| Library / Tipiṭaka / તિપિટક • Tipiṭaka / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) |
૮. વિસાખસુત્તવણ્ણના
8. Visākhasuttavaṇṇanā
૪૮. અટ્ઠમે પઞ્ચાલપુત્તોતિ પઞ્ચાલબ્રાહ્મણિયા પુત્તો. પોરિયા વાચાયાતિ પરિપુણ્ણવાચાય. વિસ્સટ્ઠાયાતિ અપલિબુદ્ધાય. અનેલગલાયાતિ નિદ્દોસાય ચેવ અગળિતાય ચ અપતિતપદબ્યઞ્જનાય. પરિયાપન્નાયાતિ વિવટ્ટપરિયાપન્નાય. અનિસ્સિતાયાતિ વટ્ટં અનિસ્સિતાય. વિવટ્ટનિસ્સિતમેવ કત્વા કથેતિ, વટ્ટનિસ્સિતં કત્વા ન કથેતીતિ અયમેત્થ અધિપ્પાયો.
48. Aṭṭhame pañcālaputtoti pañcālabrāhmaṇiyā putto. Poriyā vācāyāti paripuṇṇavācāya. Vissaṭṭhāyāti apalibuddhāya. Anelagalāyāti niddosāya ceva agaḷitāya ca apatitapadabyañjanāya. Pariyāpannāyāti vivaṭṭapariyāpannāya. Anissitāyāti vaṭṭaṃ anissitāya. Vivaṭṭanissitameva katvā katheti, vaṭṭanissitaṃ katvā na kathetīti ayamettha adhippāyo.
નાભાસમાનન્તિ ન અકથેન્તં. અમતં પદન્તિ નિબ્બાનપદં. ભાસયેતિ ઓભાસેય્ય. જોતયેતિ તસ્સેવ વેવચનં. પગ્ગણ્હે ઇસિનં ધજન્તિ અબ્ભુગ્ગતટ્ઠેન નવલોકુત્તરધમ્મો ઇસીનં ધજો નામ વુચ્ચતિ, તમેવ પગ્ગણ્હેય્ય ઉક્ખિપેય્ય, ઉચ્ચં કત્વા કથેય્યાતિ અત્થો. નવલોકુત્તરધમ્મદીપકં સુભાસિતં ધજો એતેસન્તિ સુભાસિતધજા. ઇસયોતિ બુદ્ધાદયો અરિયા. ધમ્મો હિ ઇસિનં ધજોતિ હેટ્ઠા વુત્તનયેનેવ લોકુત્તરધમ્મો ઇસીનં ધજો નામાતિ.
Nābhāsamānanti na akathentaṃ. Amataṃ padanti nibbānapadaṃ. Bhāsayeti obhāseyya. Jotayeti tasseva vevacanaṃ. Paggaṇhe isinaṃ dhajanti abbhuggataṭṭhena navalokuttaradhammo isīnaṃ dhajo nāma vuccati, tameva paggaṇheyya ukkhipeyya, uccaṃ katvā katheyyāti attho. Navalokuttaradhammadīpakaṃ subhāsitaṃ dhajo etesanti subhāsitadhajā. Isayoti buddhādayo ariyā. Dhammo hi isinaṃ dhajoti heṭṭhā vuttanayeneva lokuttaradhammo isīnaṃ dhajo nāmāti.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૮. વિસાખસુત્તં • 8. Visākhasuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૮. વિસાખસુત્તવણ્ણના • 8. Visākhasuttavaṇṇanā
