| Library / Tipiṭaka / তিপিটক • Tipiṭaka / থেরীগাথা-অট্ঠকথা • Therīgāthā-aṭṭhakathā |
১৩. ৰিসাখাথেরীগাথাৰণ্ণনা
13. Visākhātherīgāthāvaṇṇanā
করোথ বুদ্ধসাসনন্তি ৰিসাখায থেরিযা গাথা। তস্সা ৰত্থু ধীরাথেরিযাৰত্থুসদিসমেৰ। সা অরহত্তং পত্ৰা ৰিমুত্তিসুখেন ৰীতিনামেন্তী –
Karothabuddhasāsananti visākhāya theriyā gāthā. Tassā vatthu dhīrātheriyāvatthusadisameva. Sā arahattaṃ patvā vimuttisukhena vītināmentī –
১৩.
13.
‘‘করোথ বুদ্ধসাসনং, যং কত্ৰা নানুতপ্পতি।
‘‘Karotha buddhasāsanaṃ, yaṃ katvā nānutappati;
খিপ্পং পাদানি ধোৰিত্ৰা, একমন্তে নিসীদথা’’তি॥ –
Khippaṃ pādāni dhovitvā, ekamante nisīdathā’’ti. –
ইমায গাথায অঞ্ঞং ব্যাকাসি।
Imāya gāthāya aññaṃ byākāsi.
তত্থ করোথ বুদ্ধসাসনন্তি বুদ্ধসাসনং ওৰাদঅনুসিট্ঠিং করোথ, যথানুসিট্ঠং পটিপজ্জথাতি অত্থো। যং কত্ৰা নানুতপ্পতীতি অনুসিট্ঠিং কত্ৰা করণহেতু ন অনুতপ্পতি তক্করস্স সম্মদেৰ অধিপ্পাযানং সমিজ্ঝনতো। খিপ্পং পাদানি ধোৰিত্ৰা, একমন্তে নিসীদথাতি ইদং যস্মা সযং পচ্ছাভত্তং পিণ্ডপাতপটিক্কন্তা আচরিযুপজ্ঝাযানং ৰত্তং দস্সেত্ৰা অত্তনো দিৰাট্ঠানে পাদে ধোৰিত্ৰা রহো নিসিন্না সদত্থং মত্থকং পাপেসি, তস্মা তত্থ অঞ্ঞেপি নিযোজেন্তী অৰোচ।
Tattha karotha buddhasāsananti buddhasāsanaṃ ovādaanusiṭṭhiṃ karotha, yathānusiṭṭhaṃ paṭipajjathāti attho. Yaṃ katvā nānutappatīti anusiṭṭhiṃ katvā karaṇahetu na anutappati takkarassa sammadeva adhippāyānaṃ samijjhanato. Khippaṃ pādāni dhovitvā, ekamante nisīdathāti idaṃ yasmā sayaṃ pacchābhattaṃ piṇḍapātapaṭikkantā ācariyupajjhāyānaṃ vattaṃ dassetvā attano divāṭṭhāne pāde dhovitvā raho nisinnā sadatthaṃ matthakaṃ pāpesi, tasmā tattha aññepi niyojentī avoca.
ৰিসাখাথেরীগাথাৰণ্ণনা নিট্ঠিতা।
Visākhātherīgāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরীগাথাপাল়ি • Therīgāthāpāḷi / ১৩.ৰিসাখাথেরীগাথা • 13.Visākhātherīgāthā
