| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
31. விகப்பனானித்³தே³ஸவண்ணனா
31. Vikappanāniddesavaṇṇanā
221. ஸம்முகா² பரம்முகா²தி ஸஸ்ஸ முக²ங், பரஸ்ஸ முக²ந்தி விக்³க³ஹோ, ஸம்முகே²ன பரம்முகே²னாதி அத்தோ². ஸம்முகா²விகப்பனா பரம்முகா²விகப்பனாதி பே⁴தா³ து³வே விகப்பனா வுத்தாதி யோஜனா . பே⁴தா³தி விஸேஸதோ. அத² வா ஸஸ்ஸ முக²ங் முக²ஸம்ப³ந்தி⁴வசனங் அஸ்ஸா விகப்பனாயாதி ஸமாஸோ. ததா² பரம்முகா². ஸம்முகா² ச பரம்முகா² ச, தஸ்ஸா பே⁴தோ³, ததோ. ஸம்முகா²ய ஸம்முக²விகப்பனாய. ப்³யத்தஸ்ஸாதி விகப்பனவிதா⁴னங் பச்சுத்³தா⁴ரவிதா⁴னஞ்ச ஜானந்தஸ்ஸ.
221.Sammukhā parammukhāti sassa mukhaṃ, parassa mukhanti viggaho, sammukhena parammukhenāti attho. Sammukhāvikappanā parammukhāvikappanāti bhedā duve vikappanā vuttāti yojanā . Bhedāti visesato. Atha vā sassa mukhaṃ mukhasambandhivacanaṃ assā vikappanāyāti samāso. Tathā parammukhā. Sammukhā ca parammukhā ca, tassā bhedo, tato. Sammukhāya sammukhavikappanāya. Byattassāti vikappanavidhānaṃ paccuddhāravidhānañca jānantassa.
222. தேனாதி யஸ்ஸ ஸந்திகே விகப்பேதி, தேன பி⁴க்கு²னா. பரிபோ⁴கா³தி³கந்தி பரிபோ⁴க³ங் விஸ்ஸஜ்ஜனங் அதி⁴ட்டா²னஞ்ச.
222.Tenāti yassa santike vikappeti, tena bhikkhunā. Paribhogādikanti paribhogaṃ vissajjanaṃ adhiṭṭhānañca.
224-5. அபரா ஸம்முகா²வேகாதி எத்த² வா-ஸத்³தோ³ பக்க²ந்தரே, அத² வாதி அத்தோ², அபி-ஸத்³த³த்தோ² வா வா-ஸத்³தோ³, ஸோ அபரா-ஸத்³த³தோ பரங் த³ட்ட²ப்³போ³, அபராபி ஏகா ஸம்முகா²விகப்பனா அத்தீ²தி அத்தோ². கத²ந்தி ஆஹ ‘‘பி⁴க்கு²ஸ்ஸா’’திஆதி³. ‘‘பஞ்சன்னங் ஸஹத⁴ம்மீன’’ந்தி வுத்தத்தா ‘‘திஸ்ஸஸ்ஸ பி⁴க்கு²னோ’’திஆதீ³ஸு திஸ்ஸாய பி⁴க்கு²னியா திஸ்ஸாய ஸிக்க²மானாய திஸ்ஸாய ஸாமணேரியா திஸ்ஸஸ்ஸ ஸாமணேரஸ்ஸாதிபி விஞ்ஞாதப்³ப³ங்.
224-5.Aparāsammukhāvekāti ettha vā-saddo pakkhantare, atha vāti attho, api-saddattho vā vā-saddo, so aparā-saddato paraṃ daṭṭhabbo, aparāpi ekā sammukhāvikappanā atthīti attho. Kathanti āha ‘‘bhikkhussā’’tiādi. ‘‘Pañcannaṃ sahadhammīna’’nti vuttattā ‘‘tissassa bhikkhuno’’tiādīsu tissāya bhikkhuniyā tissāya sikkhamānāya tissāya sāmaṇeriyā tissassa sāmaṇerassātipi viññātabbaṃ.
226. பரம்முகா²விகப்பனாதி பரம்முகே²ன விகப்பனேன, பரம்முகா²விகப்பனாதி வா க³ஹேதப்³ப³ங், பரம்முகா²விகப்பனா கத²ந்தி அத்தோ².
226.Parammukhāvikappanāti parammukhena vikappanena, parammukhāvikappanāti vā gahetabbaṃ, parammukhāvikappanā kathanti attho.
227. மித்தோதி த³ள்ஹமித்தோ. ஸந்தி³ட்டோ²தி தி³ட்ட²மத்தமித்தோ. எத்த² பன த்³வின்னங் விகப்பனானங் கிங் நானாகரணந்தி? ஸம்முகா²விகப்பனாய தாவ ஸயங் விகப்பெத்வா பரேன பச்சுத்³த⁴ராபேதி, தேனேவ ஸா ஸம்முகா²விகப்பனா நாம ஜாதா. பரம்முகா²விகப்பனாய பரேனேவ விகப்பாபெத்வா பரேனேவ பச்சுத்³த⁴ராபேதி, தேனேவ ஸா பரம்முகா²விகப்பனா நாம ஜாதாதி இத³மெத்த² நானாகரணந்தி.
