| Library / Tipiṭaka / तिपिटक • Tipiṭaka / कङ्खावितरणी-अभिनव-टीका • Kaṅkhāvitaraṇī-abhinava-ṭīkā |
९. विकप्पनसिक्खापदवण्णना
9. Vikappanasikkhāpadavaṇṇanā
सम्मुखेन विकप्पना सम्मुखविकप्पना। परम्मुखेन विकप्पना परम्मुखविकप्पना। सन्निहितासन्निहितभावन्ति आसन्नदूरभावं। आसन्नदूरभावो च अधिट्ठाने वुत्तनयेनेव वेदितब्बो।
Sammukhena vikappanā sammukhavikappanā. Parammukhena vikappanā parammukhavikappanā. Sannihitāsannihitabhāvanti āsannadūrabhāvaṃ. Āsannadūrabhāvo ca adhiṭṭhāne vuttanayeneva veditabbo.
मित्तोति दळ्हमित्तो। सन्दिट्ठोति दिट्ठमत्तो नातिदळ्हमित्तो। अकतपच्चुद्धारन्ति ‘‘मय्हं सन्तकं परिभुञ्ज वा विस्सज्जेहि वा’’तिआदिना अकतपच्चुद्धारं। येन विनयकम्मं कतन्ति येन सद्धिं विनयकम्मं कतं।
Mittoti daḷhamitto. Sandiṭṭhoti diṭṭhamatto nātidaḷhamitto. Akatapaccuddhāranti ‘‘mayhaṃ santakaṃ paribhuñja vā vissajjehi vā’’tiādinā akatapaccuddhāraṃ. Yena vinayakammaṃ katanti yena saddhiṃ vinayakammaṃ kataṃ.
परिभोगेन कायकम्मं, अपच्चुद्धारापनेन वचीकम्मन्ति आह ‘‘समुट्ठानादीनि पठमकथिनसदिसानेवा’’ति। किरियाकिरियन्ति एत्थ परिभुञ्जनं किरियं। अपच्चुद्धारापनं अकिरियं।
Paribhogena kāyakammaṃ, apaccuddhārāpanena vacīkammanti āha ‘‘samuṭṭhānādīni paṭhamakathinasadisānevā’’ti. Kiriyākiriyanti ettha paribhuñjanaṃ kiriyaṃ. Apaccuddhārāpanaṃ akiriyaṃ.
विकप्पनसिक्खापदवण्णना निट्ठिता।
Vikappanasikkhāpadavaṇṇanā niṭṭhitā.
