| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৭. ৰিতক্কসুত্তং
7. Vitakkasuttaṃ
১০৭৭. ‘‘মা, ভিক্খৰে, পাপকে অকুসলে ৰিতক্কে ৰিতক্কেয্যাথ 1, সেয্যথিদং – কামৰিতক্কং, ব্যাপাদৰিতক্কং, ৰিহিংসাৰিতক্কং। তং কিস্স হেতু? নেতে, ভিক্খৰে, ৰিতক্কা অত্থসংহিতা নাদিব্রহ্মচরিযকা ন নিব্বিদায ন ৰিরাগায ন নিরোধায ন উপসমায ন অভিঞ্ঞায ন সম্বোধায ন নিব্বানায সংৰত্তন্তি।
1077. ‘‘Mā, bhikkhave, pāpake akusale vitakke vitakkeyyātha 2, seyyathidaṃ – kāmavitakkaṃ, byāpādavitakkaṃ, vihiṃsāvitakkaṃ. Taṃ kissa hetu? Nete, bhikkhave, vitakkā atthasaṃhitā nādibrahmacariyakā na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattanti.
‘‘ৰিতক্কেন্তা চ খো তুম্হে, ভিক্খৰে, ‘ইদং দুক্খ’ন্তি ৰিতক্কেয্যাথ, ‘অযং দুক্খসমুদযো’তি ৰিতক্কেয্যাথ, ‘অযং দুক্খনিরোধো’তি ৰিতক্কেয্যাথ, ‘অযং দুক্খনিরোধগামিনী পটিপদা’তি ৰিতক্কেয্যাথ। তং কিস্স হেতু? এতে, ভিক্খৰে, ৰিতক্কা অত্থসংহিতা এতে আদিব্রহ্মচরিযকা এতে নিব্বিদায ৰিরাগায নিরোধায উপসমায অভিঞ্ঞায সম্বোধায নিব্বানায সংৰত্তন্তি।
‘‘Vitakkentā ca kho tumhe, bhikkhave, ‘idaṃ dukkha’nti vitakkeyyātha, ‘ayaṃ dukkhasamudayo’ti vitakkeyyātha, ‘ayaṃ dukkhanirodho’ti vitakkeyyātha, ‘ayaṃ dukkhanirodhagāminī paṭipadā’ti vitakkeyyātha. Taṃ kissa hetu? Ete, bhikkhave, vitakkā atthasaṃhitā ete ādibrahmacariyakā ete nibbidāya virāgāya nirodhāya upasamāya abhiññāya sambodhāya nibbānāya saṃvattanti.
‘‘তস্মাতিহ, ভিক্খৰে, ‘ইদং দুক্খ’ন্তি যোগো করণীযো…পে॰… ‘অযং দুক্খনিরোধগামিনী পটিপদা’তি যোগো করণীযো’’তি। সত্তমং।
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Sattamaṃ.
Footnotes:
