| Library / Tipiṭaka / ತಿಪಿಟಕ • Tipiṭaka / ಥೇರೀಗಾಥಾ-ಅಟ್ಠಕಥಾ • Therīgāthā-aṭṭhakathā |
೮. ವಿಜಯಾಥೇರೀಗಾಥಾವಣ್ಣನಾ
8. Vijayātherīgāthāvaṇṇanā
ಚತುಕ್ಖತ್ತುನ್ತಿಆದಿಕಾ ವಿಜಯಾಯ ಥೇರಿಯಾ ಗಾಥಾ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರಾ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಂ ಕುಸಲಂ ಉಪಚಿನನ್ತೀ, ಅನುಕ್ಕಮೇನ ಪರಿಬ್ರೂಹಿತಕುಸಲಮೂಲಾ ದೇವಮನುಸ್ಸೇಸು ಸಂಸರನ್ತೀ, ಇಮಸ್ಮಿಂ ಬುದ್ಧುಪ್ಪಾದೇ ರಾಜಗಹೇ ಅಞ್ಞತರಸ್ಮಿಂ ಕುಲಗೇಹೇ ನಿಬ್ಬತ್ತಿತ್ವಾ ವಿಞ್ಞುತಂ ಪತ್ವಾ ಖೇಮಾಯ ಥೇರಿಯಾ ಗಿಹಿಕಾಲೇ ಸಹಾಯಿಕಾ ಅಹೋಸಿ। ಸಾ ತಸ್ಸಾ ಪಬ್ಬಜಿತಭಾವಂ ಸುತ್ವಾ ‘‘ಸಾಪಿ ನಾಮ ರಾಜಮಹೇಸೀ ಪಬ್ಬಜಿಸ್ಸತಿ ಕಿಮಙ್ಗಂ ಪನಾಹ’’ನ್ತಿ ಪಬ್ಬಜಿತುಕಾಮಾಯೇವ ಹುತ್ವಾ ಖೇಮಾಥೇರಿಯಾ ಸನ್ತಿಕಂ ಉಪಸಙ್ಕಮಿ। ಥೇರೀ ತಸ್ಸಾ ಅಜ್ಝಾಸಯಂ ಞತ್ವಾ ತಥಾ ಧಮ್ಮಂ ದೇಸೇಸಿ, ಯಥಾ ಸಂಸಾರೇ ಸಂವಿಗ್ಗಮಾನಸಾ ಸಾಸನೇ ಸಾ ಅಭಿಪ್ಪಸನ್ನಾ ಭವಿಸ್ಸತಿ। ಸಾ ತಂ ಧಮ್ಮಂ ಸುತ್ವಾ ಸಂವೇಗಜಾತಾ ಪಟಿಲದ್ಧಸದ್ಧಾ ಚ ಹುತ್ವಾ ಪಬ್ಬಜ್ಜಂ ಯಾಚಿ। ಥೇರೀ ತಂ ಪಬ್ಬಾಜೇಸಿ। ಸಾ ಪಬ್ಬಜಿತ್ವಾ ಕತಪುಬ್ಬಕಿಚ್ಚಾ ವಿಪಸ್ಸನಂ ಪಟ್ಠಪೇತ್ವಾ ಹೇತುಸಮ್ಪನ್ನತಾಯ, ನ ಚಿರಸ್ಸೇವ ಸಹ ಪಟಿಸಮ್ಭಿದಾಹಿ ಅರಹತ್ತಂ ಪತ್ವಾ ಅತ್ತನೋ ಪಟಿಪತ್ತಿಂ ಪಚ್ಚವೇಕ್ಖಿತ್ವಾ ಉದಾನವಸೇನ –
Catukkhattuntiādikā vijayāya theriyā gāthā. Ayampi purimabuddhesu katādhikārā tattha tattha bhave vivaṭṭūpanissayaṃ kusalaṃ upacinantī, anukkamena paribrūhitakusalamūlā devamanussesu saṃsarantī, imasmiṃ buddhuppāde rājagahe aññatarasmiṃ kulagehe nibbattitvā viññutaṃ patvā khemāya theriyā gihikāle sahāyikā ahosi. Sā tassā pabbajitabhāvaṃ sutvā ‘‘sāpi nāma rājamahesī pabbajissati kimaṅgaṃ panāha’’nti pabbajitukāmāyeva hutvā khemātheriyā santikaṃ upasaṅkami. Therī tassā ajjhāsayaṃ ñatvā tathā dhammaṃ desesi, yathā saṃsāre saṃviggamānasā sāsane sā abhippasannā bhavissati. Sā taṃ dhammaṃ sutvā saṃvegajātā paṭiladdhasaddhā ca hutvā pabbajjaṃ yāci. Therī taṃ pabbājesi. Sā pabbajitvā katapubbakiccā vipassanaṃ paṭṭhapetvā hetusampannatāya, na cirasseva saha paṭisambhidāhi arahattaṃ patvā attano paṭipattiṃ paccavekkhitvā udānavasena –
೧೬೯.
