| Library / Tipiṭaka / तिपिटक • Tipiṭaka / मिलिन्दपञ्हपाळि • Milindapañhapāḷi |
४. विच्छिकङ्गपञ्हो
4. Vicchikaṅgapañho
४. ‘‘भन्ते नागसेन, ‘विच्छिकस्स एकं अङ्गं गहेतब्ब’न्ति यं वदेसि, कतमं तं एकं अङ्गं गहेतब्ब’’न्ति? ‘‘यथा, महाराज, विच्छिको नङ्गुलावुधो नङ्गुलं उस्सापेत्वा चरति, एवमेव खो, महाराज, योगिना योगावचरेन ञाणावुधेन भवितब्बं, ञाणं उस्सापेत्वा विहरितब्बं । इदं, महाराज, विच्छिकस्स एकं अङ्गं गहेतब्बं। भासितम्पेतं, महाराज, थेरेन उपसेनेन वङ्गन्तपुत्तेन –
4. ‘‘Bhante nāgasena, ‘vicchikassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, vicchiko naṅgulāvudho naṅgulaṃ ussāpetvā carati, evameva kho, mahārāja, yoginā yogāvacarena ñāṇāvudhena bhavitabbaṃ, ñāṇaṃ ussāpetvā viharitabbaṃ . Idaṃ, mahārāja, vicchikassa ekaṃ aṅgaṃ gahetabbaṃ. Bhāsitampetaṃ, mahārāja, therena upasenena vaṅgantaputtena –
‘‘‘ञाणखग्गं गहेत्वान, विहरन्तो विपस्सको।
‘‘‘Ñāṇakhaggaṃ gahetvāna, viharanto vipassako;
परिमुच्चति सब्बभया, दुप्पसहो च सो भवे’’’ति॥
Parimuccati sabbabhayā, duppasaho ca so bhave’’’ti.
विच्छिकङ्गपञ्हो चतुत्थो।
Vicchikaṅgapañho catuttho.
