| Library / Tipiṭaka / तिपिटक • Tipiṭaka / थेरीगाथापाळि • Therīgāthāpāḷi |
२. विमलाथेरीगाथा
2. Vimalātherīgāthā
७२.
72.
‘‘मत्ता वण्णेन रूपेन, सोभग्गेन यसेन च।
‘‘Mattā vaṇṇena rūpena, sobhaggena yasena ca;
योब्बनेन चुपत्थद्धा, अञ्ञासमतिमञ्ञिहं॥
Yobbanena cupatthaddhā, aññāsamatimaññihaṃ.
७३.
73.
‘‘विभूसेत्वा इमं कायं, सुचित्तं बाललापनं।
‘‘Vibhūsetvā imaṃ kāyaṃ, sucittaṃ bālalāpanaṃ;
अट्ठासिं वेसिद्वारम्हि, लुद्दो पासमिवोड्डिय॥
Aṭṭhāsiṃ vesidvāramhi, luddo pāsamivoḍḍiya.
७४.
74.
‘‘पिलन्धनं विदंसेन्ती, गुय्हं पकासिकं बहुं।
‘‘Pilandhanaṃ vidaṃsentī, guyhaṃ pakāsikaṃ bahuṃ;
अकासिं विविधं मायं, उज्जग्घन्ती बहुं जनं॥
Akāsiṃ vividhaṃ māyaṃ, ujjagghantī bahuṃ janaṃ.
७५.
75.
‘‘साज्ज पिण्डं चरित्वान, मुण्डा सङ्घाटिपारुता।
‘‘Sājja piṇḍaṃ caritvāna, muṇḍā saṅghāṭipārutā;
निसिन्ना रुक्खमूलम्हि, अवितक्कस्स लाभिनी॥
Nisinnā rukkhamūlamhi, avitakkassa lābhinī.
७६.
76.
‘‘सब्बे योगा समुच्छिन्ना, ये दिब्बा ये च मानुसा।
‘‘Sabbe yogā samucchinnā, ye dibbā ye ca mānusā;
खेपेत्वा आसवे सब्बे, सीतिभूताम्हि निब्बुता’’ति॥
Khepetvā āsave sabbe, sītibhūtāmhi nibbutā’’ti.
… विमला पुराणगणिका थेरी…।
… Vimalā purāṇagaṇikā therī….
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / थेरीगाथा-अट्ठकथा • Therīgāthā-aṭṭhakathā / २. विमलाथेरीगाथावण्णना • 2. Vimalātherīgāthāvaṇṇanā
