| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
១២. វីរិយលក្ខណបញ្ហោ
12. Vīriyalakkhaṇapañho
១២. រាជា អាហ ‘‘ភន្តេ នាគសេន, កិំលក្ខណំ វីរិយ’’ន្តិ? ‘‘ឧបត្ថម្ភនលក្ខណំ, មហារាជ, វីរិយំ, វីរិយូបត្ថម្ភិតា សព្ពេ កុសលា ធម្មា ន បរិហាយន្តី’’តិ។
12. Rājā āha ‘‘bhante nāgasena, kiṃlakkhaṇaṃ vīriya’’nti? ‘‘Upatthambhanalakkhaṇaṃ, mahārāja, vīriyaṃ, vīriyūpatthambhitā sabbe kusalā dhammā na parihāyantī’’ti.
‘‘ឱបម្មំ ករោហី’’តិ។ ‘‘យថា, មហារាជ, បុរិសោ គេហេ បតន្តេ អញ្ញេន ទារុនា ឧបត្ថម្ភេយ្យ, ឧបត្ថម្ភិតំ សន្តំ ឯវំ តំ គេហំ ន បតេយ្យ។ ឯវមេវ ខោ, មហារាជ, ឧបត្ថម្ភនលក្ខណំ វីរិយំ, វីរិយូបត្ថម្ភិតា សព្ពេ កុសលា ធម្មា ន បរិហាយន្តី’’តិ។
‘‘Opammaṃ karohī’’ti. ‘‘Yathā, mahārāja, puriso gehe patante aññena dārunā upatthambheyya, upatthambhitaṃ santaṃ evaṃ taṃ gehaṃ na pateyya. Evameva kho, mahārāja, upatthambhanalakkhaṇaṃ vīriyaṃ, vīriyūpatthambhitā sabbe kusalā dhammā na parihāyantī’’ti.
‘‘ភិយ្យោ ឱបម្មំ ករោហី’’តិ។ ‘‘យថា, មហារាជ, បរិត្តកំ សេនំ មហតី សេនា ភញ្ជេយ្យ, តតោ រាជា អញ្ញមញ្ញំ អនុស្សារេយ្យ អនុបេសេយ្យ អត្តនោ បរិត្តកាយ សេនាយ ពលំ អនុបទំ ទទេយ្យ, តាយ សទ្ធិំ បរិត្តកា សេនា មហតិំ សេនំ ភញ្ជេយ្យ។ ឯវមេវ ខោ, មហារាជ, ឧបត្ថម្ភនលក្ខណំ វីរិយំ, វីរិយូបត្ថម្ភិតា សព្ពេ កុសលា ធម្មា ន បរិហាយន្តិ។ ភាសិតម្បេតំ , មហារាជ, ភគវតា – ‘វីរិយវា ខោ, ភិក្ខវេ, អរិយសាវកោ អកុសលំ បជហតិ, កុសលំ ភាវេតិ។ សាវជ្ជំ បជហតិ, អនវជ្ជំ ភាវេតិ។ សុទ្ធមត្តានំ បរិហរតី’’’តិ។
‘‘Bhiyyo opammaṃ karohī’’ti. ‘‘Yathā, mahārāja, parittakaṃ senaṃ mahatī senā bhañjeyya, tato rājā aññamaññaṃ anussāreyya anupeseyya attano parittakāya senāya balaṃ anupadaṃ dadeyya, tāya saddhiṃ parittakā senā mahatiṃ senaṃ bhañjeyya. Evameva kho, mahārāja, upatthambhanalakkhaṇaṃ vīriyaṃ, vīriyūpatthambhitā sabbe kusalā dhammā na parihāyanti. Bhāsitampetaṃ , mahārāja, bhagavatā – ‘vīriyavā kho, bhikkhave, ariyasāvako akusalaṃ pajahati, kusalaṃ bhāveti. Sāvajjaṃ pajahati, anavajjaṃ bhāveti. Suddhamattānaṃ pariharatī’’’ti.
‘‘កល្លោសិ, ភន្តេ នាគសេនា’’តិ។
‘‘Kallosi, bhante nāgasenā’’ti.
វីរិយលក្ខណបញ្ហោ ទ្វាទសមោ។
Vīriyalakkhaṇapañho dvādasamo.