169.
‘‘ಚತುಕ್ಖತ್ತುಂ ಪಞ್ಚಕ್ಖತ್ತುಂ, ವಿಹಾರಾ ಉಪನಿಕ್ಖಮಿಂ।
‘‘Catukkhattuṃ pañcakkhattuṃ, vihārā upanikkhamiṃ;
ಅಲದ್ಧಾ ಚೇತಸೋ ಸನ್ತಿಂ, ಚಿತ್ತೇ ಅವಸವತ್ತಿನೀ॥
Aladdhā cetaso santiṃ, citte avasavattinī.
೧೭೦.
170.
‘‘ಭಿಕ್ಖುನಿಂ ಉಪಸಙ್ಕಮ್ಮ, ಸಕ್ಕಚ್ಚಂ ಪರಿಪುಚ್ಛಹಂ।
‘‘Bhikkhuniṃ upasaṅkamma, sakkaccaṃ paripucchahaṃ;
ಸಾ ಮೇ ಧಮ್ಮಮದೇಸೇಸಿ, ಧಾತುಆಯತನಾನಿ ಚ॥
Sā me dhammamadesesi, dhātuāyatanāni ca.
೧೭೧.
171.
‘‘ಚತ್ತಾರಿ ಅರಿಯಸಚ್ಚಾನಿ, ಇನ್ದ್ರಿಯಾನಿ ಬಲಾನಿ ಚ।
‘‘Cattāri ariyasaccāni, indriyāni balāni ca;
ಬೋಜ್ಝಙ್ಗಟ್ಠಙ್ಗಿಕಂ ಮಗ್ಗಂ, ಉತ್ತಮತ್ಥಸ್ಸ ಪತ್ತಿಯಾ॥
Bojjhaṅgaṭṭhaṅgikaṃ maggaṃ, uttamatthassa pattiyā.
೧೭೨.
172.
‘‘ತಸ್ಸಾಹಂ ವಚನಂ ಸುತ್ವಾ, ಕರೋನ್ತೀ ಅನುಸಾಸನಿಂ।
‘‘Tassāhaṃ vacanaṃ sutvā, karontī anusāsaniṃ;
ರತ್ತಿಯಾ ಪುರಿಮೇ ಯಾಮೇ, ಪುಬ್ಬಜಾತಿಮನುಸ್ಸರಿಂ॥
Rattiyā purime yāme, pubbajātimanussariṃ.
೧೭೩.
173.
‘‘ರತ್ತಿಯಾ ಮಜ್ಝಿಮೇ ಯಾಮೇ, ದಿಬ್ಬಚಕ್ಖುಂ ವಿಸೋಧಯಿಂ।
‘‘Rattiyā majjhime yāme, dibbacakkhuṃ visodhayiṃ;
ರತ್ತಿಯಾ ಪಚ್ಛಿಮೇ ಯಾಮೇ, ತಮೋಖನ್ಧಂ ಪದಾಲಯಿಂ॥
Rattiyā pacchime yāme, tamokhandhaṃ padālayiṃ.
೧೭೪.
174.
‘‘ಪೀತಿಸುಖೇನ ಚ ಕಾಯಂ, ಫರಿತ್ವಾ ವಿಹರಿಂ ತದಾ।
‘‘Pītisukhena ca kāyaṃ, pharitvā vihariṃ tadā;
ಸತ್ತಮಿಯಾ ಪಾದೇ ಪಸಾರೇಸಿಂ, ತಮೋಖನ್ಧಂ ಪದಾಲಿಯಾ’’ತಿ॥ –
Sattamiyā pāde pasāresiṃ, tamokhandhaṃ padāliyā’’ti. –
ಇಮಾ ಗಾಥಾ ಅಭಾಸಿ।
Imā gāthā abhāsi.
