| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๔๕. วิภีตกวโคฺค
45. Vibhītakavaggo
๑. วิภีตกมิญฺชิยเตฺถรอปทานํ
1. Vibhītakamiñjiyattheraapadānaṃ
๑.
1.
‘‘กกุสโนฺธ มหาวีโร, สพฺพธมฺมาน ปารคู;
‘‘Kakusandho mahāvīro, sabbadhammāna pāragū;
คณมฺหา วูปกโฎฺฐ โส, อคมาสิ วนนฺตรํฯ
Gaṇamhā vūpakaṭṭho so, agamāsi vanantaraṃ.
๒.
2.
‘‘พีชมิญฺชํ คเหตฺวาน, ลตาย อาวุณิํ อหํ;
‘‘Bījamiñjaṃ gahetvāna, latāya āvuṇiṃ ahaṃ;
ภควา ตมฺหิ สมเย, ฌายเต ปพฺพตนฺตเรฯ
Bhagavā tamhi samaye, jhāyate pabbatantare.
๓.
3.
‘‘ทิสฺวานหํ เทวเทวํ, วิปฺปสเนฺนน เจตสา;
‘‘Disvānahaṃ devadevaṃ, vippasannena cetasā;
ทกฺขิเณยฺยสฺส วีรสฺส, พีชมิญฺชมทาสหํฯ
Dakkhiṇeyyassa vīrassa, bījamiñjamadāsahaṃ.
๔.
4.
ทุคฺคติํ นาภิชานามิ, พีชมิญฺชสฺสิทํ ผลํฯ
Duggatiṃ nābhijānāmi, bījamiñjassidaṃ phalaṃ.
๕.
5.
‘‘กิเลสา ฌาปิตา มยฺหํ, ภวา สเพฺพ สมูหตา;
‘‘Kilesā jhāpitā mayhaṃ, bhavā sabbe samūhatā;
นาโคว พนฺธนํ เฉตฺวา, วิหรามิ อนาสโวฯ
Nāgova bandhanaṃ chetvā, viharāmi anāsavo.
๖.
6.
‘‘สฺวาคตํ วต เม อาสิ, มม พุทฺธสฺส สนฺติเก;
‘‘Svāgataṃ vata me āsi, mama buddhassa santike;
ติโสฺส วิชฺชา อนุปฺปตฺตา, กตํ พุทฺธสฺส สาสนํฯ
Tisso vijjā anuppattā, kataṃ buddhassa sāsanaṃ.
๗.
7.
‘‘ปฎิสมฺภิทา จตโสฺส, วิโมกฺขาปิ จ อฎฺฐิเม;
‘‘Paṭisambhidā catasso, vimokkhāpi ca aṭṭhime;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
Chaḷabhiññā sacchikatā, kataṃ buddhassa sāsanaṃ’’.
คาถาโย อภาสิตฺถาติฯ
Gāthāyo abhāsitthāti.
วิภีตกมิญฺชิยเตฺถรสฺสาปทานํ ปฐมํฯ
Vibhītakamiñjiyattherassāpadānaṃ paṭhamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๑-๖๐. สกิํสมฺมชฺชกเตฺถรอปทานาทิวณฺณนา • 1-60. Sakiṃsammajjakattheraapadānādivaṇṇanā
