| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၁၃. ဝိမုတ္တိဉာဏနိဒ္ဒေသော
13. Vimuttiñāṇaniddeso
၆၄. ကထံ ဆိန္နဝဋုမာနုပသ္သနေ ပညာ ဝိမုတ္တိဉာဏံ? သောတာပတ္တိမဂ္ဂေန သက္ကာယဒိဋ္ဌိ, ဝိစိကိစ္ဆာ, သီလဗ္ဗတပရာမာသော, ဒိဋ္ဌာနုသယော, ဝိစိကိစ္ဆာနုသယော အတ္တနော စိတ္တသ္သ ဥပက္ကိလေသာ သမ္မာ သမုစ္ဆိန္နာ ဟောန္တိ။ ဣမေဟိ ပဉ္စဟိ ဥပက္ကိလေသေဟိ သပရိယုဋ္ဌာနေဟိ စိတ္တံ ဝိမုတ္တံ ဟောတိ သုဝိမုတ္တံ။ တံဝိမုတ္တိ ဉာတဋ္ဌေန ဉာဏံ, ပဇာနနဋ္ဌေန ပညာ။ တေန ဝုစ္စတိ – ‘‘ဆိန္နဝဋုမာနုပသ္သနေ ပညာ ဝိမုတ္တိဉာဏံ’’။
64. Kathaṃ chinnavaṭumānupassane paññā vimuttiñāṇaṃ? Sotāpattimaggena sakkāyadiṭṭhi, vicikicchā, sīlabbataparāmāso, diṭṭhānusayo, vicikicchānusayo attano cittassa upakkilesā sammā samucchinnā honti. Imehi pañcahi upakkilesehi sapariyuṭṭhānehi cittaṃ vimuttaṃ hoti suvimuttaṃ. Taṃvimutti ñātaṭṭhena ñāṇaṃ, pajānanaṭṭhena paññā. Tena vuccati – ‘‘chinnavaṭumānupassane paññā vimuttiñāṇaṃ’’.
သကဒာဂာမိမဂ္ဂေန ဩဠာရိကံ ကာမရာဂသညောဇနံ, ပဋိဃသညောဇနံ, ဩဠာရိကော ကာမရာဂာနုသယော, ပဋိဃာနုသယော – အတ္တနော စိတ္တသ္သ ဥပက္ကိလေသာ သမ္မာ သမုစ္ဆိန္နာ ဟောန္တိ။ ဣမေဟိ စတူဟိ ဥပက္ကိလေသေဟိ သပရိယုဋ္ဌာနေဟိ စိတ္တံ ဝိမုတ္တံ ဟောတိ သုဝိမုတ္တံ။ တံဝိမုတ္တိ ဉာတဋ္ဌေန ဉာဏံ, ပဇာနနဋ္ဌေန ပညာ။ တေန ဝုစ္စတိ – ‘‘ဆိန္နဝဋုမာနုပသ္သနေ ပညာ ဝိမုတ္တိဉာဏံ’’။
Sakadāgāmimaggena oḷārikaṃ kāmarāgasaññojanaṃ, paṭighasaññojanaṃ, oḷāriko kāmarāgānusayo, paṭighānusayo – attano cittassa upakkilesā sammā samucchinnā honti. Imehi catūhi upakkilesehi sapariyuṭṭhānehi cittaṃ vimuttaṃ hoti suvimuttaṃ. Taṃvimutti ñātaṭṭhena ñāṇaṃ, pajānanaṭṭhena paññā. Tena vuccati – ‘‘chinnavaṭumānupassane paññā vimuttiñāṇaṃ’’.
အနာဂာမိမဂ္ဂေန အနုသဟဂတံ ကာမရာဂသညောဇနံ, ပဋိဃသညောဇနံ, အနုသဟဂတော ကာမရာဂာနုသယော, ပဋိဃာနုသယော – အတ္တနော စိတ္တသ္သ ဥပက္ကိလေသာ သမ္မာ သမုစ္ဆိန္နာ ဟောန္တိ။ ဣမေဟိ စတူဟိ ဥပက္ကိလေသေဟိ သပရိယုဋ္ဌာနေဟိ စိတ္တံ ဝိမုတ္တံ ဟောတိ သုဝိမုတ္တံ။ တံဝိမုတ္တိ ဉာတဋ္ဌေန ဉာဏံ, ပဇာနနဋ္ဌေန ပညာ။ တေန ဝုစ္စတိ – ‘‘ဆိန္နဝဋုမာနုပသ္သနေ ပညာ ဝိမုတ္တိဉာဏံ’’။
Anāgāmimaggena anusahagataṃ kāmarāgasaññojanaṃ, paṭighasaññojanaṃ, anusahagato kāmarāgānusayo, paṭighānusayo – attano cittassa upakkilesā sammā samucchinnā honti. Imehi catūhi upakkilesehi sapariyuṭṭhānehi cittaṃ vimuttaṃ hoti suvimuttaṃ. Taṃvimutti ñātaṭṭhena ñāṇaṃ, pajānanaṭṭhena paññā. Tena vuccati – ‘‘chinnavaṭumānupassane paññā vimuttiñāṇaṃ’’.
အရဟတ္တမဂ္ဂေန ရူပရာဂော, အရူပရာဂော, မာနော, ဥဒ္ဓစ္စံ, အဝိဇ္ဇာ, မာနာနုသယော, ဘဝရာဂာနုသယော, အဝိဇ္ဇာနုသယော – အတ္တနော စိတ္တသ္သ ဥပက္ကိလေသာ သမ္မာ သမုစ္ဆိန္နာ ဟောန္တိ။ ဣမေဟိ အဋ္ဌဟိ ဥပက္ကိလေသေဟိ သပရိယုဋ္ဌာနေဟိ စိတ္တံ ဝိမုတ္တံ ဟောတိ သုဝိမုတ္တံ။ တံဝိမုတ္တိ ဉာတဋ္ဌေန ဉာဏံ, ပဇာနနဋ္ဌေန ပညာ။ တေန ဝုစ္စတိ – ‘‘ဆိန္နဝဋုမာနုပသ္သနေ ပညာ ဝိမုတ္တိဉာဏံ’’။ တံ ဉာတဋ္ဌေန ဉာဏံ, ပဇာနနဋ္ဌေန ပညာ။ တေန ဝုစ္စတိ – ‘‘ဆိန္နဝဋုမာနုပသ္သနေ ပညာ ဝိမုတ္တိဉာဏံ’’။
Arahattamaggena rūparāgo, arūparāgo, māno, uddhaccaṃ, avijjā, mānānusayo, bhavarāgānusayo, avijjānusayo – attano cittassa upakkilesā sammā samucchinnā honti. Imehi aṭṭhahi upakkilesehi sapariyuṭṭhānehi cittaṃ vimuttaṃ hoti suvimuttaṃ. Taṃvimutti ñātaṭṭhena ñāṇaṃ, pajānanaṭṭhena paññā. Tena vuccati – ‘‘chinnavaṭumānupassane paññā vimuttiñāṇaṃ’’. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘chinnavaṭumānupassane paññā vimuttiñāṇaṃ’’.
ဝိမုတ္တိဉာဏနိဒ္ဒေသော တေရသမော။
Vimuttiñāṇaniddeso terasamo.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၁၃. ဝိမုတ္တိဉာဏနိဒ္ဒေသဝဏ္ဏနာ • 13. Vimuttiñāṇaniddesavaṇṇanā