ತತ್ಥ ಭಿಕ್ಖುನಿನ್ತಿ ಖೇಮಾಥೇರಿಂ ಸನ್ಧಾಯ ವದತಿ।
Tattha bhikkhuninti khemātheriṃ sandhāya vadati.
ಬೋಜ್ಝಙ್ಗಟ್ಠಙ್ಗಿಕಂ ಮಗ್ಗನ್ತಿ ಸತ್ತಬೋಜ್ಝಙ್ಗಞ್ಚ ಅಟ್ಠಙ್ಗಿಕಞ್ಚ ಅರಿಯಮಗ್ಗಂ। ಉತ್ತಮತ್ಥಸ್ಸ ಪತ್ತಿಯಾತಿ ಅರಹತ್ತಸ್ಸ ನಿಬ್ಬಾನಸ್ಸೇವ ವಾ ಪತ್ತಿಯಾ ಅಧಿಗಮಾಯ।
Bojjhaṅgaṭṭhaṅgikaṃ magganti sattabojjhaṅgañca aṭṭhaṅgikañca ariyamaggaṃ. Uttamatthassa pattiyāti arahattassa nibbānasseva vā pattiyā adhigamāya.
ಪೀತಿಸುಖೇನಾತಿ ಫಲಸಮಾಪತ್ತಿಪರಿಯಾಪನ್ನಾಯ ಪೀತಿಯಾ ಸುಖೇನ ಚ। ಕಾಯನ್ತಿ ತಂಸಮ್ಪಯುತ್ತಂ ನಾಮಕಾಯಂ ತದನುಸಾರೇನ ರೂಪಕಾಯಞ್ಚ। ಫರಿತ್ವಾತಿ ಫುಸಿತ್ವಾ ಬ್ಯಾಪೇತ್ವಾ ವಾ। ಸತ್ತಮಿಯಾ ಪಾದೇ ಪಸಾರೇಸಿನ್ತಿ ವಿಪಸ್ಸನಾಯ ಆರದ್ಧದಿವಸತೋ ಸತ್ತಮಿಯಂ ಪಲ್ಲಙ್ಕಂ ಭಿನ್ದಿತ್ವಾ ಪಾದೇ ಪಸಾರೇಸಿಂ। ಕಥಂ? ತಮೋಖನ್ಧಂ ಪದಾಲಿಯ, ಅಪ್ಪದಾಲಿತಪುಬ್ಬಂ ಮೋಹಕ್ಖನ್ಧಂ ಅಗ್ಗಮಗ್ಗಞಾಣಾಸಿನಾ ಪದಾಲೇತ್ವಾ। ಸೇಸಂ ಹೇಟ್ಠಾ ವುತ್ತನಯಮೇವ।
Pītisukhenāti phalasamāpattipariyāpannāya pītiyā sukhena ca. Kāyanti taṃsampayuttaṃ nāmakāyaṃ tadanusārena rūpakāyañca. Pharitvāti phusitvā byāpetvā vā. Sattamiyā pāde pasāresinti vipassanāya āraddhadivasato sattamiyaṃ pallaṅkaṃ bhinditvā pāde pasāresiṃ. Kathaṃ? Tamokhandhaṃ padāliya, appadālitapubbaṃ mohakkhandhaṃ aggamaggañāṇāsinā padāletvā. Sesaṃ heṭṭhā vuttanayameva.
ವಿಜಯಾಥೇರೀಗಾಥಾವಣ್ಣನಾ ನಿಟ್ಠಿತಾ।
Vijayātherīgāthāvaṇṇanā niṭṭhitā.
ಛಕ್ಕನಿಪಾತವಣ್ಣನಾ ನಿಟ್ಠಿತಾ।
Chakkanipātavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಥೇರೀಗಾಥಾಪಾಳಿ • Therīgāthāpāḷi / ೮. ವಿಜಯಾಥೇರೀಗಾಥಾ • 8. Vijayātherīgāthā
