvā satthu santike kammaṭṭhānaṃ gahetvā araññavāsena ca satimantaṃ paṇḍitaṃ taṃ mayampi yathāuppannaṃ vitakkaṃ vinodanāya sārayāma, sataṃ vā sappurisānaṃ kilesavigamanadhammaṃ paṭipajjitvā vasantaṃ taṃ sārayāma vaṭṭadukkhaṃ. Pātālanti mohapātālaṃ kilesarajo, tadeva ‘‘pātāla’’nti vuttaṃ. Mā avaharīti heṭṭhā duggatisotaṃ mā upanesi. Sitanti sambandhaṃ. Tenāha ‘‘sarīralagga’’nti. Vivekamāpannoti kilesavivekaṃ samathavipassanābhāvanamāpanno. Uttamavīriyanti ussoḷhilakkhaṇappattaṃ vīriyaṃ, catubbidhaṃ samappadhānavīriyaṃ vā sampattaṃ. Paggayhāti āropetvā. Paramavivekanti paramaṃ samucchedavivekaṃ.
વિવેકસુત્તવણ્ણના નિટ્ઠિતા.
Vivekasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૧. વિવેકસુત્તં • 1. Vivekasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૧. વિવેકસુત્તવણ્ણના • 1. Vivekasuttavaṇṇanā
