| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
១០. ទសមវគ្គោ
10. Dasamavaggo
(១០៤) ១០. វិញ្ញត្តិ សីលន្តិកថា
(104) 10. Viññatti sīlantikathā
៦០១. វិញ្ញត្តិ សីលន្តិ? អាមន្តា។ បាណាតិបាតា វេរមណីតិ? ន ហេវំ វត្តព្ពេ…បេ.… អទិន្នាទានា វេរមណីតិ? ន ហេវំ វត្តព្ពេ…បេ.… កាមេសុមិច្ឆាចារា វេរមណីតិ? ន ហេវំ វត្តព្ពេ …បេ.… មុសាវាទា វេរមណីតិ? ន ហេវំ វត្តព្ពេ…បេ.… សុរាមេរយមជ្ជបមាទដ្ឋានា វេរមណីតិ? ន ហេវំ វត្តព្ពេ…បេ.…។
601. Viññatti sīlanti? Āmantā. Pāṇātipātā veramaṇīti? Na hevaṃ vattabbe…pe… adinnādānā veramaṇīti? Na hevaṃ vattabbe…pe… kāmesumicchācārā veramaṇīti? Na hevaṃ vattabbe …pe… musāvādā veramaṇīti? Na hevaṃ vattabbe…pe… surāmerayamajjapamādaṭṭhānā veramaṇīti? Na hevaṃ vattabbe…pe….
អភិវាទនំ សីលំ, បច្ចុដ្ឋានំ សីលំ, អញ្ជលិកម្មំ សីលំ, សាមីចិកម្មំ សីលំ, អាសនាភិហារោ សីលំ, សេយ្យាភិហារោ សីលំ, បាទោទកាភិហារោ សីលំ, បាទកថលិកាភិហារោ សីលំ, ន្ហានេ បិដ្ឋិបរិកម្មំ សីលន្តិ? អាមន្តា ។ បាណាតិបាតា វេរមណីតិ? ន ហេវំ វត្តព្ពេ…បេ.… សុរាមេរយមជ្ជបមាទដ្ឋានា វេរមណីតិ? ន ហេវំ វត្តព្ពេ…បេ.…។
Abhivādanaṃ sīlaṃ, paccuṭṭhānaṃ sīlaṃ, añjalikammaṃ sīlaṃ, sāmīcikammaṃ sīlaṃ, āsanābhihāro sīlaṃ, seyyābhihāro sīlaṃ, pādodakābhihāro sīlaṃ, pādakathalikābhihāro sīlaṃ, nhāne piṭṭhiparikammaṃ sīlanti? Āmantā . Pāṇātipātā veramaṇīti? Na hevaṃ vattabbe…pe… surāmerayamajjapamādaṭṭhānā veramaṇīti? Na hevaṃ vattabbe…pe….
៦០២. ន វត្តព្ពំ – ‘‘វិញ្ញត្តិ សីល’’ន្តិ? អាមន្តា។ ទុស្សិល្យន្តិ? ន ហេវំ វត្តព្ពេ…បេ.… តេន ហិ វិញ្ញត្តិ សីលន្តិ។
602. Na vattabbaṃ – ‘‘viññatti sīla’’nti? Āmantā. Dussilyanti? Na hevaṃ vattabbe…pe… tena hi viññatti sīlanti.
វិញ្ញត្តិ សីលន្តិកថា និដ្ឋិតា។
Viññatti sīlantikathā niṭṭhitā.
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ១០. វិញ្ញត្តិ សីលន្តិកថាវណ្ណនា • 10. Viññatti sīlantikathāvaṇṇanā
