| Library / Tipiṭaka / තිපිටක • Tipiṭaka / ථෙරීගාථාපාළි • Therīgāthāpāḷi |
2. විමලාථෙරීගාථා
2. Vimalātherīgāthā
72.
72.
‘‘මත්තා වණ්ණෙන රූපෙන, සොභග්ගෙන යසෙන ච;
‘‘Mattā vaṇṇena rūpena, sobhaggena yasena ca;
යොබ්බනෙන චුපත්ථද්ධා, අඤ්ඤාසමතිමඤ්ඤිහං.
Yobbanena cupatthaddhā, aññāsamatimaññihaṃ.
73.
73.
‘‘විභූසෙත්වා ඉමං කායං, සුචිත්තං බාලලාපනං;
‘‘Vibhūsetvā imaṃ kāyaṃ, sucittaṃ bālalāpanaṃ;
අට්ඨාසිං වෙසිද්වාරම්හි, ලුද්දො පාසමිවොඩ්ඩිය.
Aṭṭhāsiṃ vesidvāramhi, luddo pāsamivoḍḍiya.
74.
74.
‘‘පිලන්ධනං විදංසෙන්තී, ගුය්හං පකාසිකං බහුං;
‘‘Pilandhanaṃ vidaṃsentī, guyhaṃ pakāsikaṃ bahuṃ;
අකාසිං විවිධං මායං, උජ්ජග්ඝන්තී බහුං ජනං.
Akāsiṃ vividhaṃ māyaṃ, ujjagghantī bahuṃ janaṃ.
75.
75.
‘‘සාජ්ජ පිණ්ඩං චරිත්වාන, මුණ්ඩා සඞ්ඝාටිපාරුතා;
‘‘Sājja piṇḍaṃ caritvāna, muṇḍā saṅghāṭipārutā;
නිසින්නා රුක්ඛමූලම්හි, අවිතක්කස්ස ලාභිනී.
Nisinnā rukkhamūlamhi, avitakkassa lābhinī.
76.
76.
‘‘සබ්බෙ යොගා සමුච්ඡින්නා, යෙ දිබ්බා යෙ ච මානුසා;
‘‘Sabbe yogā samucchinnā, ye dibbā ye ca mānusā;
ඛෙපෙත්වා ආසවෙ සබ්බෙ, සීතිභූතාම්හි නිබ්බුතා’’ති.
Khepetvā āsave sabbe, sītibhūtāmhi nibbutā’’ti.
… විමලා පුරාණගණිකා ථෙරී….
… Vimalā purāṇagaṇikā therī….
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / ථෙරීගාථා-අට්ඨකථා • Therīgāthā-aṭṭhakathā / 2. විමලාථෙරීගාථාවණ්ණනා • 2. Vimalātherīgāthāvaṇṇanā
