| Library / Tipiṭaka / तिपिटक • Tipiṭaka / थेरगाथापाळि • Theragāthāpāḷi |
१६. विमलत्थेरगाथा
16. Vimalattheragāthā
२६४.
264.
‘‘पापमित्ते विवज्जेत्वा, भजेय्युत्तमपुग्गलं।
‘‘Pāpamitte vivajjetvā, bhajeyyuttamapuggalaṃ;
ओवादे चस्स तिट्ठेय्य, पत्थेन्तो अचलं सुखं॥
Ovāde cassa tiṭṭheyya, patthento acalaṃ sukhaṃ.
२६५.
265.
‘‘परित्तं दारुमारुय्ह, यथा सीदे महण्णवे।
‘‘Parittaṃ dārumāruyha, yathā sīde mahaṇṇave;
एवं कुसीतमागम्म, साधुजीवीपि सीदति।
Evaṃ kusītamāgamma, sādhujīvīpi sīdati;
तस्मा तं परिवज्जेय्य, कुसीतं हीनवीरियं॥
Tasmā taṃ parivajjeyya, kusītaṃ hīnavīriyaṃ.
२६६.
266.
‘‘पविवित्तेहि अरियेहि, पहितत्तेहि झायिभि।
‘‘Pavivittehi ariyehi, pahitattehi jhāyibhi;
निच्चं आरद्धवीरियेहि, पण्डितेहि सहावसे’’ति॥
Niccaṃ āraddhavīriyehi, paṇḍitehi sahāvase’’ti.
… विमलो थेरो…।
… Vimalo thero….
तिकनिपातो निट्ठितो।
Tikanipāto niṭṭhito.
तत्रुद्दानं –
Tatruddānaṃ –
अङ्गणिको भारद्वाजो, पच्चयो बाकुलो इसि।
Aṅgaṇiko bhāradvājo, paccayo bākulo isi;
धनियो मातङ्गपुत्तो, सोभितो वारणो इसि॥
Dhaniyo mātaṅgaputto, sobhito vāraṇo isi.
वस्सिको च यसोजो च, साटिमत्तियुपालि च।
Vassiko ca yasojo ca, sāṭimattiyupāli ca;
उत्तरपालो अभिभूतो, गोतमो हारितोपि च॥
Uttarapālo abhibhūto, gotamo hāritopi ca.
थेरो तिकनिपातम्हि, निब्बाने विमलो कतो।
Thero tikanipātamhi, nibbāne vimalo kato;
अट्ठतालीस गाथायो, थेरा सोळस कित्तिताति॥
Aṭṭhatālīsa gāthāyo, therā soḷasa kittitāti.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / थेरगाथा-अट्ठकथा • Theragāthā-aṭṭhakathā / १६. विमलत्थेरगाथावण्णना • 16. Vimalattheragāthāvaṇṇanā
