| Library / Tipiṭaka / තිපිටක • Tipiṭaka / ථෙරගාථාපාළි • Theragāthāpāḷi |
16. විමලත්ථෙරගාථා
16. Vimalattheragāthā
264.
264.
‘‘පාපමිත්තෙ විවජ්ජෙත්වා, භජෙය්යුත්තමපුග්ගලං;
‘‘Pāpamitte vivajjetvā, bhajeyyuttamapuggalaṃ;
ඔවාදෙ චස්ස තිට්ඨෙය්ය, පත්ථෙන්තො අචලං සුඛං.
Ovāde cassa tiṭṭheyya, patthento acalaṃ sukhaṃ.
265.
265.
‘‘පරිත්තං දාරුමාරුය්හ, යථා සීදෙ මහණ්ණවෙ;
‘‘Parittaṃ dārumāruyha, yathā sīde mahaṇṇave;
එවං කුසීතමාගම්ම, සාධුජීවීපි සීදති;
Evaṃ kusītamāgamma, sādhujīvīpi sīdati;
තස්මා තං පරිවජ්ජෙය්ය, කුසීතං හීනවීරියං.
Tasmā taṃ parivajjeyya, kusītaṃ hīnavīriyaṃ.
266.
266.
‘‘පවිවිත්තෙහි අරියෙහි, පහිතත්තෙහි ඣායිභි;
‘‘Pavivittehi ariyehi, pahitattehi jhāyibhi;
නිච්චං ආරද්ධවීරියෙහි, පණ්ඩිතෙහි සහාවසෙ’’ති.
Niccaṃ āraddhavīriyehi, paṇḍitehi sahāvase’’ti.
… විමලො ථෙරො….
… Vimalo thero….
තිකනිපාතො නිට්ඨිතො.
Tikanipāto niṭṭhito.
තත්රුද්දානං –
Tatruddānaṃ –
අඞ්ගණිකො භාරද්වාජො, පච්චයො බාකුලො ඉසි;
Aṅgaṇiko bhāradvājo, paccayo bākulo isi;
ධනියො මාතඞ්ගපුත්තො, සොභිතො වාරණො ඉසි.
Dhaniyo mātaṅgaputto, sobhito vāraṇo isi.
වස්සිකො ච යසොජො ච, සාටිමත්තියුපාලි ච;
Vassiko ca yasojo ca, sāṭimattiyupāli ca;
උත්තරපාලො අභිභූතො, ගොතමො හාරිතොපි ච.
Uttarapālo abhibhūto, gotamo hāritopi ca.
ථෙරො තිකනිපාතම්හි, නිබ්බානෙ විමලො කතො;
Thero tikanipātamhi, nibbāne vimalo kato;
අට්ඨතාලීස ගාථායො, ථෙරා සොළස කිත්තිතාති.
Aṭṭhatālīsa gāthāyo, therā soḷasa kittitāti.
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / ථෙරගාථා-අට්ඨකථා • Theragāthā-aṭṭhakathā / 16. විමලත්ථෙරගාථාවණ්ණනා • 16. Vimalattheragāthāvaṇṇanā