227.Mittoti daḷhamitto. Sandiṭṭhoti diṭṭhamattamitto. Ettha pana dvinnaṃ vikappanānaṃ kiṃ nānākaraṇanti? Sammukhāvikappanāya tāva sayaṃ vikappetvā parena paccuddharāpeti, teneva sā sammukhāvikappanā nāma jātā. Parammukhāvikappanāya pareneva vikappāpetvā pareneva paccuddharāpeti, teneva sā parammukhāvikappanā nāma jātāti idamettha nānākaraṇanti.
228. தூ³ரஸந்திகத்தேகத்தந்தி எத்த² ஆஸன்னதூ³ரபா⁴வோ அதி⁴ட்டா²னே வுத்தனயேனேவ வேதி³தப்³போ³.
228.Dūrasantikattekattanti ettha āsannadūrabhāvo adhiṭṭhāne vuttanayeneva veditabbo.
229. த³ஸாஹங்…பே॰… பச்சாஸாய ஸதி மாஸகங் நாதி⁴ட்டி²தவிகப்பிதங் நிஸ்ஸக்³கி³ங் நுப்பாத³யதீதி ஸம்ப³ந்தோ⁴. த³ஸ அஹானி ஸமாஹடானி த³ஸாஹங். ஸப்³ப³த்த² அச்சந்தஸங்யோகே³ து³தியா. தத்த² யங் தி³வஸங் சீவரங் உப்பன்னங், தஸ்ஸ யோ அருணோ, ஸோ உப்பன்னதி³வஸனிஸ்ஸிதோ, தஸ்மா சீவருப்பாத³தி³வஸேன ஸத்³தி⁴ங் ஏகாத³ஸே அருணுக்³க³மனே நிஸ்ஸக்³கி³யங் ஹோதீதி ஆஹ ‘‘த³ஸாஹ’’ந்தி. மாஸமேகங் வாதி ‘‘அனத்த²தே கதி²னே ஏகங் பச்சி²மகத்திகமாஸ’’ந்தி (பாரா॰ 649 அத்த²தோ ஸமானங்) வுத்தத்தா கதி²னத்த²தே பஞ்ச மாஸேதி லப்³ப⁴தி. கதி²னங் அத்த²தங் யஸ்மிங் விஹாரேதி ஸமாஸோ. பாரிபூரத்த²ந்தி பாரிபூரி அத்தோ² யஸ்ஸாதி விக்³க³ஹோ. கிரியாவிஸேஸனங், பாரிபூரிப்பயோஜனங் கத்வாதி அத்தோ². ஊனஸ்ஸாதி யத்தகேன கயிரமானங் அதி⁴ட்டா²னங் சீவரங் பஹோதி, தத்தகதாபா⁴வதோ ஊனஸ்ஸ ஏகாத³ஸமாஸஸத்தமாஸஸங்கா²தே பிட்டி²ஸமயே உப்பன்னஸ்ஸ மூலசீவரஸ்ஸ. பச்சாஸா ஸதீதி ‘‘ஸங்கா⁴தி³தோ யதோ குதோசி லச்சா²மீ’’தி ஏவங் ஸதியா பச்சாஸாயாதி அத்தோ². உப⁴யம்பி ய-காரலோபேன நித்³தி³ட்ட²ங். ஸதீதி வா நிபாதோ, லிங்க³விபல்லாஸேன வாஹ. எத்த² பன ப்³யதிரேகவஸேன த³ஸாஹாதிக்கமனாதீ³ஸு நிஸ்ஸக்³கி³யங் பாசித்தியங் வேதி³தப்³ப³ந்தி.
229. Dasāhaṃ…pe… paccāsāya sati māsakaṃ nādhiṭṭhitavikappitaṃ nissaggiṃ nuppādayatīti sambandho. Dasa ahāni samāhaṭāni dasāhaṃ. Sabbattha accantasaṃyoge dutiyā. Tattha yaṃ divasaṃ cīvaraṃ uppannaṃ, tassa yo aruṇo, so uppannadivasanissito, tasmā cīvaruppādadivasena saddhiṃ ekādase aruṇuggamane nissaggiyaṃ hotīti āha ‘‘dasāha’’nti. Māsamekaṃ vāti ‘‘anatthate kathine ekaṃ pacchimakattikamāsa’’nti (pārā. 649 atthato samānaṃ) vuttattā kathinatthate pañca māseti labbhati. Kathinaṃ atthataṃ yasmiṃ vihāreti samāso. Pāripūratthanti pāripūri attho yassāti viggaho. Kiriyāvisesanaṃ, pāripūrippayojanaṃ katvāti attho. Ūnassāti yattakena kayiramānaṃ adhiṭṭhānaṃ cīvaraṃ pahoti, tattakatābhāvato ūnassa ekādasamāsasattamāsasaṅkhāte piṭṭhisamaye uppannassa mūlacīvarassa. Paccāsā satīti ‘‘saṅghādito yato kutoci lacchāmī’’ti evaṃ satiyā paccāsāyāti attho. Ubhayampi ya-kāralopena niddiṭṭhaṃ. Satīti vā nipāto, liṅgavipallāsena vāha. Ettha pana byatirekavasena dasāhātikkamanādīsu nissaggiyaṃ pācittiyaṃ veditabbanti.
விகப்பனானித்³தே³ஸவண்ணனா நிட்டி²தா.
Vikappanāniddesavaṇṇanā niṭṭhitā.
