| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၃. ဝိတ္တသုတ္တဝဏ္ဏနာ
3. Vittasuttavaṇṇanā
၇၃. တတိယေ သဒ္ဓီဓ ဝိတ္တန္တိ ယသ္မာ သဒ္ဓော သဒ္ဓာယ မုတ္တမဏိအာဒီနိပိ ဝိတ္တာနိ လဘတိ, တိသ္သောပိ ကုလသမ္ပဒာ, ဆ ကာမသဂ္ဂာနိ, နဝ ဗ္ရဟ္မလောကေ ပတ္ဝာ ပရိယောသာနေ အမတမဟာနိဗ္ဗာနဒသ္သနမ္ပိ လဘတိ, တသ္မာ မဏိမုတ္တာဒီဟိ ဝိတ္တေဟိ သဒ္ဓာဝိတ္တမေဝ သေဋ္ဌံ။ ဓမ္မောတိ ဒသကုသလကမ္မပထော။ သုခမာဝဟတီတိ သဗ္ဗမ္ပိ သာသဝာနာသဝံ အသံကိလိဋ္ဌသုခံ အာဝဟတိ။ သာဒုတရန္တိ လောကသ္မိံ လောဏမ္ဗိလာဒီနံ သဗ္ဗရသာနံ သစ္စမေဝ မဓုရတရံ။ သစ္စသ္မိံ ဟိ ဌိတာ သီဃဝေဂံ နဒိမ္ပိ နိဝတ္တေန္တိ, ဝိသမ္ပိ နိမ္မဒ္ဒေန္တိ, အဂ္ဂိမ္ပိ ပဋိဗာဟန္တိ, ဒေဝမ္ပိ ဝသ္သာပေန္တိ, တသ္မာ တံ သဗ္ဗရသာနံ မဓုရတရန္တိ ဝုတ္တံ။ ပညာဇီဝိံ ဇီဝိတမာဟု သေဋ္ဌန္တိ ယော ပညာဇီဝီ ဂဟဋ္ဌော သမာနော ပဉ္စသု သီလေသု ပတိဋ္ဌာယ သလာကဘတ္တာဒီနိ ပဋ္ဌပေတ္ဝာ ပညာယ ဇီဝတိ, ပဗ္ဗဇိတော ဝာ ပန ဓမ္မေန ဥပ္ပန္နေ ပစ္စယေ ‘‘ဣဒမတ္ထ’’န္တိ ပစ္စဝေက္ခိတ္ဝာ ပရိဘုဉ္ဇန္တော ကမ္မဋ္ဌာနံ အာဒာယ ဝိပသ္သနံ ပဋ္ဌပေတ္ဝာ အရိယဖလာဓိဂမဝသေန ပညာယ ဇီဝတိ, တံ ပညာဇီဝိံ ပုဂ္ဂလံ သေဋ္ဌံ ဇီဝိတံ ဇီဝတီတိ အာဟု။ တတိယံ။
73. Tatiye saddhīdha vittanti yasmā saddho saddhāya muttamaṇiādīnipi vittāni labhati, tissopi kulasampadā, cha kāmasaggāni, nava brahmaloke patvā pariyosāne amatamahānibbānadassanampi labhati, tasmā maṇimuttādīhi vittehi saddhāvittameva seṭṭhaṃ. Dhammoti dasakusalakammapatho. Sukhamāvahatīti sabbampi sāsavānāsavaṃ asaṃkiliṭṭhasukhaṃ āvahati. Sādutaranti lokasmiṃ loṇambilādīnaṃ sabbarasānaṃ saccameva madhurataraṃ. Saccasmiṃ hi ṭhitā sīghavegaṃ nadimpi nivattenti, visampi nimmaddenti, aggimpi paṭibāhanti, devampi vassāpenti, tasmā taṃ sabbarasānaṃ madhurataranti vuttaṃ. Paññājīviṃ jīvitamāhu seṭṭhanti yo paññājīvī gahaṭṭho samāno pañcasu sīlesu patiṭṭhāya salākabhattādīni paṭṭhapetvā paññāya jīvati, pabbajito vā pana dhammena uppanne paccaye ‘‘idamattha’’nti paccavekkhitvā paribhuñjanto kammaṭṭhānaṃ ādāya vipassanaṃ paṭṭhapetvā ariyaphalādhigamavasena paññāya jīvati, taṃ paññājīviṃ puggalaṃ seṭṭhaṃ jīvitaṃ jīvatīti āhu. Tatiyaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၃. ဝိတ္တသုတ္တံ • 3. Vittasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၃. ဝိတ္တသုတ္တဝဏ္ဏနာ • 3. Vittasuttavaṇṇanā
