| Library / Tipiṭaka / තිපිටක • Tipiṭaka / ඉතිවුත්තකපාළි • Itivuttakapāḷi |
3. විජ්ජාසුත්තං
3. Vijjāsuttaṃ
40. වුත්තඤ්හෙතං භගවතා, වුත්තමරහතාති මෙ සුතං –
40. Vuttañhetaṃ bhagavatā, vuttamarahatāti me sutaṃ –
‘‘අවිජ්ජා , භික්ඛවෙ, පුබ්බඞ්ගමා අකුසලානං ධම්මානං සමාපත්තියා අන්වදෙව අහිරිකං අනොත්තප්පං; විජ්ජා ච ඛො, භික්ඛවෙ, පුබ්බඞ්ගමා කුසලානං ධම්මානං සමාපත්තියා අන්වදෙව හිරොත්තප්ප’’න්ති. එතමත්ථං භගවා අවොච. තත්ථෙතං ඉති වුච්චති –
‘‘Avijjā , bhikkhave, pubbaṅgamā akusalānaṃ dhammānaṃ samāpattiyā anvadeva ahirikaṃ anottappaṃ; vijjā ca kho, bhikkhave, pubbaṅgamā kusalānaṃ dhammānaṃ samāpattiyā anvadeva hirottappa’’nti. Etamatthaṃ bhagavā avoca. Tatthetaṃ iti vuccati –
‘‘යා කාචිමා දුග්ගතියො, අස්මිං ලොකෙ පරම්හි ච;
‘‘Yā kācimā duggatiyo, asmiṃ loke paramhi ca;
අවිජ්ජාමූලිකා සබ්බා, ඉච්ඡාලොභසමුස්සයා.
Avijjāmūlikā sabbā, icchālobhasamussayā.
‘‘යතො ච හොති පාපිච්ඡො, අහිරීකො අනාදරො;
‘‘Yato ca hoti pāpiccho, ahirīko anādaro;
තතො පාපං පසවති, අපායං තෙන ගච්ඡති.
Tato pāpaṃ pasavati, apāyaṃ tena gacchati.
‘‘තස්මා ඡන්දඤ්ච ලොභඤ්ච, අවිජ්ජඤ්ච විරාජයං;
‘‘Tasmā chandañca lobhañca, avijjañca virājayaṃ;
විජ්ජං උප්පාදයං භික්ඛු, සබ්බා දුග්ගතියො ජහෙ’’ති.
Vijjaṃ uppādayaṃ bhikkhu, sabbā duggatiyo jahe’’ti.
අයම්පි අත්ථො වුත්තො භගවතා, ඉති මෙ සුතන්ති. තතියං.
Ayampi attho vutto bhagavatā, iti me sutanti. Tatiyaṃ.
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / ඉතිවුත්තක-අට්ඨකථා • Itivuttaka-aṭṭhakathā / 3. විජ්ජාසුත්තවණ්ණනා • 3. Vijjāsuttavaṇṇanā
