| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
១២. វិញ្ញាណលក្ខណបញ្ហោ
12. Viññāṇalakkhaṇapañho
១២. ‘‘ភន្តេ នាគសេន, កិំលក្ខណំ វិញ្ញាណ’’ន្តិ? ‘‘វិជាននលក្ខណំ, មហារាជ, វិញ្ញាណ’’ន្តិ។
12. ‘‘Bhante nāgasena, kiṃlakkhaṇaṃ viññāṇa’’nti? ‘‘Vijānanalakkhaṇaṃ, mahārāja, viññāṇa’’nti.
‘‘ឱបម្មំ ករោហី’’តិ។ ‘‘យថា, មហារាជ, នគរគុត្តិកោ មជ្ឈេ នគរសិង្ឃាដកេ និសិន្នោ បស្សេយ្យ បុរត្ថិមទិសតោ បុរិសំ អាគច្ឆន្តំ, បស្សេយ្យ ទក្ខិណទិសតោ បុរិសំ អាគច្ឆន្តំ, បស្សេយ្យ បច្ឆិមទិសតោ បុរិសំ អាគច្ឆន្តំ, បស្សេយ្យ ឧត្តរទិសតោ បុរិសំ អាគច្ឆន្តំ។ ឯវមេវ ខោ, មហារាជ, យញ្ច បុរិសោ ចក្ខុនា រូបំ បស្សតិ, តំ វិញ្ញាណេន វិជានាតិ។ យញ្ច សោតេន សទ្ទំ សុណាតិ, តំ វិញ្ញាណេន វិជានាតិ។ យញ្ច ឃានេន គន្ធំ ឃាយតិ, តំ វិញ្ញាណេន វិជានាតិ។ យញ្ច ជិវ្ហាយ រសំ សាយតិ, តំ វិញ្ញាណេន វិជានាតិ។ យញ្ច កាយេន ផោដ្ឋព្ពំ ផុសតិ, តំ វិញ្ញាណេន វិជានាតិ, យញ្ច មនសា ធម្មំ វិជានាតិ, តំ វិញ្ញាណេន វិជានាតិ។ ឯវំ ខោ, មហារាជ, វិជាននលក្ខណំ វិញ្ញាណ’’ន្តិ។
‘‘Opammaṃ karohī’’ti. ‘‘Yathā, mahārāja, nagaraguttiko majjhe nagarasiṅghāṭake nisinno passeyya puratthimadisato purisaṃ āgacchantaṃ, passeyya dakkhiṇadisato purisaṃ āgacchantaṃ, passeyya pacchimadisato purisaṃ āgacchantaṃ, passeyya uttaradisato purisaṃ āgacchantaṃ. Evameva kho, mahārāja, yañca puriso cakkhunā rūpaṃ passati, taṃ viññāṇena vijānāti. Yañca sotena saddaṃ suṇāti, taṃ viññāṇena vijānāti. Yañca ghānena gandhaṃ ghāyati, taṃ viññāṇena vijānāti. Yañca jivhāya rasaṃ sāyati, taṃ viññāṇena vijānāti. Yañca kāyena phoṭṭhabbaṃ phusati, taṃ viññāṇena vijānāti, yañca manasā dhammaṃ vijānāti, taṃ viññāṇena vijānāti. Evaṃ kho, mahārāja, vijānanalakkhaṇaṃ viññāṇa’’nti.
‘‘កល្លោសិ , ភន្តេ នាគសេនា’’តិ។
‘‘Kallosi , bhante nāgasenā’’ti.
វិញ្ញាណលក្ខណបញ្ហោ ទ្វាទសមោ។
Viññāṇalakkhaṇapañho dvādasamo.
