| Library / Tipiṭaka / तिपिटक • Tipiṭaka / पञ्चपकरण-अट्ठकथा • Pañcapakaraṇa-aṭṭhakathā |
३. विमुत्तिकथावण्णना
3. Vimuttikathāvaṇṇanā
३६३. इदानि विमुत्तिकथा नाम होति। तत्थ येसं ‘‘वीतरागचित्तानं विमुत्तिपयोजनं नाम नत्थि। यथा पन मलीनं वत्थं धोवियमानं मला विमुच्चति, एवं सरागं चित्तं रागतो विमुच्चती’’ति लद्धि, सेय्यथापि एतरहि अन्धकानं; ते सन्धाय सरागन्ति पुच्छा सकवादिस्स, पटिञ्ञा इतरस्स। ततो रागसहगतन्तिआदिना नयेन पुट्ठो मग्गक्खणे चित्तं विमुच्चति नाम। तदा च एवरूपं चित्तं नत्थीति पटिक्खिपति।
363. Idāni vimuttikathā nāma hoti. Tattha yesaṃ ‘‘vītarāgacittānaṃ vimuttipayojanaṃ nāma natthi. Yathā pana malīnaṃ vatthaṃ dhoviyamānaṃ malā vimuccati, evaṃ sarāgaṃ cittaṃ rāgato vimuccatī’’ti laddhi, seyyathāpi etarahi andhakānaṃ; te sandhāya sarāganti pucchā sakavādissa, paṭiññā itarassa. Tato rāgasahagatantiādinā nayena puṭṭho maggakkhaṇe cittaṃ vimuccati nāma. Tadā ca evarūpaṃ cittaṃ natthīti paṭikkhipati.
सफस्सन्तिआदिना नयेन पुट्ठोपि यथा फस्सो च चित्तञ्च उभो रागतो विमुच्चन्ति, एवं रागस्स विमुत्तिं अपस्समानो पटिक्खिपति। सदोसादीसुपि इमिनावुपायेन अत्थो वेदितब्बो।
Saphassantiādinā nayena puṭṭhopi yathā phasso ca cittañca ubho rāgato vimuccanti, evaṃ rāgassa vimuttiṃ apassamāno paṭikkhipati. Sadosādīsupi imināvupāyena attho veditabbo.
विमुत्तिकथावण्णना।
Vimuttikathāvaṇṇanā.
Related texts:
तिपिटक (मूल) • Tipiṭaka (Mūla) / अभिधम्मपिटक • Abhidhammapiṭaka / कथावत्थुपाळि • Kathāvatthupāḷi / (२३) ३. विमुत्तिकथा • (23) 3. Vimuttikathā
