| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
៤. វិច្ឆិកង្គបញ្ហោ
4. Vicchikaṅgapañho
៤. ‘‘ភន្តេ នាគសេន, ‘វិច្ឆិកស្ស ឯកំ អង្គំ គហេតព្ព’ន្តិ យំ វទេសិ, កតមំ តំ ឯកំ អង្គំ គហេតព្ព’’ន្តិ? ‘‘យថា, មហារាជ, វិច្ឆិកោ នង្គុលាវុធោ នង្គុលំ ឧស្សាបេត្វា ចរតិ, ឯវមេវ ខោ, មហារាជ, យោគិនា យោគាវចរេន ញាណាវុធេន ភវិតព្ពំ, ញាណំ ឧស្សាបេត្វា វិហរិតព្ពំ ។ ឥទំ, មហារាជ, វិច្ឆិកស្ស ឯកំ អង្គំ គហេតព្ពំ។ ភាសិតម្បេតំ, មហារាជ, ថេរេន ឧបសេនេន វង្គន្តបុត្តេន –
4. ‘‘Bhante nāgasena, ‘vicchikassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, vicchiko naṅgulāvudho naṅgulaṃ ussāpetvā carati, evameva kho, mahārāja, yoginā yogāvacarena ñāṇāvudhena bhavitabbaṃ, ñāṇaṃ ussāpetvā viharitabbaṃ . Idaṃ, mahārāja, vicchikassa ekaṃ aṅgaṃ gahetabbaṃ. Bhāsitampetaṃ, mahārāja, therena upasenena vaṅgantaputtena –
‘‘‘ញាណខគ្គំ គហេត្វាន, វិហរន្តោ វិបស្សកោ;
‘‘‘Ñāṇakhaggaṃ gahetvāna, viharanto vipassako;
បរិមុច្ចតិ សព្ពភយា, ទុប្បសហោ ច សោ ភវេ’’’តិ។
Parimuccati sabbabhayā, duppasaho ca so bhave’’’ti.
វិច្ឆិកង្គបញ្ហោ ចតុត្ថោ។
Vicchikaṅgapañho catuttho.
